VAIHAWMTE 4 - PATHIAN LEKHABU THIANGTHO (BSI)

Deborah Leh Barak Vaihawmna

¹ Ehud thi’nung in Israelte’n Lalpa mit mu ah thil phalo tak a bawl kit tau a.

² Tichun, Lalpa‘n amau chu Hazor ah vaihawmpa, Kanaante lengpa Jabin khut in a pia tai; a sepai hotu lianpen chu Harosheth-ha-goiim ah chêng Sisera ahi.

³ Ama chun thik sakol kângtalai za kua a nei ziakin, Israelte chu kum sawmni hial genthei tak in a taw den ta’n; ziaphatchun, Israelte Lalpa panpi’na don in a kiko tau hi.

⁴ Zia hun ah chun Lapidoth ji Deborah kiti, numei jawlnei chu Israelte lak ah vaihawm in a pang a.

⁵ Ama chu Ephraim tâng gam ah Ramah khua tawh Bethel kikâl ah, Deborah tûm thing bul nuai in a kichu sek a; Israelte chu ama vaihawm piak dingin a kiang in a hung sek ua.

⁶ Ama chun Naphtali gam ah Kedesh mun ah chêng, Abinoam chapa Barak ko dingin mi a sawl ah, a kiang in, “Lalpa, Israelte Pathian in hiti hin thu a hun pia’i: ‘Chia inla, Naphtali leh Zebulun phung te ni ah kipat mi sîng khat ko khawm in, Tabor tâng ah vapang un,

⁷ keima’n Jabin sepai hotu Sisera chu a kângtalaite tawh a sepai zosia tawh, Kishon guam ah nang hun do sak ding ka hi; ama chu la khut ah hun pia ding ka hi,’ a ti ahi,” ti’n a vagensak tai.

⁸ Barak in, “Lei zui ding leh chia ing ka tin; lei zui lo ding leh vang chia pua’ng ka,” ti’n a dawnhu ta’n.

⁹ Chun, Deborah in, “Hun zui ma ma ing ka; ahi’n la, la chiana lampi chu nang minphatna hi talo ding ahi, Lalpa‘n Sisera chu numei khut ah ei pia ding ahi tâk ziakin,” ti’n a dawnhu ah. Ziaphatchun, Deborah a kipan ah, Barak tawh Kedesh lam in a chia tau a.

¹⁰ Barak in Naphtali leh Zebulun phungte chu Kedesh mun in a ko khawm ta’n; chuleh, gâlhangsan mi sîng khat in a zui tau ah; chuleh, Deborah inle a zui pek tai.

¹¹ Zia hun ah chun, Kent mi Heber kiti, Mosi talpupa Hobab suante lak ah mi chu, Kent mite lak ma ma ah kipat nawkdok in, Kedesh kiangchin ah Elon-bezaa-nannim mun ah puanbûk a la suang ta’n.

Sisera Thi’na Thu

¹² Chun, Sisera kiang in, Abinoam chapa Barak chu Tabor tâng in a chia to tai ti a hil phat un,

¹³ Sisera inle a sakol kângtalai zosia thik kângtalai za kua chu tawh, a kiang ah sepai um zosia chu Harosheth-ha-goiim ah kipat in Kishon guam chan in a kuan tau a.

¹⁴ Ziaphatchun, Deborah in Barak kiang in, “Kipan in! Sisera chu la khut ah Lalpa‘n a hun piakna ding chu tu’ni ahi tai. La ma-âng ah Lalpa a chia ta ei vei,” a tia. Tichun, Tabor tâng ah kipat in Barak chu gâlhangsan mi sîng khat tawh a hung kiton suk tau a.

¹⁵ Chun, Lalpa‘n Sisera leh a sakol kângtalai zosia leh a sepai zosia chu Barak ma-âng in a patausak ta’n; Sisera le a kângtalai ah kipat kumtha’n, a keng in a tai mang tai.

¹⁶ Barak in kângtalai leh sepaite chu Harosheth-ha-goiim tiang in a vadel zui ah. Sisera sepai zosia chu chemjam âng in a puk zo tau ah; a suakcha khat chale a um puau hi.

¹⁷ Sisera chu a keng ah chia in, Kent mi Heber ji, Jael puanbûk lam in a jam mang ta; Hazor lengpa Jabin tawh, Kent mi Heber Inkuan a kihothei ziak uh ahi.

¹⁸ Jael chu Sisera lamtua dingin a pawtdok ah; a kiang ah chun, “Hung kichawl dam in lalpa, ka kiang ah hin hung kichawl inla, bangma lau kin,” a tia. Tichun, a kiang ah chawldam dingin a puanbûk sung in a lut ta’n; ama’nle puan khat a silsak tai.

¹⁹ Chuleh, numei kiang ah chun, “Dawn ding tui neukhat ei hun pe tia, ka dang a châk na e!” ti’n a don ah. Tichun, bawngnawi thawl a hong vak ah, dawn ding a pia, puansil chu a khu’khum kit tai.

²⁰ Numei kiang ah chun, “Puanbûk kotbul ah chun ding zing inla, kua hileh a hung ah, la kiang ah, ‘In sung ah mi a um em?’ tia hung dong a um ua leh, ‘A um puai,’ a la ti ziang in,” ti’n a gen a.

²¹ Himaleh, Heber ji Jael chun puanbûk hênna thikzum tawh sek pakhat a la’n, awl cha’n a zuan ah, Sisera chu tha chawl ma ma ah tui tak ah ipmu ahiziak in, a ngeibiang chu tual tawh a kilden ta’n tichun, a thi tai.

²² Ziaphatchun, Sisera del ah hung Barak chu tuak dingin Jael a hung pawtdok ah, a kiang in, “Hung in, la mi hawlpa chu hun kawkmu ing ka,” a tia. Tichun, amanu puanbûk sung ah chun a lût ah; zia tak ah chun Sisera puanbûk hênna thikzum ah lei tual tawh a ngeibiang kikilden ah a thisa’ kizam chu a va mu tai.

²³ Tichun, zia ni chun Pathian in Kanaan mite lengpa, Jabin chu Israelte khut in a pia tai.

²⁴ Kanaan lengpa Jabin chu a thalup hial masiau, Israelte khut chu Kanaan lengpa Jabin khut in a hi’hat deu deu tai.