THUPUAN 15 - PATHIAN LEKHABU THIANGTHO (BSI)

Gawtna Chi Sagite

¹ Van ah chun tepte’na lopi leh lamdang tak khat ka mu’n; vansawlchâk pasagi, gawtna chi sagi chawi a um un; zia gawtna chu Pathian lungnatna kichaina ahi tangal a.

² Limlang tuipi hileh kilawm mei tawh kihel ka mu’n; sahângte, a teptênate, a limte, a min nambarte, zo ah hung pawtte chu Pathian tingtang chawi in, limlang tuisuagiat chung ah chun a ding tau a.

³ Pathian suak Mosi La leh Belamno La chu a sau a: “Bangkim Hi’thei Lalpa Pathian, la thilhite chu a mak in a lopi hi; nang kumtuang Lal, la lampite chu a fel in a dik hi.

⁴ Aw Lalpa, kua a hem nang lau lo ah, la min chawihoi lo ding um? Nang bep chu thiangtho la hi’n, nam zosia hung intiu in, la ma’n hung bokkhup ding a hiu, la dikna nasepte chu a kilat tâk ziakin,” ti in.

⁵ Ziazaw chun, ka et kit leh, van ah hetpina biakbûk sungnung chu a hung kihong a.

⁶ Ziaphatchun, gawtna sagi nei vansawlchâk sagite chu puan thiangtho vâm sil in, a awm ua sana gâkna kigâk in a hung pawt tau a.

⁷ Thilhing palite lak ah pakhat chun, vansawlchâk sagite kiang ah chun, sana belbu pasagi sung ah kumtuang ah hing zing, Pathian lungnatna dim chiat chu a pia.

⁸ Ziaphatchun, tempul chu Pathian lopina leh thilhitheina khu’n a dim ta’n; vansawlchâk pasagite’n gawtna pasagi chu a sukbutin masiau tempul sung ah chun kuama a lût thei ta puau hi.