THUPUAN 3 - PATHIAN LEKHABU THIANGTHO (BSI)

Sardis Kochuamte Kiang ah Thugen

¹ Chun, Sardis khua kochuam vansawlchâk kiang ah chun, zia gual hin zik in: Pathian Thagau pasagi leh aksi pasagi neipa chun, zia thu hi a gen hi: La thil hi’te ka hiai, a thi hingal ah hing min la put hi.

² Kivêng inla, a hing nalai sun, thi vâng vângte kha hi’hat kit in; la thil hi’te kha ka Pathian mit mu in a buting him him a um puai.

³ La thil mu dan leh het dante kha hezing in vop pha’n la, la lung hun hei ta’n. La kivên lo chun gucha gual in hung ing ka tin, bangtik hun ah ka hun phawn ding helo la hi.

⁴ Ahi’n, Sardis khua a puanteu hi’buak lo mi tawmcha a um ui; ziate chu puan vâm sil in ka kiang in lêng in au; zia gual chu chang tâk him ahi ngal un.

⁵ A zo te chu puan vâm silsak hi’n tiu in; hinna lekhabu a min uh chu thâimang him him pua’ng ka; Pa ma-âng leh vansawlchâkte ma-âng ah chun a min uh chu panpi zaw’ng ka.

⁶ Thagau in kochuamte kiang ah thu a gen hi, nakhang nei taphot chun he tau hen, a tii, ti in.

Philadelphia Kochuamte Kiang ah Thugen

⁷ Philadelphia khua kochuam vansawlchâk kiang ah chun, zia gual hin zik in: Zia thute hi mithiangtho leh midik, David chabi nei, kuama khâk theilo ding ah hong leh, kuama hon theilo ding ah khâk khan a gen hi:

⁸ La thil hi dante kha ka hia’i; en tiam in, la âng in kuama khâk theilo ding kot honsa’n ka koi hi; hâtna neukhat bep la nei ah, ka thu le la zawm ah, ka min le la kilepsan kha puai.

⁹ Juda tak hilo pi, juau thu Juda kitite, Setan lawi kikhopna pangsekte kha ka hun pia ahi; amau hun sawl ing ka tin, la kengbul ah kûn sak ing ka, ka hun hepi dan hi a hetna ding un.

¹⁰ Ka thu, thok gunchuna chu la vop zing ziakin, khawvel ah mi zosia patepna hung tung ding ah hin, patep ah la um phât leh keima’nle hun humbit ding ka hi.

¹¹ Hung vak ziang ding ka hi; kuama’n la lallukhuk ding chu a lâkpiak lona ding in la neisate kha pha tak in vopdet zing ta’n.

¹² Kuale a zo tapo chu ka Pathian biak In ah khuam in pansak ing ka tin, zia kipat chun pawt kît ta pua’n tin; chuleh, a chung ah chun ka Pathian min leh, ka Pathian khawpi min Jerusalem thak, van ah Pathian kiang ah kipat hung kitâwl suk min leh keima min thak chu zik ding ka hi.

¹³ Thagau in kochuamte kiang ah thu a gen hi, nakhang nei taphot chun he tau hen, a tii, ti’n a gen a.

Laodikia Kochuamte Kiang ah Thugen

¹⁴ Chun, Laodikia khua kochuam vansawlchâk kiang ah chun, zia gual hin zik in: Amen, ginum tak leh hetpi dik tak, Pathian thilsiam bul khan zia thu hi a gen hi:

¹⁵ La thil hi’dante ka henai, vot la vot lo, sat la sa lo; la sat a hem, la vot a hem ka dawi ahi.

¹⁶ Sat la sa vânglak lo, vot la vot vânglak lo, lum pel pul ah la um ziakin, ka kam ah kipat hun sêkdok ding ka hi.

¹⁷ Ka hausa hen, nei leh lam ah ka pung hen, bangma ka tasam puai, la ti’n; himaleh, nang michaga, lungsiat um leh migenthei, mitthûm leh ngawnchang la hîdan la kihiat lo ziakin,

¹⁸ la hung hausak theina dingin, sana mei ah hâl thian leh, la ngawnchang hina a kilat lona ding, puan vâm tawh ka kiang ah hung chaw ding leh, la mutheina ding ah la mit nu’ ding damdawile hung kichawk dingin, ka hun thumop la hi.

¹⁹ Ka lungsiatte chu ka gai sek ah, ka thunun sek hi; ziaziakchun, phatchuamngai inla, la lung hun hei ta’n.

²⁰ Ngaitia, kotkhak bul ah dingin ka kiu zing hi; kuale ka aw hia, kot ei la hon chu a kiang ah lut ing ka tin, a kiang ah jan an ne’ng ka tin, ama’nle kei kiang in ne’n a.

²¹ Kuale a zo te chu, keima’nle ka zaw ah, ka Pa kiang ah lalchutpha ka chut gual hin, ka lalchutpha kiang ah chutsak ding ka hi.

²² Thagau in kochuamte kiang ah thu a gen hi, nakhang nei taphot chun he tau hen, a tii, ti’n a gen a.