TITA 2 - PATHIAN LEKHABU THIANGTHO (BSI)

Thugin Dik Chu Hil In

¹ Himaleh, nang in vang thugin dik takte chu gen in.

² Upate chu kisûm ding, ja’um, a hun tiang he, ginna dik tak nei, hepina leh thok-hatna nei ding in;

³ zia gual ma chun nupite le a umdan ua ja’um dingin, diklo tak ah mi lawttua lo dingin, zudawn chîng lo ding leh thilpha lam zilsaktu hi dingin thu hil inla,

⁴ amau inle, numei khangdawng nalaite chu a pawsalteu hepi ding leh a chateu hepi dingin,

⁵ kisumthei ding leh kikoi thiangtho ding leh, Insung enkol tup ding leh, pawsalte nuai ah kitulut ding leh, amau ah Pathian thu chu gensiat ah a um lona ding ah a hil theina ding un.

⁶ Zia gual ma chun pawsal khanglaite chule kisûmthei dingin thu hil in.

⁷ Bangkim ah thilpha lam taphot ah, mi etton dingin kisiam inla; la thugen ah chun la lunglut zia leh la ti’takna a kilat a;

⁸ la paukam le dem kâi lo ahi ah, langkhat lam ah pangte chun la chung ah thu phalo him him gen ding mu lo ah a mualphona ding un.

⁹ Suakte chu a puteu thumang ding leh, amau chu kipaksak zing ding leh nial ngailo dingin;

¹⁰ khutthem neilo ah, ginum tak ah nasep pha latsak ding leh, ei Hukhingpa Pathian thugin chu bangkim ah a choisa’n theina ding un hil in.

¹¹ Pathian doisakna chun, mi zosia â dingin hukdamna a hun kilatsak tangal a;

¹² zia chun Pathian ngaisak lona leh khawvel nopnate nusia ah, kisûm ah, diktat ah, tu’lai khawvel ah hin Pathian ngaisak ding leh,

¹³ kinepna kipak um, I Pathian lopi tak leh Hukdampa Jesu Khrista kilâkna chu ngâk dingin ei hil a.

¹⁴ Ama chu eimau â ding ah hung kipia’n, thiangtho leh nasep pha ah phatchuamngai, ama mite hiding in, gitlo zosia lak ah kipat ei tandok tai.

¹⁵ Zia thute hi hil inla, zilgai in. Kuama’n hun simmaw kiu hen.