THUPUAN 5 - PATHIAN LEKHABU THIANGTHO (BSI)

Lekhabu Zial leh Belamno

¹ Ziazaw chun, lalchutpha kichupa khut changlam ah chun, lekhabu zial a pêk langtua ah kizik, tepte’na sagi ah kitepte ka mu’n.

² Chun, vansawlchâk thilhithei tak khat hin aw ngai tak in, “Kua a hem zia lekhabu tepte’na hi tham ah, phêt thei ding?” tia kiko chu ka mu.

³ Himaleh, van leh lei leh, leinuai lam tiang ah le kuama zia lekhabu hong thei ding chu a um ta pua, a chung en thei ding ziang le a um ta puau.

⁴ Zia lekhabu chu hun tham ah, a sim thei ding mi kuama a um tâk lo ziak un, ha kâ in ka kap ta’n.

⁵ Ziaphatchun, upate lak ah pakhat chun, “Kap kin, Juda nam ah mi, sakeibaknei, David phunggui ah mi chun, lekhabu tepte’na chu tham ding leh phêt thei dingin zawna a chang tai,” a hun tia.

⁶ Ka vak et leh, lalchutpha umna leh thilhing palite umna kikâl ah upate lak ah chun, Belamno tha ah umsa kha, mit sagi leh kî sagi nei in a hung ding ah, ziate chun Pathian thagau pasagi, lei muntin ah sawldawte chu a hiu.

⁷ Ama chu a hung ah, lalchutpha kichupa khut changlam ah kipat chun, lekhabu chu a la ta’n.

⁸ Lekhabu chu a lâk phatin, thilhing palite leh upa sawmni leh palite chu Belamno ma-âng ah chun a bokkhup tau a, tingtang leh sana belbu gimtui ah dim a chawi chiat un; zia chu mithiangthote pauchapna chu ahi.

⁹ La thak a hun sau a: “Nang, Lekhabu chu la ah, a teptênate tham ding ah ting pen chu la hi; tha inla um ah, chitin, namtin, pautin leh mipite lak ah chun, la thisan inla tandok a, Pathian kiang la tut ta’n;

¹⁰ Pathian lam ah lal leh thiampu’n la siam a; lei chung ah vaihawm dingte a hitau hi,” ti in.

¹¹ Chun, ka et leh, lalchutpha leh thilhingte leh upate kîmvêl ah chun, vansawlchâk tamtakte aw ka he; a tam dan uh chu a sîng ah sîng mun sâng tam tak leh, a sâng a sâng mun sâng tam tak a hiu a.

¹² Ziate chun aw ngai tak in: “Belamno tha ah umsa kha, thilhitheina, hausakna, pilna, hatna, choihoina, lopina leh maljawlna, chang tâk him ahi,” a tiu a.

¹³ Thilsiam zosia, van leh leinuai leh tuisuagiat chung leh a sung ah um zosiate chun: “Lalchutpha chupa leh Belamno kiang ah chun, maljawlna, jana, lopina leh, vaihawmna leh thilhitheina kumtuang in um hen,” a tiu ka he.

¹⁴ Thilhing palite chun, “Amen,” a tiu ah. Chuleh, upate chun bokkhup in a ho tau hi.