THUPUAN 18 - PATHIAN LEKHABU THIANGTHO (BSI)

Babulon Siatna

¹ Ziazaw chun, vansawlchâk pakhat, thilhitheina nasa tak tawh van ah kipat hung suk ka mu’n, a lopina chun lei a salvâk a.

² Aw ngai tak in a hung kiko a: “Babulon khawlopi chu a chim tai! a chim tai! Thithate chênna leh thagau buak zosia kikhopna leh, vacha buak leh huat umte chênna, gamsa buak leh huat umte chênna a suak tai.

³ A thanhuainau lungnatna uain chu a dawn khawm ua, lei ah lalte chun a thanhuai piu a, amanu nopsakna ah chun, lei ah sumkawlveite a hausak khawlaw tau a”.

⁴ Chun, van lam ah kipat aw dang khat ka he kit a: “Ka mite haw, ama ah kipat hung pawt unla, a gitlonate ah la pankhâk lona ding leh, a chung ah gawtna chu la chan lona ding un, a hun tia.

⁵ A gitlonate chu van a tung tangal a, a bawsiatnate chu Pathian in a hezing hi.

⁶ Amanu’n a piak tawh kigûn in thuk unla, a thilhi chu a le’ni in dit un; nang uh â ding ah no ah a hel piak gual ah khan, ama â dingin a le’ni’n hel piak tau in.

⁷ Ama leh ama a kichawisan leh, a kinoptel dungzui in sukgimna leh, lungngaina’n vuk unla, a lungthim in, ‘Lengnu’n ka kichu, meithâi ka hi pua hen, lungngaina nei pua’ng ka,’ a ti ziakin.

⁸ Ziaziakchun, ni khat sung in a gawtna: thina leh lunggimna leh kialna tung intin; ama chu mei ah hâltum hi’n a; a chung ah vaihawm Lalpa Pathian chu a hât ngal a,” ti in.

⁹ Chun, lei a lalte a thanhuaipi sia leh a kinoptelpi sia chun, amanu kihâlna meikhu chu a mu tak ua leh, kap leh mau in a awm uh chûm in au.

¹⁰ Chun, amanu nat thokgimna ziak ah lau in gamla tak ah ding in: “Ahei! Ahei! Babulon khaw lopi, khawpi det chu la chung a gik hi, hundan kâl khat sung ah la chung ah, vaihawmna a tung ziang in,” ti’n au.

¹¹ Chuleh, lei ah sumkawlveite chu amanu sûn in kap in au; kuama’n a kiveinau thilte chu a chawk piak tâk lo ziakin.

¹² A kiveinau thilte chu sana, dangka, suang mantam, lung êk puan, puan sandup, puan sandâng, thing gimtui mantamte, saiha kisiam leh bêlte, thing man tam ah kisiam van matchâkte, sum-eng ah kisiam thilte leh thîk ah kisiam leh suangval ah kisiam thilte a hiu a.

¹³ Chuleh, thîngthâlte, thilgimtuite, gimtui kinu’thawte, begawte, uainte, Oliv sathaute, changbuangte, gehu bute, bawngte, belamte, sakolte, kângtalaite, suak leh sal leh mihing hinnate, zia te hi a hiu.

¹⁴ “Tichun, la hinna’n a ngaichâk theigate chu, la kiang ah kipat lâk mang a hita’n, mu kit talo hial ding la hi”.

¹⁵ Zia thil ah kiveite, amanu ziak ah hung hausate chun amanu thokgimna leh kâ leh mauna chu lau in gamla tak in ding ta’n au.

¹⁶ Ziaphat chuleh, “Ahei! Ahei, khawpi lopi, puan malngat leh puan sandup leh puan sandâng sil ah, sana leh suang mantam leh, tuikep suang a kicheinu chu la chung a gik hi!

¹⁷ Hun dan kâl khat sung bepcha’n, hausakna zia zozaipi kha manlo a suak ziang ta!”. Chuleh, Longpute tawh a kizoppite leh, a Long neite tawh tuisuagiat chung ah kivei zosia chun gamla tak ah dingin;

¹⁸ a kâng khu chu gâl et in: “Zia khawpi lopi gual hi, a um kit thei ta diam?” ti’n a kiko ua.

¹⁹ Chun, a luchung un leivui a kibuak khum un, a kiko ua, kap leh mau kawm in: “A chung a gik hi, a chung a gik hi! Khawpi lopi, tuisuagiat ah Long nei zosia hausak khawlawna, hun dan kâl khat sung in ama chu, bangmalo a hita!

²⁰ Aw nanghaw vante leh sawlchâk thiangthote leh jawlneite haw, amanu chung ah chun kipak ta un; Pathian chun la phubau chu amanu chung ah hin a la tai!” a tiu a.

²¹ Chun, vansawlchâk hat tak hin suang lian tak sumhêk suang gual hi a hun la, tuisuagiat in a paitha, “Babulon khawpi lopi chu zia gual hin paithâk hi’ntin, muphâk hita pua’n ah, a tia.

²² Chun, tingtang git hoi takte, La sak thiamte, lilu git hoi takte, pengkul gitte la sung ah hin, het kit ni um ta pua’n tin; chuleh, mi khutthiamte leh, thiamna chuam chuam neite le, mu phâk hita pua’n tiu in, sumhêk kihêk gitte le het kit hita pua’n a.

²³ Chuleh, la sung ah hin thaumei him him le vâk kit ta pua’n tin; la sung ah hin mo leh moneipa aw git ti le kihe ta pua’n tin; la sung ah sumkol veite kha lei miliante a hiu a, la dawi thiamna nam zosia thep zaw a um a hiu kha.

²⁴ Zia numei sung ah hin jawlneite leh, mithiangthote leh lei chung ah thâ ah um zosiate thisan chu, mudaw ahi tai,” a ti tai.