VAIHAWMTE 6 - PATHIAN LEKHABU THIANGTHO (BSI)

Gideon Vaihawmna

¹ Israelte’n Lalpa mit mu ah thilphalo a bawl kit tau a; tichun, Lalpa‘n Midiante khut in kum sagi sung a pedok tai.

² Midiante’n Israelte chu a soisa tau ah; Midiante a lau ziak un Israelte chu mual ah te, kawlhawm ah te kisêlna ding siam in a kisêl tau a.

³ Israelte thâi chîng ding ah a va pawt daw si’n ua leh, Midiante leh Amalekte leh sualam gam ah mite’n a hung do jel un.

⁴ Israelte do dingin a kikul sek un, Gaza khua tiang hial in, Israel gam ah nêk ding, thâi leh gancha belam, bawng leh sabiltung natiang in a hawi ta puau a.

⁵ Amau leh a gancha honteu tawh, a puanbûkteu tawh, khaubepi hon bang hial in a hung kuan to tau a; amau leh a sangawngsauteu chu simsên ding gual ahi puau ah; a gam susia ding mawng ah hung kuan a hiu a.

⁶ Tichun, Midiante ziakin Israelte chu a genthei ma ma tau ah; ziaphatchun, Israelte’n amau panpi dingin Lalpa a ko tau hi.

⁷ Midiante sukgenthei ziak ah Israelte’n Lalpa a ko phat un,

⁸ Lalpa‘n Israelte kiang ah jawlnei pakhat a sawl ah; ama chun a kiang un: “Lalpa, Israelte Pathian in hiti hin a gen hi: Aigupta gam ah suak leh sal tânna lak ah kipat in ka hun puidok a;

⁹ Aiguptate khut ah kipat leh, nanghaw hun sugentheite khut ah kipat in ka hun hukdok ah, amau chu la âng ua nawdok piak in, a gam uh nanghaw ka hun pia tai;

¹⁰ chuleh, la kiang un, ‘Kei hi Lalpa la Pathian uh chu ka hi; la chênnau gam ah Amorte pathian haw hi la jalo ding uh ahi,’ ti’n ka la gen ta’n. Himaleh, ka thugen la ngaisak puau hi, a ti a hi,” a hung ti ta’n.

¹¹ Ziaphatchun, Joash chapa Gideon chu Midiante mu lo ding ah kisêl, grep sûkna khuk ah gehu bu vaw lai kiang ah chun, Lalpa van sawlchâk chu a hung ah, Ophrah mun ah gangpi bulnuai in a kichu ta’n; zia mun chu Abiezarte Inkuan ah mi Joash gam ahi.

¹² Lalpa vansawlchâk chu hung kilâk in, a kiang in: “Nang, mihat leh gâldo hangsan, Lalpa‘n a hun umpi hi,” a tia.

¹³ Gideon in, “He pu, Lalpa‘n ei umpi ahi ngâl leh, bang ding ah zia gual thilte hi ka chung ua tung thei a hem? Chuleh, ka pu leh pateu in ei gen sek uh, a thilmak bawlte chu khoi ah um ahi ta, ‘Aigupta gam ah kipat in Lalpa‘n ei puidok hilo a hem?’ a tiu kha. Tu’hin la, Lalpa‘n kei uh ei pâmpai ta’n, Midiante khut in ei pia ta ngâl ah,” ti’n a dawnhu a.

¹⁴ Ziaphatchun, Lalpa‘n ama chu a en ah, a kiang in, “La thahât lai hin chia inla, Israelte chu Midiante khut ah kipat in va hukdok ta’n; keima’n ka hun sawl la hi,” a hun tia.

¹⁵ Ama’n, “Aw Lalpa, kei pen tak hin Israelte bangti’n hukdok thei ding ka hem? Manasseh phung lak ah a jawngkhal pen ka hi’n; chuleh, ka Inkuan lak ua le a neupen ka hi nalai ah,” ti’n a dawnhu a.

¹⁶ Lalpa‘n a kiang in, “Himaleh, hun umpi ing ka tin, Midiante chu a leng un that zo ding la hi,” a tia.

¹⁷ Ziaphatchun, ama’nle, “La mit mu ah doisakna chang ka hi chun, ka kiang ah thugen hi nangma la hi tak tak nai ti ka hetchian theina dingin tepte’na khat ei musak in.

¹⁸ La kiang ah thilpiak ding vala, ka hung kit ah, la âng ah ka lui masia chu ei la nusia kin,” a tia. Ama’nle, “La hung kit masia a la um zing ing ka,” ti’n a dawnhu tai.

¹⁹ Tichun, Gideon chu in ah valut In kelno khat a vathat ah, chângbuangnêl Ephah khat in thawipanglo vaithum a vasiam ah; sa chu bawm sung in a koi ah, nêkthei dang cheng chu bêl sung ah koi in, gangpi bul lam ah a kiang in a hun pua, a pia tai.

²⁰ Pathian vansawlchâk chun a kiang in, “Sa tawh thawipanglo vaithumte chu la’n la, zia suangpi chung ah hin koikhawm inla, chuleh nêkthei dang cheng chu hun sungtha’n,” a tia. Zia gual chun ama’nle a bawl tai.

²¹ Ziaphatchun, Lalpa vansawlchâk chun a khut ah a choi lai tiangkhut mong ah chun, sa tawh thawipanglo vaithumte chu a vak khoi ah; chuleh, suangpi kipat mei a hung kuangdok ah, sa tawh thawipanglo vaithumte chu a hun kângtum ta’n; chuleh, vansawlchâk chu a mit mu ah kipat in a mang tai.

²² Ziaphatchun, Gideon in Lalpa vansawlchâk ahi ti a hun hechian ta’n; chuleh, Gideon in, “Ei panpi in, Lalpa Pathian! Lalpa vansawlchâk tawh kimâitua ah kimu ka hi’ngâl ah,” a tia.

²³ Himaleh, Lalpa‘n a kiang in, “Lungmuang tak in um in; lau kin, thi’lo ding la hi,” a tia.

²⁴ Ziaphatchun, Gideon in Lalpa â dingin zia tak ah chun mâichâm a siam ah, a min in, Jehovah-shalom a sak tai. Tu’ni tiang in zia chu Abiezar Inkuante gam ah Ophrah mun ah chun a um nalai hi.

²⁵ Zia jan ah chun Lalpa‘n a kiang in, “La pa bawngchal khat tawh a dang khat, kum sagi ah upa hun la’n la, la pa Baal mâichâm bawl kha phia’n la, a kiang ah dawikhuamte chule phûk in;

²⁶ chuleh, zia kul chung ah hin Lalpa la Pathian â dingin mâichâm khat, a hi’ding dan tak in siam in; chun dawikhuam la phûk ding chu a thing ah mang in, la bawngchal pani’na zawk kha hâlmang kithoina dingin pia’n,” a hun ti ta’n.

²⁷ Tichun, Gideon in a suakte mi sawmkhat a pui ah, Lalpa‘n a hil gual tak ah chun a bawl ta’n; ahi’n la, a chanaute leh a khua sung ah mite a lau bêk ziakin, sûn ah bawl ngam lo in, jan in a bawl tai.

Gideon In Baal mâichâm A Khetchimna

²⁸ Jingkal ma tak ah khua sung mite a hung thawdok phat un, Baal ho’na mâichâm kiphia, dawikhuam kiphu leh mâichâm kisiam chung ah bawngchal a pani’na a la kilân chu a mu tau a.

²⁹ Tichun, “Zia hi kua bawl a hem?” ti’n a kidongtua sau sau ziang tau a. Kidongtua zing kawm ah a hawl lai un, “Joash chapa Gideon bawl ahi,” ti a hil tau a.

³⁰ Ziaphatchun, khua sung ah mipite chun Joash kiang in, “La chapa hun puidok in, Baal mâichâm susia, a dawikhuam phûk ziakin thalup ding ahi,” a tiu a.

³¹ Himaleh, Joash in ama hung bulu’te kiang ah chun, “Baal panpi ding la hiu maw? Baal hûk ah panpi ding la hiu em? Baal panpi taphot chu jingkal leh tha gam ding a hiu. Baal chu Pathian hileh, a mâichâm min phetha ta, ama leh ama kihûk leh hi ding a pom,” ti’n a la dawnhu a.

³² Ziaziakchun, zia ni kipat chun Gideon chu a min in Jerubbaal sak ahi tai; ama’n Baal mâichâm a phiat thâk ziakin, “Baal in ama chung ah phuba la ta hen,” a ti ziak uh ahi.

³³ Ziaphatchun, Midiante zosia leh Amalekte zosia leh Sualam gam ah mite zosia hung khawm in, Jordan lui hung gâl kâi in, Jezreel phâicham in a kikul tau a.

³⁴ Himaleh, Lalpa thagau in Gideon chu a thuam ta’n; tichun, pengkul a mût ah, Abiezar phung ah mite chu a nungzui dingin a ko khawm tai.

³⁵ Manasseh phung ah mite zosia le ama zui ding ah ko khawm dingin thangko a sawl ah. Chun, Asherte, Zebulunte leh Naphtalite ko dinginle thangko a sawl ah; tichun, amau tawh kituak dingin a chiato tau hi.

³⁶ Ziaphatchun, Gideon in Pathian kiang in, “Ka kiang ah la gen gual tak ah Israelte chu ka khut ah hukdok ding la hi ngei hi ti ka hetchian theina dingin,

³⁷ phualjawl ah belam mul vakoi ding ka hi’n; chuleh, belam mul chung bep ah daitui kiak ah, a kîmvêl lei tual a la hul chun, la gen gual ngei ah ka khut ah Israelte hukdok ding la hi ti hethei ding ka hi,” a tia.

³⁸ Zia gual chet chun a hung um ta’n. Jingkal matak in a tho ah, belam mul chu a hêk leh, belam mul ah daitui chu kuangkûm khat dim sêt a hekdok a.

³⁹ Ziaphatchun, Gideon in Pathian kiang in, “Thu khat bep hun gen kit ing ka tin, ka chung ah lungna ziang kin; lungsiat tak in belam mul ah patepna pakhat bep ei etsak kit in; tu’chung ah hin belam mul chu hul sak inla, a kîmvêl ah lei tual chu daitui kiaksak in,” a tia.

⁴⁰ Zia jan ah chun Pathian in zia gual ah chun a hun bawl ah. Belam mul bep chu a hul ah, lei tual dang cheng chu daitui in a a chêk suak tai.