ZEKARIAH 10 - PATHIAN LEKHABU THIANGTHO (BSI)

Judah Leh Israel Tundin Kitna

¹ Nipi kipat hun a hin, Lalpa kiang ah gawpi zu dingin don un, Lalpa chun thigawpi’n a sûmte a siam in, mitin â ding leh lohing chitin â ding ah, maljawlna gawtuite chu a piai.

² A Inkuan pathianteu chun thu man lo mai mai a gen sek un, âisânte chunle zuau thu bep a muu in; mangsânte’nle mang diklote gen in, a thamuanna thugen uh a thawn mai ahi. Ziaziakchun, mipite chu belam gual in a vak jak zo tau a; belamching ding tâksap ziakin a thuak gim zo tau hi.

³ Belampute chung ah chun ka lung a na ma ma a; tichun, a puituteu chu gawt ding ka hi; Lalpa‘n a gan-gual Judah Inkuante chu a khawtua ma ma ziakin, kidona sakol hat takte gual in hun siam ding ahi.

⁴ A lak ua kipat in suangphûm ding, a puan In hênna khuam ding, gâl do’na thalpi ding leh a vaihawm ding zosiau hung pawt in a.

⁵ A leng un kido’na gâlhat gual in, a mêlmateu kotzing buanthuak lak ah chuanchil in, gâldo jel ta’n au, Lalpa‘n a umpi ngâl a; tichun, sakol chungchuang mite chu, mualphosak ngei ngei ding a hiu.

⁶ Judah Inkuan mite suhat ing ka tin, Joseph Inkuan ah mite chu hukdok ing ka. Amau chu ka lainat ma ma ziakin, ka paithâk khâk ngai lo gual in puidok kit ing ka; kei Lalpa a Pathian uh ka hia, amau dawnhu ta ding ka hi’ngâl a.

⁷ Ziaphat chuleh, Ephraim mite chu, gâlhat tak gual ah um in, uain a dawn lai ua a lungthim uh, a kipak gual in kipak ta’n au. A chateu in zia chu mu’n, lim ma ma intiu in; Lalpa ah chun a lungthim uh kipak ma ma ta’n au.

⁸ Amau hun ko in, pui khawm ing ka; amau ka hukdawsa ahi ngâl un, tu’ma lam ah a tam lai gual un, tam tak hung hi kit ta’n au.

⁹ Gamdangte lak ah thejak in, gamla tak ah um maleu, ei hun hezing intiu in, a chateu tawh a leng un hung kile’kit ta’n au.

¹⁰ Aigupta gam ah kipat in a In lam uh, pui tung kit ing ka tin, Assuria gam ah kipat in pui khawm ing ka; Gilead gam leh Lebanon munte’n, a dawl lo ding khop un hun pui khawm ding ka hi.

¹¹ Lungngaina tuisuagiat chu pal gâl kâi intiu in, a tuisuagiat kinawkte chu vaw niam intiu in, Nail luipi tuili thûk te chule kang tan in a. Assuria kiletsakna chu hi’niam hi’ntin, Aigupta lal tiang chunle nusia ta’n a.

¹² Lalpa ah chun hi’hat ing ka tin; tichun, ama min ziak ah chun chia tawl tawl ta’n au, Lalpa‘n a tii.