VAIHAWMTE 11 - PATHIAN LEKHABU THIANGTHO (BSI)

Jephthah Vaihawmna

¹ Tu’hin, Gilead mi Jephthah, nawchizuaknu chapa chu mihat leh hangsan tak ahi’n. Gilead chu Jephthah pa ahi.

² Gilead ji chun chapa dang dang le a nei ah; a ji chapa dangte chu a hung pitin phat un Jephthah chu, “Ka pau go thil lak ah nang chan ding bang ma a um puai; nang nu chuam hin la hi’ngâl ah,” a ti ziak un a nawdok tau a.

³ Ziaphatchun, Jephthah chu a suapite lak ah kipat tai mang in, Tob gam in a vachêng den ta’n. Mi thumanglote chu Jephthah zui in, misuam in a vak tawl tawl tau hi.

⁴ Sawt khop nung in, Ammonte’n Israelte a hun do pan kit tau a.

⁵ Ammonte’n Israelte a hun do phat un, Gilead khua upate chu Tob gam ah Jephthah kodok dingin a kuan tau a.

⁶ Jephthah kiang in, “Hung inla, Ammonte ka do nau ah hin hotu’n hung pang in,” a tiu a.

⁷ Himaleh, Jephthah chun Gilead khua upate kiang in, “Ei muda ah, ka pa in ah kipat ei nawdok kha nanghaw ma ma hi hilo la hiu em? Buaina la tuak phat ua, bang ding ah ei pui ding ah hung la hiu em?” a la ti ta’n.

⁸ Gilead ah upate chun Jephthah kiang in, “A bang hileh, Ammonte ei hung dopi inla, keihaw leh Gilead ah chêng zosiate chung ah hin hotu’n hung pang lechin ti ah hung ko ka hiu,” a tiu a.

⁹ Jephthah chun Gilead khua upate kiang in, “Nang un Ammonte do ding ah In lam ah lei pui kit ua; chuleh, Lalpa‘n amau chu ei zawsak ahileh, la chung ua hotu hi mai ing ka,” a tia.

¹⁰ Chun, Gilead khua upate chun Jephthah kiang in, “Lalpa chu I kikâl ua hiatpitu in pang hen la; la gen gual gual chun bawl ing kau,” a tiu a.

¹¹ Ziaphatchun, Jephthah tawh Gilead khua upate chu a kiton tau a; chuleh, Gilead khua mite chun ama chu a hotu leh a puitu ding un a guat tau a; chuleh, Jephthah chun Mizpah mun ah Lalpa ma-âng in a thugen zosiau chu a puangjak tai.

¹² Ziaphatchun, Jephthah in Ammonte lengpa kiang in palai a sawl ah; a kiang in, “Nang leh kei kikâl ah bang thu a um ah, ka gam uh do ding ah hung ziang la hiu em?” ti’n a vagensak a.

¹³ Ammonte lengpa chun Jephthah palai sawlte kiang ah chun, “Israelte Aigupta gam ah kipat a hung pawt lai ua khan, Arnon lui ah kipat Jabbok lui leh Jordan lui tiang in ka gam ei lak piak un; ziaziakchun, tu’hin zia gam chu bangma gen tam lo in ei pia kit ziang tau in,” ti’n a gen a.

¹⁴ Ammon Lengpa kiang in Jephthah in palai khatvei a sawl kit a;

¹⁵ a kiang in: “Jephthah in zia gual hin a gen hi: Israelte’n Moab gam hileh, Ammonte gam hilehle a lâkpiak lo hial hi;

¹⁶ Aigupta gam ah kipat a hung pawtdok ua khan, Israelte gamthip ah chia theng in Tuipi San lam in a chiau ah, Kadesh a tung un.

¹⁷ Ziaphatchun, Israelte’n Edom Lengpa kiang ah palai sawl in, ‘La gam ei hawthensak in,’ a vatiu a; himaleh, Edom Lengpa’n a zanuam pua’n. Moab Lengpa kiang inle palai a sawl un, ahi’n a zanuam diak pua’n. Tichun, Israelte chu Kadesh mun in a um den tau hi.

¹⁸ Ziaphatchun, gamthip lam a zuan ua, Edom gam leh Moab gam chu pêl in Moab gam sualam chu zuan in, Arnon lui gâl in a giak tau a. Arnon lui chu Moabte gamgi ahiziak in, Moab gam sung chu a haw kha ta puau a.

¹⁹ Zia kipat chun Amor mite lengpa, Sihon kiti Heshbon ah lengpa kiang in Israelte’n palai a sawl tau ah; a kiang in, ‘Ka gam uh zuan in la gam uh ei hawsak in aw,’ a vatiu a.

²⁰ Himaleh, Sihon in a gam sung paltheng dingin Israelte chu a ginglel ah; tichun, a sepai zosia ko khawm in Jahaz mun in a kikul ua, Israelte chu a do tau hi.

²¹ Ziaphatchun, Lalpa, Israelte Pathian chun Sihon tawh a mipite zosia chu Israelte khut in a pia ta’n, Israelte’n a zo tau a; tichun, Amorte chênna gam chu a lua tau ahi.

²² Amorte gam, Arnon lui ah kipat Jabbok lui tiang leh, gamthip ah kipat Jordan lui tiang kikâl sung chu a lua tau ahi.

²³ Chutichun, Lalpa, Israelte Pathian in, a mi Israelte â ding ah Amorte a la zaw piak a hita’n. Tu’hin, a gam uh chu lâkpiak kit la guat a hem?

²⁴ La pathian uh Khemosh in a hun piakna tiang tiang chu la lua mai ding hilo a hem? Chun, kei unle Lalpa, ka Pathian un kei uh â ding ah ei zaw piakna tiang tiang chu ka lua mai ding uh hilo a hem?

²⁵ Tu’hin, nang chu Moab Lengpa, Zippor chapa Balak sâng ah hatzaw leh phazaw la hia hem? Ama khan Israelte a la subuai in, a la kidopi kha ngai em?

²⁶ Israelte chu Heshbon leh a khawpelte, Aroer leh a khawpelte leh Arnon luidung ah a khawpi zosia ah zia kum za thum hial hi a la chêng tau ah, bang ding ah zia hun sung ah chu a la lua kit ziang lo la hiu em?

²⁷ Nang chung in bangma ka bawlkhial pua’n, ahi’n la, nang in vang lei do ziakin ka chung in thil la bawlkhial ta ahi. Tu’ni hin Lalpa, vaihawmpa chun Israelte leh Ammonte kikâl ah vaihawm mai ta hen,” a tia.

²⁸ Himaleh, Ammonte Lengpa chun Jephthah thu vaithâk chu a ngaisak puai.

Jephthah Kitiamna

²⁹ Ziaphatchun, Lalpa thagau chu Jephthah chung in a hung tung ta’n; tichun, Gilead leh Manassehte chênna gam chu a chuan suk ngâl a. Gilead gam ah kipat in Mizpah in a gâl kâi ah, zia Gilead gam ah Mizpah ah kipat chun Ammonte gam lam in a gâl kâi tai.

³⁰ Chun, Jephthah in Lalpa kiang ah kitiamna a bawl a: “Nang in Ammon mite hi ka khut ah lei piakdok ngei ngei chun,

³¹ Ammonte zo ah In lam ka kile’kit phat leh, ei dawn ding ah ka kotkhak ah kipat hung pawtdok masa pen chu, Lalpa â ding hi’ntin; zia chu a pum ah hâlmang thillat dingin hun pia ding ka hi,” a tia.

³² Tichun, Ammonte do dingin Jephthah chu a gam un a gâl kâi ta’n; chuleh, Lalpa‘n amau chu a khut in a pia tai.

³³ Aroer ah kipat in Minnith khua tuamvêl tiang ah khua sawmni, Abel-keramim tiang in a that suak tai. Tichun, Israelte ma-âng ah chun Ammon mite chu zaw in a um tau hi.

³⁴ Ziaphatchun, Jephthah chu Mizpah khua a In a hung tung ta’n; a chanu chu khuangneu tawh lâm kawm in a pa dawn dingin a hung pawt ta’n. Ama chu a chanu nei sun ahi’n; ama tilo cha dang le a nei diak puai.

³⁵ A chanu a mu phât in, a puan a botthêk ah, a kiang in, “Aw ka chanu! Nang in lei hi’niam na lawm lawm e! Ei sulungngai pen in la hung pang ta hilam! Lalpa kiang in kam ka la sua ta’ngâl ah, kijuk kit thei lah ka hita pua’n,” a tia.

³⁶ Ama nu’nle a kiang in, “He pa, Lalpa kiang ah thu a la gen ta la hi chun, la kam ah la gensa gual ngei in ka chung ah bawl ziang in; Lalpa‘n la mêlma Ammonte chung ah phuba a hun lâkpiak ta’ngâl a,” a tia.

³⁷ Chun, a pa kiangma in, “He pa, zia thil pakhat hi ei bawl piak in: Ka nungakna hun vasûn dingin, kei tawh ka lawite tâng ah ka vâk tawl tawl theina ding un tha ni hun ei pia’n,” a tia.

³⁸ A pa’nle, “Chia ta’n,” a tia; tha ni sung â dingin a sawldok ta’n. Tichun, a lawite tawh a kipandok tau ah, tâng ah te chun a nungak lai nite chu a vasûn tau hi.

³⁹ Tha ni zaw phatin a pa kiang in a hung kit ah; a pa’nle a la kitiamna mualsua in a chung in a bawl ding dawl chu a bawl tai. Ama chu pawsal tawh lum khawm kha lo ahi’n. Ziaziakchun, Israelte lak ah chawndan pakhat,

⁴⁰ Israelte lak ah nungakte chu kum si’n leh ni li sung, Gilead mi Jephthah chanu sûnna nei in a pawtdok sek tau hi.