ZEKARIAH 9 - PATHIAN LEKHABU THIANGTHO (BSI)

Israelte Mêlmate Chung Ah Vaihawmna

¹ Lalpa‘n Hadrak a demna thu chu, Damaska chung ah kinga ding ahi. Israel nam zosia a chân gual in, Aram khawpi chu Lalpa â ahi ngâl a;

² a gam kigîtpi Hamath chule, pil maleu Tura leh Sidon le a huap hi.

³ Tura chun kulpi a kisiam ah, leivui gual khop in dangka a luak vum in, kotzing ah ki’dak gual khop in sana a la khawm hi.

⁴ Tu’hin vang, Lalpa‘n a nei zosiau lipthâk piak intin, a gothil zosiau chule tuisuagiat ah pai lut piak in, mei in hâl tum ta’n a.

⁵ Ashkelon in zia chu mu’n tin, lau in a; Gaza inle mu’n tin, lungngai in zawitha ta’n a; Ekron le a kinepna zosia vuaitha ta’n tin; Ashkelon ah kuama um talo in, Gaza ah kipat leng chule mangthai ta’n a.

⁶ Ashdod khua chun khual gam jauchate cheng intiu in; Philistiate chapona chu sumangthai ta’ng ka.

⁷ A kam ua kipat in a thisan uh leh, a ki’dak umnau a ha kâl ua kipat in lamang ing ka; amau chu I Pathian uh â ding ah a um nalai sunte hung hita’n au. Judah nam ah phung khat gual hi’n tiu in, Ekron chule Jebus mite gual hita’n au.

⁸ Ziaphat chuleh, ka In ah vêngtu gual in chêngden ta’ng ka tin; tichun, kuama’n a suk a to in pal ta pua’n au; a nuaisia dingin kuama hung ta pua’n au; tu’hin vang, keima mit ngei in ka mu ta’ngâl a.

Pathian Mite Chung Ah Vaihawm Dingpa Chu

⁹ Aw Zion chanu, nasa tak in lim in! Aw Jerusalem chanu, ngai tak in kiko in! En in, la lal chu a hung hi; gâl zotu leh hat chu ama ahi’n; kingaitawm tak in sabiltung chung ah, sabiltungno tuaidawng chung ngei ah chuang in a hung hi.

¹⁰ Ephraim ah kipat kângtalai leh, Jerusalem ah kipat kido’na sakol chu hi’mang in a; kidona thalngul chu hi’bong in, namtin kichamna ding thu pia’n a; a lenggam chu tuisuagiat langkhat ah kipat, langkhat lam tiang hi’ntin; Lui lian ah kipat, lei mong langkhat lam tawp tiang huap in a.

¹¹ Nangma â dinginle la kiang ah, thisan thuthung ka la siam tâk ziakin, tui umlona kawkhûk ah kipat in, la mi tângte chu hun thâ daw piak ing ka.

¹² Aw kinepna nei ah koltângte haw, la kulpi lam uh zuan kit tau in; a le’ni in hun tung ding kit ding ka hi ti, tu’ni ma ma hin ka puang ahi.

¹³ Judah chu kei â ding ah thalpi gual in, ka kai khûn ta’ngâl a; Ephraim chu a thalchang in ka mang tai. Aw Zion, la chapate choktho ing ka tin, aw Grikte haw, la chapateu hun dosak ing ka; tichun, mi gâlhatte chemjam gual in, hun leksak ding ka hi.

¹⁴ Ziaphat chuleh, a chung un Lalpa hung kilang ta’n tin, a thalchangte chu kawlphe gual in hung kikhawdok ta’n a. Lalpa Pathian chun pengkul mût in, mallam chîmpeite lak ah kipat in hung kijawtdok ta’n a.

¹⁵ Sepai honte Lalpa chun, amau humbit ta’n tin, amau in vaisuangse septe chu, tawden in val zo ngâl ding a hiu; a thisan uh belbu ah dim zu gual ah dawn in, mâichâm bul ah kileibua gual chu hi’n a.

¹⁶ Ziaphat chuleh, Lalpa a Pathian un hukdok ta’n a, amau chu a gan-gual mipite a hiziak un; lallukhuk ah suang mantam um gual in a gam uh chun vâk ta’n au.

¹⁷ Ama â dingin bang gual ah pha leh kilawm a hita maijen diam! Bu leh bâlte chun tangvalte a chok hal in, uain thakte chun nungakte a chok hal hi.