THUPUAN 4 - PATHIAN LEKHABU THIANGTHO (BSI)

Van ah Pathian Biakna

¹ Ziazaw chun, ka vak et leh, van ah kot kihong ka mu’n, zia lai tak ah aw ka het masak, pengkul gi gual ah ngai a ei ho chun, “Hung to tiam in, tu’nung a thil hung um dingte chu hun etsak ing ka,” ei tia.

² Ziaphatchun, thakhat in thagau in ka hung um ta’n; ngai tiam un, van ah chun lalchutpha khat a hung kidaw ah; zia chun mi pakhat a kichû.

³ Zia lalchutpha hung kichupa chu jaspar leh sardis suang gual in a kimu’n; chun, lalchutpha kîmvêl ah chun uizo, emeral suang gual in a jam a.

⁴ Chuleh, lalchutpha kîmvêl ah chun lalchutpha sawmni leh pali a um a; zia lalchutphate chun upa puan vâm sil sawmni leh pali chû le ka mu; a luchung ua chun sana lallukhuk a khuk chiat ua.

⁵ Chun, zia lalchutpha ah kipat chun, kawlphete, van-gite leh awte a gi zung zung ah; chuleh, zia lalchutpha ma-âng ah chun thaumei pasagi a kuangsa’n a um zing in; zia chu Pathian Thagau pasagite chu a hiu.

⁶ Chuleh, zia lalchutpha ma-âng ah chun tuisuagiat, a chung lîmlang pêk gual ah krustal suang gual hial ah val in a um a; chuleh, zia lalchutphate lak ah, a lailung ah, lalchutpha kîmvêl ah chun thilhing pali a nung lam leh a ma lam mit ah dim a um ua.

⁷ Zia thilhing pakhatna chu sakeibaknei mêlpu a hia; a panina chu bawngno mêlpu a hia; pathumna chu mihing mêlpu a hia, chuleh a palina chu chunglêng mupi mêlpu ahi.

⁸ Chuleh, zia thilhing palite chun thâ paguk chiat a nei ua; a kîmvêl leh a sung lam uh chu mit a dim a hiu. Amau haw chun sun leh jan chawl lo in zia La hi a sau ah: “Lalpa Pathian Bangkim Hi’thei, um tasa leh um lai tak leh hung um ding chu, A thiangtho hi, a thiangtho hi, a thiangtho hi,” a tiu a.

⁹ Zia thilhing palite chun kumtuang ah hing zing lalchutpha ah kichu chu a chawihoi un, jana a piau ah, kipak thu a gen phat ua leh,

¹⁰ upa sawmni leh palite chun lalchutpha kichû chu, a ma-âng ah bokkhup in a ho sek un; kumtuang ah hing zing pa ma ah chun a lallukhukteu chu a koithâu ah, chibai a bûk sek ui.

¹¹ “Aw ka Lalpau leh Pathian, lopinate choihoinate leh, thilhitheinate chu chang tâk him la hi; nang in bangkim la siam ah, la kipakna ding ah siam leh um him a hiu,” a tiu a.