VAIHAWMTE 2 - PATHIAN LEKHABU THIANGTHO (BSI)

Israelte Thumatlona Ziak Ah Vauhilna

¹ Gilgal ah kipat in Lalpa vansawlchâk pakhat Bokim ah hung tung to in, a kiang un, “La pu leh pateu kiang ah ka la kitiamna gam ah ka hun pui lût theina dingin, Aigupta gam ah kipat in ka hun puidok ta’n; a kiang un, ‘La kiang ua ka thutiam chu thul pua’ng ka tin,

² nang unle zia gam ah a la chêngsate hi tawh kichamna la siam lo ding uh ahi; a mâichâmte uh la phiat thâk diu ahi,’ a tia. Ahi’n la, ka thupiak la zui puau hi. Bang a hem la bawl uh en tiam un!

³ Ziaziakchun, kenle amau chu hun nawdok piak pua’ng ka tin, amau chu nang uh a dingin mêlma hita’n tiu in, a pathianteu chule la kipalna ding uh thâng hizing ta’n ah,” a tia.

⁴ Lalpa vansawlchâk in zia thute chu Israelte zosia kiang ah a gen zaw phatin, mipite chu aw ngai tak in, a kap tau a.

⁵ Ziaziakchun, zia mun chu Bokim a sak tau ah; chuleh, zia mun ah chun Lalpa kiang ah kithoina a bawl tau hi.

Joshua Thi’na

⁶ Joshua’n mipite chu a pelsak zaw phatin, Israelte zosia chu amau gochanna gam chiat lua dingin a chia tau a.

⁷ Mipi zosia chun, Joshua dam sung leh Joshua sâng ah upa zaw, Israelte â ding ah Lalpa‘n thil a bawl piak lopi tak tak te a la musa zosia dam sung in Lalpa na chu a sêm chiat tau hi.

⁸ Nun chapa Joshua, Lalpa suakpa chu kum za khat leh sawmkhat a ti’n in a thi tai.

⁹ Tichun, ama chu Gaash tâng mallam kâi, Ephraim tânggam ah, ama go channa gam sung Timnath-heres mun in a vui tau hi.

¹⁰ Chuleh, zia khang ah mite zosia chu a thizo tau ah, amau nung in Lalpa he’phalo leh Israelte â ding ah thil a la bawl piakhaw he’phalo khangthak a hung dingdok tau hi.

Israelte Ginumlona

¹¹ Ziaphatchun, Israelte’n Baal hun ho in, Lalpa mit mu ah thil phalo tak a hun bawl tau a;

¹² Aigupta gam ah kipat a pu leh pateu a la puidokpa a Pathian uh, Lalpa chu a jamsan tau ah; tichun, pathian dang, a kiang ua chêngte pathian haw chu zui in, ziate chu a ho tau a; tichun, Lalpa chu a cho lungna tau hi.

¹³ Lalpa chu jamsan in, Baal leh Astartes chu a ho zaw tau a.

¹⁴ Tichun, Lalpa chu Israelte chung ah a lungna, amau chu mi suamte suam dingin a pedok ta’n; chuleh, a kîmvêl ua um, a mêlmateu khut ah a zokdaw tâk ziakin, a gâlteu âng in a pang thei ta puau a.

¹⁵ Lalpa‘n a la gensa gual leh a kiang ua a la kitiamna dungzui in, gâldo ah a chianau taphot in amau chung ah thil phalo a tunna ding ah Lalpa khut chu a hung kilap tâk ziakin, a buai ta ma mau hi.

Pathian in Amau Hukdok Ding A Sawl piak

¹⁶ Ziaphatchun, Lalpa‘n a lak ua vaihawm dingte hun tungdok in, amau suamte thunuai ah kipat in a hukdok tau a.

¹⁷ Ahi’n la, a vaihawmteu thu nasan a ngaisak nuam ta puau ah; pathian dang a lunggul zawk ziak un, ziate chu chibai a buksan zaw tau hi. A pu leh pateu in Lalpa thupiak zui ah a chianau lampi chu a kiheimangsan tau ah; a sulnung uh chu a zui ta puau hi.

¹⁸ A lak ua vaihawm ding Lalpa‘n a tundok phat si’n leh, Lalpa‘n zia vaihawm dingte chu a umpi zing ah; tichun, zia vaihawmte dam sung sia chu a mêlmateu khut ah kipat in a hukdok sek hi; amau tawden ah sugentheite nuai ah a thûmnau Lalpa‘n a khawksak sek ziakin.

¹⁹ Himaleh, a vaihawmteu thi zaw si’n leh a puk kit ua, a pu leh pateu sâng ah gilo zaw ah um in, pathian dang a ho ua, ziate chu bokkhup in chibai a bûk tau a. A thilbawl uh phalo leh a lochalnau lampi chu a haisan nuam puau hi.

²⁰ Tichun, Lalpa lung natna chu Israelte chung in a hung kuangjak ta’n; chuleh, a kiang un, “A pu leh pateu kiang ah thuthung ka la piak kha zia mite hin a bawtsiau ah, ka thu him him a ngai lo ziak un,

²¹ Joshua’n a thi hun ah nawdok nai lo, a kîmvêl ua nam dang um zosia hi khat chale a ma-âng un nawdok piak talo ding ka hi,” ti’n a gen tai.

²² A pu leh pateu in a la zui gual uh khan, amau inle Lalpa lampi chu zui ahi nau em zui lo, ti Israelte chu a patep theina dingin,

²³ Lalpa‘n a lak ua nam dangte chu kin tak in, a nawdok ziang pua, Joshua khut inle a la pedok diak lo ahi.