VAIHAWMTE 14 - PATHIAN LEKHABU THIANGTHO (BSI)

Samson Ji Neina

¹ Samson chu khatvei Timnah khua a vachia suk leh, Philistinte numei khat a vamu’n.

² Chuleh, a hung to phatin zia thu chu a nu leh pa kiang in, “Timnah khua Philistin numei khat ka va mu’n, ama chu ka ji dingin ei vapui piak un,” a tia.

³ Himaleh, a nu leh pa chun, “La chipite leh I mipiteu lak ah hin numei umlo hial a hita, nang in zektanlo Philistinte ji ding ah lâk ding la ti mai chu?” a tiu a. Himaleh, Samson in a pa kiang in, “Ei vapui piak kin un, ama chu ka doigual tak ahi,” a tia.

⁴ A nu leh pate’n zia chu Lalpa lemguat ahi ti lam a hepuau a; ama’nle Philistinte do-na ding lampi a gûk ah hawl zing ahi ngâl a. Zia hun ah chun, Philistinte’n Israelte chung ah vai a hawm hun lai uh ahi.

⁵ Ziaphatchun, Samson chu a nu leh pa tawh Timnah khua’n a chia suk tau a. Timnah mun ah grep huan khat a hung tun phatin, sakeibaknei pakhat in a la ngîk ta mai a.

⁶ Lalpa thagau in a hun thuam ah, pawsal hat tak in kêlno a puaitel gual mai in, a khutngawn in sakeibaknei chu a puaitel ta mai ah. Himaleh, a thilbawl chu a nu hileh, a pa hileh bangma a hil puai.

⁷ Chuleh, a chia suk ah, numei chu a vahêl ah, ama’nle Samson chu a la dawi ma ma a.

⁸ Chomkhat zaw in, ama chu pui ding ah a vachia kit phatin, sakeibaknei luang chu en dingin a vak pêt ah; chuleh, sakeibaknei luang sung hawm ah chun khuai a la kâi in, khuaizu a la um ta’n.

⁹ A khuat dok ah, a chia kawm in a ne ta’n. A nu leh pa kiang a hung tun phatin, amau chule a pia’n, a ne tau a. Himaleh, zia khuaizu chu sakeibaknei sung ah kipat a lâk daw ahi ti chu vang a hil puai.

¹⁰ Tangvalte’n a bawl sek dan gual ua, Samson in luaithe’na a bawl phatin, a pa le numei kiang in a chia suk a.

¹¹ Mipite chun a mu phât un, Samson gualpi dingin mi sawmthum a hun piau a.

¹² Samson in a gualte kiang in, “Tu’hin thu hetmaw khat hun dong ing ka. Zia chu luaithe’na hun ni sagi sung ah la hetdok ua, la hilchian thei uh chun, keima’n puan malngat the’ sawmthum tawh, luaithe’na puanchên the’ sawmthum hun pia’ng ka.

¹³ Himaleh, la hilchian thei lo ua leh nang un, puan malngat the’ sawmthum tawh luaithe’na puanchên the’ sawmthum lei piak diu ahi,” a tia. Tichun, amau inle, “La thu hetmaw gen ding chu hun gen tia leh a la ngai ing kau,” a tiu a.

¹⁴ Ama’nle a kiang un: “Mi nethei ah kipat in mi nêk ding a hung pawt hi. Mi thahâtpa ah kipat in thum tak a hung pawt hi,” ti’n a hun gen a. Ni thum sung a kingaitua nung unle a thu hetmaw gen chu a hedok diak ta puau a.

¹⁵ Ni li a ti’n ni chun Samson ji kiang in, “A thu hetmaw gen hi bang genna a hem a hun hiltheina dingin la pawsal hi jawl in; achutiloleh, nang tawh la pa In sung mite zosia hi mei ah hun hâltum khawm mai ding ka hiu. Ka nei uh chom gam gua lei chial uh a hia hem?” a vatiu a.

¹⁶ Tichun, Samson ji chun a pawsal âng ah kap hial in a dawn ziang ta’n, a kiang in, “Lei lungsiat puai; lei lungsiat tak tak puai. Ka chipite kiang in thu hetmaw la dong ah, bang genna ahi kei nasan lei hil nuam puai,” a tia. Ama’nle a kiang in, ka nu leh ka pa le ka hillo ahi’n, zia chu bang ding ah nang hun hil ding ka hem?, ti’n a dawnhu ta’n.

¹⁷ Chun, a ji chu luaithe’nau tawp chan ni sagi sung a kiang in a kap ta’n; a phin nasat bêk ziakin, ni sagi a tin ni chun a ji a hil tai. Ziaphatchun, a ji chun hetmaw hilchetna chu a chipite kiang in a a hil tai.

¹⁸ A ni sagi tinni, nisa tum ma ngei in, khua sung ah mite chun a kiang in, “Khuaizu sâng ah thumzaw leh, sakeibaknei sâng ah hatzaw bang a um em?” a tiu a. Ama’nle a kiang un: “Ka bawnglâ mang ah loukai hiloleu chin vang, ka thu hetmaw gen chu hedok lo ding la hiu a,” ti’n a dawnhu tai.

¹⁹ Tichun, Lalpa thagau a chung in a hung tung a; chuleh, Ashkelon khua’n a chia suk ta. Khawpi sung ah tangval sawmthum a that ah, a puansilteu chu lâkpiak in, luaithe’na puanchênte chule a thu hetmaw hilchiante kiang in a pia tai. Tichun, lungna ma ma in a pa In lam in a chiato kit tau hi.

²⁰ Chun, Samson ji chu a gualpa, ama palai ah pang ma ma chu tawh a kicheng tau hi.