VAIHAWMTE 16 - PATHIAN LEKHABU THIANGTHO (BSI)

Samson Tawh Delilah Chanchin

¹ Khatvei chu Samson Gaza khua’n a chia suk leh, nawchizuak khat a vamu’n, a zui lut tai.

² Gaza khua mite kiang in, “Zia mun ah hin Samson a hung hi,” ti a hil tau a. Tichun, a ûm tau ah, khawpi kul kotkhak ah chun jan khawvak in a châng tau a. Amau chun thipbek in, “Jingkal khawvak tiang ngâkleu hin; zia phat chuleh, that ngei hi tiu,” a tiu a.

³ Himaleh, Samson chu jankhang tiang hial a lum ah. Jankim in a hung thodok ah, khawpi kul kotkhak khuampi teni chu a botdok ah, a kamna zosia chule domdok in, a liangko ah pumang in, Hebron gâl tângvum ah a puto tai.

⁴ Zia nung ah chun, Sorek phâijang ah numei khat a dawicha kit ta’n, a min chu Delilah ahi.

⁵ Philistinte lak ah miliante amanu kiang in a hung un, a kiang in, “Ama chu hun jawlgu’n la, zia gual lawm ah a hâtna thugûk hi bang a hem ti hun dongdok in; chutileh, ama zo hitiu in, kântom thei hita’n a; chutia chu la hun bawlthei leh ka leng un dangka shekel sang khat leh za khat chiat hun pia’ng kau,” a va tiu a.

⁶ Tichun, Delilah chun Samson kiang in, “La hâtna ziak hi bang a hem, bangti leh nangma kântom ah um in, la tha hatna hi hizawi thei ahi diam? Lungsiat tak in ei hil in,” ti’n a dong ta’n.

⁷ Samson in a kiang in, “Thalpi khâuthak, a gam nai lo sagi in ei kân leu chin, ka tha hung jawng intin, midang gual mai in hung um ding ka hi,” a tia.

⁸ Ziaphatchun, Philistin miliante chun thalpi khâu thak, keu nai lo sagi a hun lau ah, zia chun ama’nle a la kân tai.

⁹ Indan sunggil lam in a chânggu lawi um a hiu ah; amanu chun a kiang un, “Samson, Philistinte a hung tau,” a tia. Ama’nle thalpi khâute chu meiâm in patzang a kattan gual mai in a bot tan tai. Tichun, a hatna thugûk chu a hedok zo puau hi.

¹⁰ Ziaphatchun, Delilah in Samson kiang in, “Lei thêm ah, lei dâi chavai mai mai ahi; bangti leh kântom thei la hi diam ti lungsiat in ei hil in,” ti’n a don kit a.

¹¹ Ama’nle a kiang in, “Khauhual thak, mat khâk nai lo in ei kân leu chin, ka tha jawng intin, midangte gual mai ah hung um ding ka hi,” ti’n a gen a.

¹² Tichun, Delilah in khauhual thak a la, a kân ta’n; chuleh, a kiang in, “Samson, Philistinte a hung tau!” a tia. (A changgute chu Indan sunggil lam ah chun a kisêlguu a.) Himaleh, a kânna khauhualte chu patzang gual mai in a bot tan zo kit tai.

¹³ Ziaphatchun, Delilah in Samson kiang in, “Zuau ah ei bawl in, lei dâi chavai mai mai ahi; bangti hun kântom thei ding ka hem, ei hil in,” a tia. Ama’nle, “Ka samphêk sagite hi puan-ga khum inla, tukkil in kildet lechin, ka tha hung jawng intin, midangte gual ah hung um mai ding ka hi,” a tia.

¹⁴ Tichun, a ipmut kâl in a samphêk sagite chu Delilah chun puan a la ga’khum ta’n; chuleh, tukkil in a kildet tai. Ziaphatchun, a kiang in, “Samson, Philistinte a hung tau!” a tia. Himaleh, a hung thawdok leh, a tiam tawh, a puankol tawh tukkil ah a kikildetna zosia chu a tokdok ta mai a.

¹⁵ Ziaphatchun, a kiang in, “La lungthim bawn ei pelo in, bangtidan ah, ‘Ka hun lungsiat hi,’ ei ti’thei la hem? Tu’hin thumvei hial hi thudik gen lo in lei lepbawl ta’n, la hatna thugûk chu lei hil nuam nai diak puai,” a tia.

¹⁶ A tawp in, zia gual ah chun nisi’n ah a dot zing ziak leh a kinakpi zing ziakin, thi nuam zaw khop hial in a lunggim ta’n.

¹⁷ Tichun, a hatna thugûk zosia chu a kiang in a hil ta’n: “Ka nu sûl ah ka um lai ah kipat in Pathian â ding ah kikoi chuam, Nazirit ka la hi tâk ziakin, ka luchung ah hin samchem kimang kha lo ahi. Ka sam hi kimêt tha leh ka hatna’n ei nusia mai ding ahi; chutileh, hung jawng ing ka tin, midangte gual tho ah hat talo ding ka hi,” ti’n a gen tai.

¹⁸ A lungthim zosia a gendok tai ti chu Delilah in a hetchian phat in, Philistin miliante chu ko dingin mi a sawl ah, a kiang un, “Tu’n chu a lungthim zosia ei hil tai, tu’chung ah hin nanghaw hung tau in,” ti’n a va gensak a. Ziaphatchun, Philistin miliante chun a khut ua dangka hun chawi chiat kawm in, a hung tau hi.

¹⁹ Delilah in a pheichung in a ipmut sak ta’n; chuleh tangval khat a ko ah, a samphêk lom sagite chu a mêt thâksak ta. Tichun, a tha a chau ta’n, a hatna’n a nusia tai.

²⁰ Ziaphatchun, a kiang in, “Samson, Philistinte a hung tau!” a tia. A hung khatlaw phatin, “Hun dang ah gual tho khan vak kije ing ka tin, vak kitomdok ing ka,” ti’n a ngaitua ah. Lalpa‘n a la taisan ta ahi ti lam him him a he puai.

²¹ Tichun, Philistinte’n a hun man tau ah, a mit a kheldok piak tau hi. Gaza khua’n a pui suk ua, sum-eng thikkhau in a hên ua; chuleh, suangkul sung ah buhêkna suang a hêksak tau hi.

²² Himaleh, a luchang sam a mêt uh chu a hung khang kit pai a.

Samson Thi’na

²³ Ziaphatchun, Philistinte lak ah miliante chu, a pathian uh Dagon kiang in kithoina thupi tak lân dingin a hung kikhawm tau a; amau in, “I pathian un I mêlmau Samson chu I khut un ei pia tai,” a tiu a.

²⁴ Mipite’n Samson a mu phât un a pathian uh a chawihoi tau ah; amau chun, “I gam uh hisia, I chipiteu tam tak thatpa, I mêlmapau I pathian un I khut un ei pia ta ahi,” a tiu a.

²⁵ Chun, a lungthim uh a hung lim ma ma phatin, “Samson chu vako un, kichawlimna’n mang hitiu,” a tiu a. Tichun, suangkul ah kipat in Samson chu a vapui dok ua, nunnop bawlna’n a mang tau a. Khuam pani kikâl in a din sak tau a;

²⁶ chuleh, Samson in a khut ah kaitawlpa kiang ah chun, “In kingakna khuampi ah chun ei kinêlsak tiam in,” ti’n a don a.

²⁷ Zia lai tak ah chun, In chu numei leh pawsal a dim set ah um a hiu ah; Philistin miliante zosia le a um un; Inchung lam in Samson nunnop bawlna a mat uh en in, numei leh pawsal sang thum ding vêl a um ui.

²⁸ Samson in Lalpa a hun ko ta’n: “Aw Lalpa Pathian, ei hezing inla, khatvei bepcha hilehle ei hun hihât in; aw Pathian, Philistinte chung ah ka mitchang pani phuba ka lâk theina ding in hun khat bep ei pia kit in,” a tia.

²⁹ Chun, Samson in a In kingakna khuam a lailung ah um pani chu a tûk ah; a khut changlam in khuam khat, a khut veilam in khuam khatzawk chu a sawn ta’n.

³⁰ Chuleh, Samson in, “Philistinte tawh thi khawm ziang ing ka,” a tia. A theitawp sua in a sawn ta’n, tichun, a umnau In chun miliante leh a sung ah um zosiate chu a chip khum tai. Tichun, a thi hun ah a mi tha te chu a damsung ah a mi tha te zosia sâng in a tam zawu hi.

³¹ Chuleh, a suapite leh a chanaute a hung suk ua, a luang chu a hung lau ah, a paw to ua, Zorah leh Eshtaol kikâl ah, a pa Manoah kivuina mun ma ma ah chun a vui tau hi. Ama’n Israelte chung in kum sawmni vai a hawm hi.