ZEPHANIAH 1 - PATHIAN LEKHABU THIANGTHO (BSI)

Judai Gam Chung ah Vaihawmna Hungtung Ding

¹ Judai gam ah Ammon chapa Leng Josiah hun lai in, Hezekiah chapa, Amariah chapa, Gedaliah chapa, Kushi chapa Zephaniah kiang in Lalpa‘n zia gual hin thu a hun gen a:

² Lei chung ah kipat in thil zosia sumangthai sik sek ding ka hi, Lalpa‘n a tii.

³ Mihing leh ganhing zosia, sumangthai ding ka hi; chunglêng vachate leh, tuisuagiat ah sangate tawh sumangthai ding ka hi. Mi nunsiate kipalsak ing ka tin, lei chung ah kipat in mihing cha sumangthai ding ka hi, Lalpa‘n a tii.

⁴ Judai gam leh Jerusalem ah chêng zosia do in ka khut thadok ing ka tin; zia kipat hin Baal um nalaite, milim ho’na thiampute zosia leh,

⁵ Inchung ah kipat aksi honte ho ah; Lalpa ho ah kitiam ah, Milkom pathian ah le kitiam ah,

⁶ Lalpa zuina pat kinungheite Lalpa hawl talo ah, ama kansui talote zosia chu, sumangthai ding ka hi.

⁷ Lalpa Pathian âng ah thipbek in um tau in! Lalpa ni la a nai ta’ngal a; Lalpa‘n la kithoina bawl zo in, a mi chialte a suthiangtho zo ta’ngal a.

⁸ Lalpa kithoina ni chun lengpa chate leh a miliante leh, gamdang nîk leh puan ah kichei zosiate chu gawt ing ka.

⁹ Zia ni chun, buphual chopkân ah, huhamna leh thepna a pu In hi’dim zosiate chu gawt ding ka hi.

¹⁰ Zia ni chuleh Sanga Kotpi ah kipat in kâ thawm, In dan Sungnung ah pat mau thawm leh, tâng lam ah kipat thawmgi nasa tak chu het in um in a, Lalpa‘n a tii.

¹¹ Sumkawlveite zosia a manthai tâk ziak un, nanghaw sum mun ah umte haw, thûm tau in; dangka te’dok mite zosia pai thâk a hitau hi.

¹² Ziaphat chuleh, thaumei chawi in Jerusalem hawl ing ka tin, amau kimuang ah, a lungthim ua: “Lalpa‘n thilpha bawl pua’n tin, thil sia le bawl diak pua’n a,” ti zosia chu gawt ding ka hi.

¹³ A hausaknau chu suam in um intin, a Inteu chule a hawm ah nutsia hung hi’n a. Inte sa maleu, chênna’n nei diak pua’n tiu in; grepte phu maleu, a grep phuteu tui chu dawn diak pua’n au.

Lalpa Ni Lopi tak

¹⁴ Lalpa ni lopi tak chu a nai tai, a nai in, a hung tung ziang dingin a kin hi; Lalpa ni husa chu a tizat um in, gâlhatte le beidong in kap jak ta’n au.

¹⁵ Zia ni chu thangtawmna ni hi’ntin, lungjinna ni leh beidon ni, siatna leh pûksiat ni, thim ni leh lungthuai ni, sûmpi ji’n ni leh thim sâna ni,

¹⁶ gâlvênbûk sâng leh khawpi detdote do ding ah, pengkul mût ni leh gâldo thawmgit ni chu hi’n a.

¹⁷ Mitthum gual ah a vâk tua’na ding un, zia gual buaina chu a chung un tunsak ing ka tin; Lalpa chung ah thil a la hi’khial tâk ziak un, a thisan uh leivui gual ah butthâk ah um in, a sateu chule bawng êk gual ah the’jak in hung um ding ahi.

¹⁸ Lalpa lungnatna ni ah chun a dangkau leh, a sanau in amau chu hukdok thei pua’n tin; a lungnatna mei chun gam pumpi hi kâng tum ta’n a. Lei chung lua zosiate tawpna ni, huaisia tak chu tunsak ding ahi ngal a.