ZEKARIAH 11 - PATHIAN LEKHABU THIANGTHO (BSI)

¹ Aw Lebanon, la kot uh hong un; tichun, la sidar thing sângte chu, mei in a kât tum theina dingin!

² Aw nang châk thing, sidar thing a pûk tâk ziakin, thing lopi takte a pûk tâk ziak un kap in mau ta’n! Bashan ah sasaw thingte haw, gammâng thing phûk chai ah a um tâk ziakin kap in mau tau in!

³ Belampute lopina suam a hiziak ah, a kâ thawm uh chu ngai un! Jordan gammâng suksiat ahi tâk ziak ah, sakeibaknei kitum git chu ngai un!

Belampu Chinite Chu

⁴ Lalpa ka Pathian chun zia gual hin a gen hi: “Gan-gual thalup ding ah umte ching in pang in.

⁵ A chawte chun a that un, gawt in a um puau ah; a zuakte’n le ‘Lalpa chu pâk in um ta hen, ka hung hausa ta’ngal un,’ a tiu a; chuleh, a chingte nangawn inle a hepi puau hi.

⁶ Lei chung ah chêngte chu lainat ta pua’ng ka, Lalpa‘n a tii. Mitin a Invêngteu leh a lengpau khut in pûksak ing ka tin, a gam uh susia’n tiu in, a khut ua kipat in pakhat chale hukdok lo ding ka hi atii,” ti in.

⁷ Chutichun, belam thalup ding ah umte zuakpa thasâng in, belamchingtu in pang ing ka. Tiangpum pani ka la’n: khat chu, Doisakna ka sak ah, a dang khat chu, Kipumkhatna ka sak ah; zia gual ah chun gan-gual chu ka ching ta ahi.

⁸ Tha khat sung in belam ching pathumte chu ka naw mang ah, amau inle ei ningtel ziak un, amau chan ka ngâk zo puai.

⁹ Ziaphatchun, “Nanghaw ching in pang ta pua’ng ka, a thi thi chu thi hen la, a man leh le a man himai hen la, a hing nalai umsun te chule kinetua mai uh hen,” ka ti ta’n.

¹⁰ Ka tiang pakhat, “Doisakna” pen chu ka la’n, ka thiakbong a; tichun, mizosia kiang ah ka thuthung siam chu bangmalo in ka siam tai.

¹¹ Zia ni ma ma ah chun phel kit a hita’n; belam zuakte, ei la entha zingte chun zia thu chu Lalpa kamsuak ahi ti a hiau a.

¹² Chuleh, a kiang un, “Kilawm la sak ua leh ka tha man chu ei piau in; kilawm la sak lo ua leh ei piak dâ tau in,” ka ti’n. Tichun, ka law dingin dangka shekel sawmthum chu ei te’daw piak tau a.

¹³ Ziaphatchun, Lalpa‘n ka kiang in, “Ka man ding ah kilawm a sak jat uh chu thawlawm koina In ah chun sep lut ziang in,” ei ti’n. Chutichun, zia dangka shekel sawmthum chu ka la’n, Lalpa In ah thawlawm koina chun ka sep lut tai.

¹⁴ Ziaphatchun, ka tiang pakhat, Kipumkhatna kiti chule ka thiakbong ah, Judah leh Israel ki-unauna dan chu ka tham tai.

¹⁵ Ziaphatchun, Lalpa‘n ka kiang in: Belampu dukdak lo matchâk chu vala kit tiam in.

¹⁶ Zia gam ah hin belampu pakhat hun tung ding ing ka tin; ama chun a manthai ding uh khawksa pua’n tin, a jam mang le hawl pua’n tin, a meimale hi’dam pua’n tin, a hisel lole an pediak pua’n ah; ahi’n, a thau tuai mâmpha cha cha chu ne’n tin, a kengtin nasan uh âtphel piak in a.

¹⁷ Aw ka belampu dukdak lo, gan-gual jamsan ziangte haw! Chemjam in a khutbân leh a changlam mit sât kha hen la, a khut chu tantha kêi hen la, a changlam mitle thûm den ta hen! a ti tai.