THUPUAN 12 - PATHIAN LEKHABU THIANGTHO (BSI)

Numei leh Dragon

¹ Van ah chun tepte’na lopi tak pakhat a hung kilang a; numei pakhat, nisa kithuam, a keng nuai ah thapi um, a luchung ah lallukhuk aksi sawm leh ni nei a khuk a.

² Amanu chun nau a vop ah, nau suak ding kuan nat thuak in a hâm a.

³ Zia ban ah chun, tepte’na dang pakhat a hung kilang kit a: Dragon san lian tak pakhat, luchang pasagi tawh kî sawm nei, a luchung ah lallukhuk pasagi khuk a hung kilang a.

⁴ A mei in van ah aksi mun thum ah khen mun khat jat chu a luaitha, lei a chun a septha; zia numei nau chu a suak phat leh a la val zo ziang dingin numei âng ah chun a ding zing a.

⁵ Amanu chun chapa a hun nei ah, ama chu nam zosia chung ah thik tiang a vaihawm ding chu ahi; ziaziakchun, a nausen chu Pathian kiang ah lalchutpha umna chun lâk to in a um ngal tai.

⁶ Chun, numeinu chu ni sang khat za ni leh sawmguk vâk ah a umna ding mun, Pathian mun guanggal piakna gamthip ah chun a jam mang tai.

Mikael in Dragon A Zawna

⁷ Ziaphatchun, van ah kidona a um ta’n; Mikael leh a van sepaite chun dragon chu a do un; dragon chunle vansawlchâkte chu a do un;

⁸ a zo puau ah; amau â dingin van ah chun mun a um ta puai.

⁹ Dragon lian, zia gulpitêk Diabol, Setan kiti, khawvel ah mi zosia thêmpa chu lei lam ah a nawtha tau a; chuleh, a sepaite le a nawtha khawm tau hi.

¹⁰ Chun, van ah kipat aw ngai tak ka he: “Tu’hin a hung tung tai; I Pathian Hukdamna, thilhitheina leh, a Khrista thuneina’n; I suapite hêkpa, I Pathian ma ah sûn leh jan ah amau hêkpa kha, paithâk in a um tangal in.

¹¹ Belamno thisan ziak leh, amau thu hiatsakna ziak leh, a hinnau chu thi ngam ah îtcha lo ah a la pan ziak un, zawna chu a chang tau hi.

¹² Ziaziakchun, nanghaw vante leh a sung ah umte haw, kipak un; chuleh, lei leh tuisuagiat ah chêngte chung chu a gik hi! Diabol chun hun chomcha bep nei ahi ti a kihiat tâk ziakin, lungna tak in lei lam ah a hung suk tai,” a tia.

Dragon in Lei ah umte A do-na

¹³ Dragon chun, lei ah paithâk ahi ti a kihiat phat chun, numei chapa hingnu chu a delzui ta’n.

¹⁴ Numei chu, hun khat, hunte leh hun kim khat sung, zia gûlpi ah kipat chu jam mang ah gamthip ah ama vâk ah a umna mun ah leng lut dingin mupi thâ pani a piau a.

¹⁵ Numei chu tui in a tawman dingin a kam in tuikhang gual zet in, tui a phidaw khum pek a.

¹⁶ Himaleh, lei chun numei chu a la panpi ziakin, a kam ah tui a phidaw chu a la val zo kit jel sek a.

¹⁷ Tichun, dragon chu numei chung in a lungna deu deu ah, a suante, Pathian thupiak zui ah, Jesu Khrista hiatsakna pom a la um nalaite chu do dingin a kipandok tai.

¹⁸ Ziaphatchun, tuisuagiat pâm ah piaunêl chung in dragon chu a hung ding tai.