THUPUAN 8 - PATHIAN LEKHABU THIANGTHO (BSI)

Tepte’na Pasagina

¹ Belamno chun tepte’na sagina chu a hun hon leh, hundan kimkhat sung chu van a hung thip a.

² Ziaphatchun, Pathian ma ah vansawlchâk pasagi ding ka mu’n; pengkul pasagi a hun piau a.

³ Vansawlchâk dang pakhat a hung ah, gimtui hâlna sana kuang a hun chawi ah, mâichâm ah chun a ding ah; chuleh lalchutpha ma ah sana mâichâm chung ah chun mithiangthote pauchapna tawh gimtui tam tak a hun piau a.

⁴ Tichun, mithiangthote pauchapna chu tawh kiton in, vansawlchâk khut ah kipat gimtui khu chu Pathian âng sung in a jam to ta’n.

⁵ Vansawlchâk chun gimtui hâlna kuang chu a la, a sung ah chun mâichâm ah meiâm chu a thundim ah, lei lam ah a paitha ta; ziaphatchun, awte, van-gite, kawlphete leh linlîngte a hung um ta.

Pengkul Pasagite Mûtna

⁶ Ziaphatchun, vansawlchâk pasagi pengkul pasagi chawite kha mût dingin a hung kisa tau a.

⁷ Vansawlchâk pakhatna chun a hun mût leh, gial leh mei thisan tawh kihel a hung pawtdok a; ziate chu lei ah a hun paitha tau a. Lei chung mun thum ah khen mun khat, thing mun thum ah khen mun khat, chuleh, hampa hing zosia chule a kâng tum tai.

⁸ Chun, vansawlchâk panina chun pengkul chu a hun mût leh, tâng lianpi tawhbang pakhat mei ah kâng lut lut chu tuisuagiat sung in a hung kiseptha ta’n; ziaphatchun, tuisuagiat mun thum ah khen mun khat chu thisan a suak tai.

⁹ Tichun, tuisuagiat ah hinna nei zosia mun thum ah khen mun khat chu a thi tau ah; Longte mun thum ah khen mun khat chule suksiat in a um tau hi.

¹⁰ Chun, vansawlchâk pathumna chun a pengkul a hun mût leh, van ah kipat aksi lian tak, meisel gual ah kuang chu lei lam in a hung ketha’n; zia chun tuinâkte leh luite mun thum ah khen ah mun khat a delkhum tai.

¹¹ Zia aksi min chu Gamsai a kitii. Tichun, tui chu mun thum ah khen mun khat chu Gamsai suak in a hung khât tâk ziakin, mi tam tak a thi tau a.

¹² Chun, vansawlchâk palina chun a pengkul chu a mût leh, nisa mun thum ah khen mun khat leh, thapi mun thum ah khen mun khat leh, aksite mun thum ah khen mun khat chu suksiat in a um tau ah; ziate chu mun thum ah khen mun khat a hung thim tâk ziakin, sûn le mun thum ah khen mun khat a thim ta’n, jan le zia gual ma chun a hung um tai.

¹³ Ziazaw chun, ka et leh muthongpi khat vanlai jawl ah leng in, aw ngai tak in, “Vansawlchâk pathum um nalaite chun a pengkul uh a mût phat ua leh, lei chung ah um nalaite chung a gik hi, a gik hi, a gik hi!” a ti ka hia’n.