VAIHAWMTE 20 - PATHIAN LEKHABU THIANGTHO (BSI)

Benjaminte A Do’nau

¹ Ziaphatchun, Israelte zosia Dan ah kipat Beer-sheba leh Gilgal gam tiang in a hung kuandok tau ah; mipi pungkhawmte chu kithu gual tak in Mizpah mun ah Lalpa ma-âng in a kikhawm tau a.

² Israel mipi zosia lak ah kipat a milian a milal zosiau chu amau taksa ngei ah hung in, Pathian mite kikhopna chun a hung pang tau ah, keng sepai gâlvan chawite chu nuai li a phau a.

³ (Tu’hin, Benjamin phung ah mite chun Israelte zosia Mizpah mun ah a kikhawm ui ti a he tau a.) Chun, Israelte chun a kiang un, “Bangtidan ah zia gual ah tualtha’na hi hung um ziang thei ahi em ei gen un?” ti’n a dong tau a.

⁴ Levi mi a kithatnu pawsal chun a hun dawnhu a: “Ka thâikêmnu hi tawh jan ah giak dingin Benjaminte gam ah Gibeah khua chun ka vatung un,

⁵ Gibeah khua mite ei cho in a hung un, ka giaknau In ah jan ah ei hung ûm tau a. Thalup ei gaw tau ah; tichun, ka thâikêmnu hi a sual lum tau hi.

⁶ Tichun, ka thâikêmnu luang chu ka pua, a bat bat ah âtnel in, zia chu Israelte chênna gam zosia’n ka thot tai; amau in Israelte lak ah thil tizat um leh ngolhuai tak a la bawl ta ngâl un.

⁷ Ziaziakchun, nang uh Israelte zosia’n ngaitua unla, pha lasak dan uh gen khawm un,” a tia.

⁸ Mipi zosia chu mi pakhat gual mai in, thakhat in a dingdok ua, a leng un, “Kuama a puanbûk lam ua chiakit lo ding, kuama In lam ah chia kit le I um lo ding uh ahi.

⁹ Himaleh, ei un Gibeahte zia gual hin I bawl diu ahi: âisân hi tiu in, amau do ding ah I kuan to ding uh ahi.

¹⁰ Benjamin gam ah Gibeah khua mite’n zia tawhbang thil ngolhuai leh kidak um, Israelte chung ah a bawl uh phuba la ding ah kuante nêk leh châk ngaitua dingin, mi za khat lak ah sawmkhat, sang khat lakah za khat, sîng khat lak ah sang khat I guatdok ding uh ahi,” a tiu a.

¹¹ Tichun, Israel mipi zosia chu, zia khawpi do ding ah chun, mi khat gual mai ah kithutuak in a pung khawm tau hi.

¹² Israelte chun Benjamin phung ah mite zosia kiang ah zia gual ah thu vagen dingin mi a sawl tau a: “Zia gual ah tualtha’na huaisia la bawl mai uh hi bang ti dan a hem?

¹³ Tu’hin, Gibeah khua zia gual ah thil phalo bawlte chu ei pedok un, Israelte lak ah thil phalo chu sukthian a hitheina dingin ka thalup ding uh ahi,” a vatiu a. Himaleh, Benjamin phung ah mite chun a chanauteu Israelte thugen chu a ngaisak puau a.

¹⁴ Benjamin phung ah mite, Gibeah khua kipung khawm in, Israelte do dingin a kuandok tau hi.

¹⁵ Zia ni chun Benjamin phung ah mite, Gibeah khawpi ah chêng sim lo in sîng ni leh sang guk a pung khawm un.

¹⁶ Zia cheng lak ah kipat chun, veilong ngen, vaisuangse thiam samzang ziang le khial lo ah sep kha thei mi za sagi a teldok kit ua.

¹⁷ Chun, Benjamin phung simkhawm lo in Israelte gâlvan ah kithuam ngen chu mi nuai li a hiu a.

¹⁸ Chun, Israelte chu a kipandok ua, Bethel ah Pathian kiang ah, “Benjaminte do dingin kua phung pen hi ka kuan masa diam uh?” ti dong dingin a chiau a. Lalpa‘n, “Judah phung ah mite kuan masau hen,” ti’n a hun dawnhu tai.

¹⁹ Tichun, Israelte chu jingkal in a thodok ua, Gibeah do dingin a va kikul tau a.

²⁰ Israelte chu Benjaminte do dingin a kuandok tau a; tichun, Israelte’n Gibeah do dingin panmun a khual tau.

²¹ Benjamin phung ah mite chu Gibeah ah kipat in a hung kuandok ua, zia nikhua chun Israelte chu sîng ni leh sang ni hial a that tau a.

²² Israelte chu a chia to un, sun nitum in Lalpa âng ah chun a kap tau ah; chuleh, “Ka chanauteu Benjaminte do ah kipan kit ding ka hiu em?” ti’n Lalpa a dong kit tau a. Tichun, Lalpa‘n, “Vado kit un,” ti’n a hun dawnhu a.

²³ Israelte chu kitîlhangsan kit in, ni masa ah gâldo ding ah a pannau mun ma ah khan a hung kitiang kit tau a.

²⁴ Tichun, Israelte chu Benjaminte do dingin, a ni ni na chun a hung kuan kit tau hi.

²⁵ Benjaminte chule amau do dingin Gibeah khua kipat in, a ni ni na chun a hung kuandok kit tau a; chuleh, Israelte gâlvan chawi ngen mi sîng khat leh sang giat a that tau hi.

²⁶ Ziaphatchun, Israel mipi zosia tawh sepai zosia chu Bethel ah chia kit in, Lalpa âng ah kitung ah kap in, nitâk lam tiang in an a ngawl tau a. Chuleh, Lalpa âng ah hâlmang thillat leh kichamna kithoina thillatte a lân tau a.

²⁷ Tichun, Israelte’n Lalpa a dong tau ah, (zia hun ah chun Pathian thuthung thingkuang chu zia mun ah chun a um a;

²⁸ Aron chapa Eleazar chapa Phinehas chu thiampu a pan lai tak ahi;) “Ka chanauteu Benjaminte do ding ah kuan kit nalai ding ka hiu em; ahiloleh, haisan mai ding ka hitau em?” a tiu ah. Ziaphat chun Lalpa‘n, “Do kit un, jing leh amau chu la khut un hun pia ding ka hi tai,” ti’n a hun dawnhu a.

²⁹ Tichun, Gibeah khua kîmvêl ah chun a chânggu dingin mi a koi tau a.

³⁰ Israelte chu Benjaminte do dingin a nithum ni chunle a kuan to tau a; tu’ma a la bawl gual tho uh khan Gibeah khua do dingin a kitiang kit tau a.

³¹ Benjaminte chu amau do ding ah a hung kuandok phat un, khawpi’ kipat in a hung pawtdok tau a. Hun masa a la bawl gual tho uh khan sepaite chu a hun do tau a; Bethel zawtna leh Gibeah zawtna lamlian vel leh gamlak ah te chun Israelte sawmthum lam a that kit tau hi.

³² Benjaminte chun, “Tu’ ma gual tho ah khan I zawthiansau ahi tau,” ti’n a ngaituau a. Himaleh, Israelte chun, “Tai hitiu in, amau haw chu khawpi kipat kidel dawsak phot in, lamlian ah jawldok phot hitiu,” a tiu a.

³³ Israel sepai a tamzawte chun, Baal-tamar ah a la do dingin a la chângpang tau a, Geba tumlam ah a chânggu pawl chule a umna chiat ua kipat in a hung pawtdok tau a.

³⁴ Chun, Gibeah khua do ding ah Israelte zosia lak ah kipat mi sîng khat kitêldokte chun a hun do tau ah, kido’na chu a nasa ma ma ah. Himaleh, Benjaminte chun a chung ua siatna hung tung ding chu a he him him puau hi.

³⁵ Benjaminte chu Israelte âng in Lalpa‘n a gual lelsak ta’n; tichun, zia ni bep ah chun Israelte’n Benjaminte gâlvan ah kithuam ngen mi sîng ni sang nga leh za khat a that tau hi.

³⁶ Ziaphatchun, Benjaminte’n guallel a hitau ti a hung kihedok tau ah. Israelte’n Gibeah khua ûm ah changgute chu a muan ziak un, Benjaminte chu a awng awt tau a.

³⁷ Gibeah khua chânggute chun kin tak in a hun del tau a. Tichun, khua sung ah mi zosia chu chemjam in a that gam tau a.

³⁸ Israel sepai a paw lam ah pangte tawh a chânggute’n kitiamna khat a nei uh chu, khawpi mei ah hâlkuangna meikhu a mu phât ua leh,

³⁹ a pawlam ah Israel sepaite chun a hun le’do ding uh ti ahi. Himaleh, Benjaminte chun Israelte a hun do masak ziak un mi sawmthum vel a that man tau a; tichun, amau in, “Kido’na masa gual khan, I zawu a hitau hi,” ti’n a ngaituau a.

⁴⁰ Himaleh, khawpi kihâlna meikhu lom a hung kitun to phatin, Benjaminte chu kinung hei in a en tau a, khawpi hâlna kuang meikhu chu van lam in a kitung to tai!

⁴¹ Israel sepai honte a hung kinung hei phat un, a chung un siatna hung tung ahi tai ti a het ziak un, Benjaminte chu a lungthuai tau hi.

⁴² Ziaziakchun, Israelte ah kipat tai mang in, gamthip lam a del tau ah; himaleh, khawpi sunglam ah kipat hung pawtdokte chun a hun lap tak ziak un a that gam tau hi.

⁴³ Benjaminte chu a ûm chimit in, Nohah ah kipat in a del zui pek ua, Gibeah sualam tiang in a chilnât in,

⁴⁴ Benjaminte lak ah mihangsan ngen sîng khat leh sang giat a that tau a.

⁴⁵ Gamthip lam ah Rimmon kawlbûk a hun del phat un, lamlian ah chun mi sang nga lam a that malam kit ua; tichun, Gidom tiang in a del zui pek ua, sang ni a tha bê nalai ui.

⁴⁶ Chutichun, zia ni sung ah chun Benjaminte sepai hangsan leh hat, gâlvan ah kithuam ngen sîng ni leh sang nga a that tau a.

⁴⁷ Himaleh, gamthip lam ah Rimmon kawlbûk bêl dingin mi za guk a jamdok tau ah; tichun, Rimmon kawlbûk ah chun tha li zet a vakisêl tau hi.

⁴⁸ Zia hun sung ma ma chun, Israelte’n Benjaminte do in a kihei kit tau ah; tichun, khawpi ah mihing um zosia, gancha zosia leh a mai phâk taphot uh chemjam in a satchap zo tau ah. Khawpi sung ah um nalai zosia le a hâl tum zo tau hi.