THUPUAN 13 - PATHIAN LEKHABU THIANGTHO (BSI)

Sahâng Pakhatna

¹ Sahâng pakhat luchang pasagi leh kî sawm nei; a kîte ah chun lallukhuk sawm leh a luchangte ah chun Pathian gensiatna min kizik, tuisuagiat ah kipat hung pawt chu ka mu’n.

² Zia sahâng ka mu chu gialbem gual mêlpu a hia, a keng chu savom keng gual a hia, a kam chu sakeibaknei kam gual ahi. Dragon chun, a lalchutpha leh a thilhitheina, chuleh thuneina le a pia’n.

³ Ahi’n, a luchangte lak ah pakhat chu thi’pi thei ding khop ah liam in ka mu’; himaleh, thîpi thei khop ah liam chu a hung dam ta’n; ziaphatchun, van nuai ah mite chun zia sahâng chu maksa tak in a zui tau a.

⁴ Zia sahâng thilhitheina pepa dragon chu a ho tau a. “Zia sahâng gual hi kua dang a um em? Ama do thei dingle kua dang um ding a hem?” ti’n sahâng chule a ho tau hi.

⁵ Ama chu pau uanna leh Pathian gensiatna kam piak in a um ta’n; chuleh tha sawmli leh tha ni tiang thilhitheina a mat phal piak ahi tai.

⁶ Tichun, Pathian gensiatna’n a kam a ka’n; a min leh a mâichâm leh van ah um zosia chu a gensia tai.

⁷ Mithiangthote do theina leh zawtheina piak ahi’n; chitin, pautin, mitin leh namtinte chung ah thilhitheina piak ahi.

⁸ Khawvel siamtil ah kipat tha’sa, Belamno hinna Lekhabu min kikhum lo tapo leh, lei chung ah um zosia chunle ama chu hun be ta’n au.

⁹ Kuale nakhang nei chun he tau hen:

¹⁰ Kuale sal ah puite chu sal ah pui in um intiu in; chemjam ah mithatte chu chemjam ma’n thi’n au. Zia hi mithiangthote thok-hatna leh, ginna nei ding ah chialna ahi.

Sahâng Panina

¹¹ Chun, sahâng dang lei ah kipat hung pawt ka mu’n; belam gual in kî pani a nei ah, dragon pau gual in a pau a.

¹² Ama chunle sahâng masa zawk thilhitheina kha a nei ah, lei leh a chung ah um zosia chu thi theina hial ah liam ah hung dam kit sahâng masa kha a hosak tai.

¹³ Chuleh, mihingte mit mu in van ah kipat meikuangte lei ah kiakthâk sak in thilmak tak tak le a bawlsak hi.

¹⁴ Sahâng mit mu ah thilmak hi’theina ama piak ahi dungzui in, lei ah umte chu a thêm zo a; lei ah umte kiang in chemjam ah sat liam, dam kit ta, sahâng lim chu siam dingin thu a pia’n.

¹⁵ Ama chu, zia sahâng lim chu hinna pethei ding leh, pausak thei ding leh, zia sahâng lim chu ho nuam lo tapo tha’theina chu piak ahi.

¹⁶ Mi zosia, a lian a neu, a hausa a chaga, suak leh suaklote chu a khut changlam, ahiloleh, a chalkiu ah tepte’na a neisak chiat ua.

¹⁷ Zia tepte’na sahâng min a hem a nambar a hem, neite longal chun, bangma a zok leh a chawktheilona ding un.

¹⁸ Zia hin pilna ding a um hi, kuale hetthiamna nei chun sahâng nambar chu sût uh hen; zia chu mihing nambar ahi ngal ah; a nambar chu za guk sawmguk leh paguk ahi.