THUPUAN 21 - PATHIAN LEKHABU THIANGTHO (BSI)

Van Thak leh Lei Thak

¹ Van thak leh lei thak ka mu’n; van masa leh lei masa kha a bei tau a; tuisuagiat le a um ta puai.

² Khawpi thiangtho Jerusalem thak chu, monu a pawsal â ding ah kichei gual ah siam tupsa, van ah kipat kitawl suk ka mu’n.

³ Van ah kipat aw ngai tak in: “Ngaitia, Pathian biakbûk chu, mihing lak in a hung um tai. Ama chu a lak un chêng intin, amau chu a mite hi’n tiu in, Pathian ngei chu amau lak ah um intin; a Pathian uh hita’n a.

⁴ Tichun, Pathian in a mit ua kipat mitthite chu, thiak hul ta’n tin; thina um ta pua’n tin, lungngainate, kânate, natnate le um ta pua’n a; thil lui zosiate chu a bei tai,” a tia.

⁵ Lalchutpha chung ah kichu chun, “En un, bangkim ka siamthak tai,” a tia. Chun, ka kiang in, “Zik in, zia thute hi a dik in a ginum hi,” a tia.

⁶ Chuleh, ka kiang in, “Zaw ahi tai. Kei Alpha leh Omega, a bul leh a tawp chu ka hi. Dangchâk tapo chu hinna tuinâk ah tui hi a thawn in pia’ng ka.

⁷ A zo te chun zia zosia chu lua intiu in, kei a Pathian uh hi’ng ting, amau chu ka cha hi’n au.

⁸ Himaleh, mi dawilokte, ginglote, ki’dak umte, tualthatte, thanghuaite, dawi mangte, milim ho-te, juautheite zosia chun mei leh kât ah kâng meidil chang ta’n au, zia chu thi ni’na chu ahi,” a tia.

Jerusalem Thak A Muna

⁹ Chun, belbu sagi a sung ah gawtna nunung sagite ah dim chawite lak ah, vansawlchâk pakhat chu ka kiang in a hung a, “Hung tiam in, monu, Belamno ji chu etsak ing ka,” a tia.

¹⁰ Thagau in ei pui ah, tâng sâng tak leh lian tak chung in ei pui a; van ah Pathian kiang ah kipat hung kitawl suk, khawpi thiangtho Jerusalem chu ei etsak a.

¹¹ Pathian lopina chu nei in, a vak dan chu suang mantam phapen, jaspar suang gual ahi’n, krustal suang gual in a val a.

¹² Kul lian tak leh sâng tak a nei ah, kul kotkhak sawm leh pani a um un; a chung in Israel chate nam sawm leh nite min a kizik a.

¹³ Sualam ah chun kotkhak pathum a um ah, mallam ah kotkhak pathum, simlam ah kotkhak pathum, tumlam ah kotkhak pathum a um chiat a.

¹⁴ Khawpi kulbâng chun suangphûm kingakna sawm leh ni a nei a, ziate ah chun sawlchâk sawm leh nite min a chuang a.

¹⁵ Chun, ei kihopi’pa chun, a kul kotte leh bângte haw te’na ding sana te’na tiang a nei a.

¹⁶ Zia khawpi chu kil li nei ah kituak tak ah lep ahi’n; a dung lam chu a vailam chan ahi; khawpi chu te’na tiang ah chun a te’ ah, mêl sang khat leh za nga lian, a dung, a vai leh a sân lam kibang chiat ahi.

¹⁷ Kulbâng chu a te’ ah, tong za sawmli leh li ahi; zia chu mihing te’na dan vansawlchâk in a mat ahi.

¹⁸ Kulbângte chu jaspar suang ah siam ahi’n; khawpi chu sana thiang ngen ah kisa ahi; lîmlang thiangtho tak gual ahi.

¹⁹ Chuleh, khawpi kingakna suangphûmte chu suang mantam chi chuam chuam ah kichei ahi; suangphûm pakhatna chu jaspar suang, a panina chu saphir suang, a pathumna chu agate suang, a palina chu emeral suang;

²⁰ a pangana chu onik suang, a pagukna chu karnelian suang, a pasagina chu khrusolit suang a hia, a pagiatna chu beril suang, a pakua na chu topaz suang, a sawmna chu khrisopras suang, a sawm leh khatna chu jakinth suang ahi’n, a sawm leh nina chu amethis suang ahi.

²¹ Chuleh, kul kotkhak sawm leh ni te chu tuikep suang sawm leh ni ah kisiam ahi; kul kotkhak pakhat jel chu tuikep suang pakhat ah siam ahi.

²² A sung ah chun tempul ka mu pua’n, Lalpa Pathian Bangkim Hi’thei leh Belamno chu a tempul uh ahi tai.

²³ Khawpi salvâk ding ah chun nisa a ngâi pua’n, thapi le a ngai puai; Pathian lopina chun a salvâk ah, Belamno chu a vâk uh ahi tai.

²⁴ Namtin hukdamte chu a vâk ah chun leng intiu in; lei ah lalte’n a lopinau chu som lut in au.

²⁵ Chuleh, jan a um tâklo ding ziakin, a kul kotkhakte chu kikhâk ta pua’n a.

²⁶ Namte lopina leh ja’umna chu som lut hita’n a.

²⁷ Zia tak chun thilbuak hi’te lut pua’n tiu in, thil kidak um hi’te leh juautheite le lût diak pua’n au; Belamno Hinna Lekhabu min kikhumte bep lût in au.