THUPUAN 16 - PATHIAN LEKHABU THIANGTHO (BSI)

Pathian Lungnatna Belbu

¹ Tempul ah kipat aw ngai tak hin, vansawlchâk pasagite kiang ah chun, “Chiau inla, Pathian lungnatna belbu pasagite chu lei ah vabuntha tau in,” a ti ka he.

² Tichun, vansawlchâk pakhatna chu a chia ah, a belbu chu lei ah a buntha ta’n: Ziaphatchun, sahâng tepte’na neite leh a lim ho-te zosia chung in meimasia huaisia leh na tak a chu tai.

³ Chun, vansawlchâk panina chun a belbu chu tuisuagiat chung ah a buntha ta’n; mithi thisan gual in a san ah, tuisuagiat sung ah hinna nei zosia a thi zo tau a.

⁴ Chun, vansawlchâk pathumna chun a belbu chu lui ah te, tuinâk ah te a buntha ta’n: lui tui zosia chu thisan a suak tai.

⁵ Ziaphatchun, tuite vansawlchâk chun: “Aw Lalpa, nangma a um tasa leh, a um lai tak leh a um kit ding chu la hi; zia tawhbang ah vai la hawm ziak hin, midik la hi.

⁶ Amau chun jawlneite leh mithiangthote thisan chu a la suau a, zia gûn chu mu tâk him a hiziak un, a dawn ding un thisan ma chu la pia ta ahi,” a ti ka he.

⁷ Chun, mâichâm ah kipat a hun dawnhuna chu ka hia’n: “Ahi, aw Lalpa Pathian Bangkim Hi’thei, zia gual tak ah chun la vaihawmna chu, a fel in a dik ahi!” a ti ka he kit a.

⁸ Chun, vansawlchâk palina chun a belbu chu nisa chung in a buntha ta’n; ama chu mei ah mi kâng gawp thei thilhitheina chu piak ahi.

⁹ Tichun, mihingte chu satna huaisia tak in a hâlkang ta’n; himaleh, zia gawtna chung ah thilhitheina neipa Pathian min chu chawihoi sâng in, a gensiau ah, a lung uh a hei diak puau hi.

¹⁰ Chun, vansawlchâk pangana chun a belbu chu sahâng lalchutpha chung in a buntha’n; a gam sung chu a thim suak ta’n, leipet hial in nat thuak in a um tau a.

¹¹ Nâsa’n, thuakgim kisa maleu, van Pathian chu a gensia zawu ah; a thil hiu ah kipat lung hei a gaw diak puau hi.

¹² Chun, vansawlchâk pagukna chun a belbu chu Euphrates luipi chung in a buntha ta’n; nisuana lam ah kipat lal hung dingte hung na dingin luipi chu a kangtan tai.

¹³ Zia lai tak chun dragon kam leh sahâng kam leh jawlnei lêm kam ah kipat chun, thagau buak pathum uphok tawhbang chiat a hung pawt uh ka mu.

¹⁴ Ziate chu thithate thagau thilmak hi’sekte kha a hiu a; amau chu Bangkim Hi’thei Pathian tawh a kidopinau ni ah gâldo ding ah lei ah lalte leh, khawvel pumpi mite kaikhawm ding ah hung kuandok a hiu hi.

¹⁵ (Ngai un, gucha gual in ka hung hi. Kuale kiging zing ah umte leh puanchêng zingte chu mi hampha a hiu. A la kiginglote chu ngawnchang in um intiu in, mualpho in au.)

¹⁶ Amau chu Hebrai pau ah, Harmagedon a ti’na mun ua chun a pui khawm tau a.

¹⁷ Chun, vansawlchâk sagina chun a belbu chu vanlaijawl in a buntha ta’n; van ah tempul leh lalchutpha kipat chun aw ngai tak in, “Zaw ahi tai,” ti’n a hung kiko a.

¹⁸ Ziaphatchun, awte, kawlphete, van-gite a hung pawt ah; linlîng huaisia tak a hung ling ah, lei ah mihingte um nung a hin zia gual ah linlîng nasa hi a um kha nai puai.

¹⁹ Tichun, khawpi lopi chu mun thum in a hung kikhen ah, namte khawpi chu a chim tai; chun, Pathian in Babulon khawlopi tatdan chu a hezing ah, a lungnatna uain hai chu a butthâk khum ta ahi.

²⁰ Tuikual gam zosia chu a jam mang tau ah; tângte le muphâk a um ta puau hi.

²¹ Van ah kipat in gial lian tak tak, pakhat gik dan chu talent khat bûk chu mihingte chung in a ke ta’n; zia gawtna chu a nasa ma ma ah, zia gual ah gawt ahi’nung unle mite chun Pathian a gensia nalai ui.