THUPUAN 14 - PATHIAN LEKHABU THIANGTHO (BSI)

Belamno leh Mi Nuai khat Sîng li leh Sang lite

¹ Ka et leh, Belamno, Zion tâng ah ding leh, A min leh a Pa min a chal ua kizik, mi nuai khat sîng li leh sang li te tawh ding ka mu’n.

² Van ah kipat tuipi luang leh van-git thupi tak gual aw gi ka he; tingtang saite tingtang gi tawhbang le ka he.

³ Ziate chun, lalchutpha leh thilhing palite leh upate ma ah chun La thak a sau a. Lei ah kipat tatdaw tâk mi nuai khat sîng li leh sang li te longal kuama’n zia La chu a hethei puau hi.

⁴ Ziate chu numei lak ah kihi’buaklote a hiu a; kikoi thiangtho zing a hiu hi. Amau chun Belamno chu a chiana lam lam in a zui ua, Pathian leh Belamno â ding ah ga masa pen hiding ah mihing lak ah kipat tatdawte chu a hiu.

⁵ A kam ua pat chun juau a pawt pua’n, demna bei a hiu.

Vansawlchâk Pathumte Thugen

⁶ Chun, lei ah um nam tin, chitin, pautin leh mitinte kiang ah gen ding, kumtuang chanchinpha nei vansawlchâk pakhat vanlai jawl ah lêng ka mu’n.

⁷ Ama chun aw ngai tak in, “Pathian chu lau unla, choihoina piau in; a vaihawm hun a tung tangal a; ama chu lei leh van leh tuisuagiat leh tuinâkte siampa chu a hiziak in bia un,” a tia.

⁸ Chuleh, vansawlchâk panina a nung ah chun a hung kit ah, ama chun, “Thanhuaina, lungnatna uain, nam zosia dawnsak sek, Babulon khawpi chu a chim tai! A chim tai!” a tia.

⁹ Vansawlchâk pathumna chun, a masate chu zui in, aw ngai tak in, “Kuale sahâng leh a lim bia leh a chal a hem, a khut a hem ah tepte’na nei chu,

¹⁰ ama chun Pathian lungnatna uain, bangma tawh hel lo, a lungnatna no ah kisung chu dawn intiu in, vansawlchâk thiangthote leh Belamno ma-âng in mei leh kât ah sukgenthei hi’n au.

¹¹ Amau a sukgentheinau meikhu chu kumtuang in khu to intin, sahâng leh a lim bia ah, a min tepte’na neite kha sûn leh jan ah chawldam ta pua’n au,” ti in.

¹² Zia hin mithiangtho, Pathian thupiakte zui leh Jesu â ding ah ginum zingte, gunchuna nei ding ah chialna a um hi.

¹³ Chun, van ah kipat aw chun, ka kiang in, “Zia hi zik in: Tu’ ah kipat hin mithite, Lalpa ah thite chu a vang uh a phai; ahi, a sepgimnau ah kipat chun chawldam ta ding a hiu; chuleh, a nasepteu chun zui pek in a, ti’n Thagau in a gen hi,” ei tia.

Lei Bulâkna

¹⁴ Chun, a chung lam ka et leh, sûmpi vâm tak a hung um ah, a chung in Mihing Chapa hileh kilawm khat a um ah, a luchang ah sana lallukhuk a khuk ah, a khut in kawite a choi ka mu’n.

¹⁵ Tempul ah kipat chun vansawlchâk pakhat a hung pawt ah, sûmpi vâm chung ah kichupa kiang ah chun aw ngai tak in, “La kawite kha hun pan inla, ât ta’n; ât phat ahi tai, lei bute chu a minkuai zo tau hi,” a tia.

¹⁶ Sûmpi chung ah kichupa chun, lei lam in a kawite a hun lâm ah, lei bu chu a ât tai.

¹⁷ Chuleh, van ah tempul ah kipat in vansawlchâk pakhat a hung pawt kit ah, ama chunle kawite hiam tak a chawi a.

¹⁸ Vansawlchâk dang pakhat, mei chung ah thunei pen chu mâichâm ah kipat in a hung pawt a; ama chunle aw ngai tak in, “La kawite hiam tak kha pan inla; lei ah grep ga bawkte khu ât in; zia grep gate chu a minjun zo tau hi,” ti’n kawite hiam tak neipa kiang ah chun a hun gen a.

¹⁹ Zia vansawlchâk chun a kawite hiam tak chu a pan ah, lei ah grep gate chu a ât ta’n; ziate chu Pathian lungnatna khuk ah chun a sep lut tai.

²⁰ Khawpi kul pawlam ah uain sûkna khûkpi ah chun a sûk tau a, zia uain sûkna khûk ah kipat chun thisan a luangdok a; zia chun mêl za ni tiang a chûm ah, sakol kamkaina tiang in a thûk hi.