VAIHAWMTE 18 - PATHIAN LEKHABU THIANGTHO (BSI)

Dante Kipêmna

¹ Zia hun lai ah chun, Israelte lak ah Leng a um nai puai. Chuleh, zia hun tiang ah hin, Israel nam zosia lak ah amau in gochan ding gam a nei nai lo ziak un, Dan phung ah mite chun, a chênna ding uh mun a hawl tau a.

² Tichun, Dan phung lak ah mi hat leh hangsan chiat panga a têldok tau a; amau chun Zorah leh Eshtaol ah kipat in gam chu vaen-gu ding leh va hechian dingin a sawl tau ah; a kiang un, “Chia unla, a gam umdan chu va hetchian guau in,” a tiu a. Tichun, Ephraim tâng gam a hung tun phat un, Mikah in ah a vatung ua, a giak den tau a.

³ Mikah In ah a um lai un, Levi mi tangval khat husa a hiau ah; a zuan phei ua, a kiang in, “Kua’n zia hin a hun pui tung a hem? Zia hi bang bawl la hem? Bang sêm ah nêk mu la hem?” ti’n a dong tau a.

⁴ Ama’nle a kiang un, “Mikah in zia gual ah hin ei la bawl ah, ei gawi ah, a thiampu’n ei pansak ta ahi,” a tia.

⁵ Amau in a kiang ah chun, “Ka chiana ding lam ua chun lawting ding ka hiu em ti ka he nuam un, lungsiat tak in Pathian ei dot piak in,” a ti tau a.

⁶ Thiampu chun, “Thamuang tak in chia tau in. La chiana ding uh lampi hi Lalpa‘n a hun en zui zing hi,” a tia.

⁷ Mi pangate chu a chia pek ua, Laish a hung tun phat un zia gam ah mite, nuamsa tak ah a khawsak dan uh, Sidonte gual ah gâl muang leh lauthonna neilo, tâksap le neilo leh hausa tak ah umte chu a vamu tau ah. Zia mai chule hilo in, Sidonte tawh a kigamla ma mau ah, chuleh, Aram mite tawh le kimatna bangma a nei puau hi.

⁸ A chanauteu umna Zorah leh Eshtaol a hung tun kit phat un, “Lei hil thei ding uh bang la vamuu em?” ti’n a la dong tau a.

⁹ Amau chun a kiang un, “Hung un, vado pai ziang hitiu; a gam chu ka vamu suak tau ah, a hoi ma ma hi. Kimawk chut mai mai nalai ding la hiu em? Chia dingin uaiâi kiu inla, lut hitiu in, a gam chu lua ngâl ziang ding I hiu.

¹⁰ Valut leu chin, kuama ginmawna nei lo mite vamu’n lau. A gam lah lian ngâl, lei chung ah tâksap him him umlo’na mun ngei chu Pathian in la khut ua a hun piak tak tak ahi tai,” a tiu a.

¹¹ Zorah leh Eshtaol khua kipat in, Dan phung ah mite, za guk chu gâlvan ah kithuam in a kuandok tau a;

¹² a chia to ua, Judah gam ah Kiriath-jearim mun in a kikul tau a. Ziaziakchun, zia mun chu tu’ni tiang ah hin Mahaneh-dan ti min putsakden ahi tai; Zia chu Kiriath-jearim tumlam kâi deu ah um ahi.

¹³ Zia kipat chun Ephraim tânggam a hawtheng pek ua, Mikah in a hung tung tau a.

¹⁴ Ziaphatchun, gam (zia chu, Laish gam ahi) entha ding ah chia mi pangate khan, a lawiteu kiang in, “Zia In ah hin Ephod leh teraphim leh thik ah kisiam milim a um hi ti la he’nau em? Tu’hin bang I bawl ua pha a hem ti la ngaituau em?” ti’n a dong tau hi.

¹⁵ Tichun, Levi mi In lam ah chun a kihei tau ah, Mikah in ah chêng Levi mipa In ah chia in, chibai a bûk ua,

¹⁶ Dan phung ah mi, gâlvan ah kithuam za gukte chu kêlkot bul in a la ding zing ua,

¹⁷ gam entha chia mi pangate chu a lut un, thik ah kisung milim, ephod tawh, teraphim haw chu a valadok tau a. Thiampu chu kotbul ah, gâlvan ah kithuam mi za gukte kiang ah chun a ding zing a.

¹⁸ Mikah In ah valut ah, thik ah kisung milim, Ephod tawh teraphim a hun lakdaw phat un, thiampu chun a kiang un, “Bang bawl la hiu em?” a hun ti’n.

¹⁹ Amau chun, “Thip in! La khut in la kam huk inla, ei hun zui in; ka pa ding leh ka thiampu ding un la hung pan ding ahi. Mimal khat bep In sung ah thiampu la pan sâng in, Israelte nam lak ah phung khat a ding ah thiampu la pan chu nang â dingin phazaw hilo a hem?” a tiu a.

²⁰ Ziaphatchun, thiampu chunle a chialnau chu a pawm tai. Ama’n Ephod tawh, teraphim tawh milimte chu pua’n mite chu a zui tai.

²¹ Tichun, numei naunawn, ganchate leh a thuamphuateu masawm in a chia pek tau a.

²² Mikah In ah kipat gamla tak a tun phat un, Mikah Invêngte chu a hung khawm ua, Dante chu a va delpha tau hi.

²³ Amau chun Dan mite chu a vak uau phat un, amau le hung kihei in, Mikah kiang ah chun, “Bang ding ah mi zia jat jat chu tawh hung la hiu em?” a tiu a.

²⁴ Ama’nle, “Nang un keima kisiam ka pathiante leh ka thiampu la kipuak mang tau ah, bang dang ka nei nalai ua a hem? ‘Bang lungnatpi la tam,’ lei tiu chu bangtidan ah la tiu a hem?” ti’n a dawnhu ta’n.

²⁵ Chun, Dan mite chun, “Ka kiang un bangma gen kin; achutiloleh, ka lak ua tangval lungchom deu khat in, la hinna leh la In sung mite hinna hun lak piak khawlaw kha’n ah,” a ti piak tau hi.

²⁶ Tichun, Dan mite chu a chia ngai un a chia kit tau a. Ama sâng ah hatzaw a hiu ti a mu ziakin, Mikah le a kihei ah, In lam zuan in a chia kit tai.

²⁷ Dan mite chun Mikah khutsuak leh a thiampu chu kipui in, Laish khua gâl muang leh kuama muanmaw nei lo ah khawsa hiat hiat te chu chemjam ah that gam in, a khawpiu chule a hâl tum piak tau a.

²⁸ Amau hukdok ding a um pua’n, Sidon ah kipat gamla tak ahi’n; Aramte tawh kitimatna nei lo a hiziak un. A umnau chu Beth-rehobte phâijawl sung ahi. Khawpi chu a siamthak kit ua, a chêngden tau a.

²⁹ Zia khawpi min chu Israel chapa, a puu Dan min sak in, Dan a sak tau ah; himaleh, a khawpi min masa chu Laish ahi.

³⁰ Tichun, Dan mite chun, milimte chu amau â dingin a kikoi tau a. Mosi chapa Gershom chapa Jonathan leh a chapate chu, a gam uh sal ah pui mang ahi masiau in Dan mite thiampu’n a pang den tai.

³¹ Tichun, Shiloh khua Pathian biakbûk a um sungsia, amau inle Mikah milim siamte chu a kikoi tau hi.