ZEKARIAH 7 - PATHIAN LEKHABU THIANGTHO (BSI)

Kiphatsak Anngawlna Dem

¹ Darius lal kum li’na, a tha kuana Chislev tha, a ni li ni chun, Zekariah kiang in Lalpa‘n thu a hun gen a:

² Bethel ah mite chun Sharezer tawh, Regem-melek tawh a mi teu chu Lalpa lemsakna dong ding leh,

³ sepai honte Lalpa In ah thiampute tawh jawlnei kiangah: “Tu’ma lam, kum tam tak ah kipat ka la hi’tâk sek gual ah khan, a tha nga tin ni hin lusûnna ka bawl ah; ne lo dawn lo ah um ding ka hia hem?” ti dong dingin a sawl ui.

⁴ Ziaphatchun, sepai honte Lalpa chun ka kiang in:

⁵ Gam sung ah mizosia leh thiampute kiang in: “Zia kum sawm sagi zet sung ah tha nga’na leh tha sagi’na ah an la ngawl ua, sûnna la bawl sek uh kha, keima â ding mawng ah anngawl la hiu ah a hem?

⁶ Chuleh, la nêk ua la dawn unle nangmau â ding bep ah ne leh dawn hilo la hiu em?

⁷ Jerusalem leh a kîmvêl ah khawpite chu lua dim ah, a vânglai ni leh simlam Negeb leh Shephelah phâiguamte mihing in a lua dim lai ah, jawlnei masate mang ah Lalpa‘n thu a la gente kha hilo a hem? ti’n gen in,” a tia.

Pathian Thupiak A Zuilo Ziak Ua Gawtna

⁸ Lalpa‘n Zekariah kiang in thu a hun gen a:

⁹ Sepai honte Lalpa‘n zia gual hin a gen hi: “Thudik in vaihawm unla, ja’ngaina leh lainatna’n kikhomtua chiat unla;

¹⁰ meithâi, nauchaga, malzin leh migentheite chu nuaisia kiu in; kuama’n la lungthim ziang unle la unauteu siatna ding ngaitua kiu in, a ti’n.

¹¹ Himaleh, a ngaisak nuam puau ah, a kiu uh a sang pawm ua, a hetlo’na ding un a bil uh a hûm tau a.

¹² Sepai honte Lalpa chun jawlnei masate mang ah, a thagau ah thu a vaithâk leh a dan thupiakte chu a ngaisaklo’na ding un, a lungthimteu chu a sutâk zo tau a. Ziaziakchun, sepai honte Lalpa lungnatna huaisia tak chu a hung tung tai.

¹³ Amau ka ko lai ah ei ngaisak lo gual un, ke’nle ei hun ko phat uh leh ngaisak lo ding ka hi, sepai honte Lalpa chun a tii;

¹⁴ chuleh, a mêlhet ngai lo namteu lak ah chun, chîmpei in a thejak gual in the’chek ka tin; tichun, a gam nutsiau chu gamthip suak ta’n tin; zia gam chu haw in kuama chia suk chia to le um ta pua’n au; tichun, gam nuam tak chu gamthip suak ta’n a,” a ti’n.