ZEKARIAH 6 - PATHIAN LEKHABU THIANGTHO (BSI)

Kilâkna Giatna: kângtalai Palite Chu

¹ Chun, ka et to kit leh, tâng pani kikâl ah sakol kângtalai pali hung kitawldok ka mu’n; zia tângte ni chu sum-eng ngen a hiu a.

² Kângtalai masa pen chu sakol san in a hun kai ua, kângtalai pani’na chu sakol vom in a hun kai un.

³ Kângtalai pathumna chu sakol kâng in a hun kai ua; chuleh, a pali’na chu sakol puangpawl in a kai ui.

⁴ Chuleh, ei kihopi vansawlchâk kiang ah chun, “Ka Lalpa, ziate hi bang etsakna a hiu em?” ti’n ka dong a.

⁵ Vansawlchâk chun, “Ziate hi van ah huipi pali lei chung pumpi Lalpa âng ah a vakilâk zaw phat ua leh van ah hui pali hung pawtdok dingte chu a hiu.

⁶ Sakol vom in a kai kângtalai chun mallam a zuan ah, sakol kâng chun tumlam a zuan in, sakolpuang chun simlam a zuan hi,” a ti’n.

⁷ Zia van lam sakolte chu a hung kipatdaw phat un, lei chung zosia chuan suak ah chia kâl ngakla in a kichok ziang tau a. Ama chun, “Chiau inla, lei chung zosia vachuan suak tau inle,” ti’n a sawl tai. Ziaphatchun, lei chung zosia a chuan suak tau a.

⁸ Tichun, ei hun ko ah, “Ngai in mallam ah chiate khan mallam gam ah chun ka thagau a chawldamsak tau hi,” ei hun tia.

A Bâk ah Lallukhuk Khuksakna

⁹ Lalpa‘n ka kiang in thu a hun gen a:

¹⁰ Babulon saltânna kipat hung pawtte: Heldai, Tobijah leh Jedaiahte ah kipat in dangka leh sana la khawm in; chuleh, zia ni ma ma ah chun Zephaniah chapa Josiah In ah chun lut ngal in.

¹¹ Sana leh dangka la lak khawmte chun lallukhuk khat siam inla, Jehozadak chapa thiampu lianpen Joshua chu khuksak inla,

¹² a kiang in: Sepai honte Lalpa chun zia gual hin a gen hi: Zia tak ah hin mi pakhat, a min a Bâk kiti a um hi; a umna mun ah chun hung seldok intin, Lalpa tempul ding hun sa ngal ding ahi ziakin.

¹³ Lalpa tempul hun sa ding chu ama ahi; leng leh lalte ja’na chang intin, a lalchutpha chung ah kichu’n vaihawm in a. A lalchutpha kiang ah chun thiampu’n umpi zing intin, a paniu in kilung gual tak in sêm khawm ta’n au.

¹⁴ Chuleh, Lalpa tempul ah hetzingna dingin lallukhuk chu, Zephaniah chapa Heldai leh Tobijah leh Jedaiah leh Joshiahte etkol dingin um ta’n a.

¹⁵ Gamla tak ah umte chu Lalpa tempul sakpi dingin hung in au; zia phat chuleh, sepai honte Lalpa chun la kiang un ei sawl ahi ti hechian ta’n lau. Lalpa la Pathian uh aw pha tak ah la ngaithâk uh chun, zia gual ah chun hung guitung ngei ngei ding ahi, a tii, ti’n gen in, a ti tai.