THUPUAN 11 - PATHIAN LEKHABU THIANGTHO (BSI)

Hiatpitu Panite

¹ Chuleh, luang tiangkhut tawh bang pakhat ei piau a; vansawlchâk ding zing chun, “Kipan inla, Pathian tempul leh mâichâm leh a sung ah ama ho-te kha te’ in,” ei tia.

² “Ahi’n la, Pathian tempul paw lam huang sung hivang te’ kin, Jentelte kiang ah piak ei tai; chuleh, amau chun zia khaw thiangtho hi tha sawmli leh tha ni chuan dên in au.

³ Ka thu ei hetpi panite kiang in thu pia’ng ka tin, amau chun saidippuan sil in ni sang khat za ni leh sawmguk sung thu gen in au,” a tia.

⁴ Ziate pani chu Oliv thing pani leh thaumei tunna pani, lei Lalpa ma ah dingte chu a hiu a.

⁵ Amau chu min hi’nat a guat ua leh, a kam ua pat mei pawt chun a gâlteu chu a kâng tum mai sek un; tichun kuale amau hi’nat gaw tapo chu thâ ah um jel ding a hiu.

⁶ Ziate chun a thugen sungsiau guazu lo dingin van hi’pin theina a nei un, tuite le thisan suaksak theina a nei un; chuleh a nop hun hun un khawvel ah hipi lênsak ah sukchimit theina a nei ui.

⁷ Chun, a hiatsakna thuu chu a gen zawu leh, lei kawkhuk tawp nei lo ah sahâng hung pawt khan amau do in, hun zo in, hun that in a.

⁸ A luang uh chu khawpi lai, lamlian ah sial intin uh, zia khawpi chu thagau lam thu ah Sodom leh Aigupta a hia; zia tak ma chun a Lalpau kros in a khenden ui.

⁹ Chun, mipite, namtin leh pautinte leh gamtin ah mite’n zia mithiluang chu ni thum leh a kimkhat sung en intin uh, vui dingle phal pua’n au.

¹⁰ Amau teni chung ah chun lei ah chêngte chu kipak intin uh, limna bawl intin uh, thilpiakte kithot tua intin uh; amau chun lei ah mite a hi’genthei ma ma ngal un.

¹¹ Chun, ni thum leh a kimkhat zaw phat chun, Pathian ah kipat hinna thagau chu a sung ua hung lut in, a keng un a hung ding ua, a mu tapo chu a lau tau a.

¹² Amau chun, “Zia lam hin hung to un,” a ti’na aw ngai tak, van ah kipat hung gi chu a he tau a; tichun a mêlmateu in en zui kawm in sûm lak ah van lam in a chia to tau hi.

¹³ Zia hundan sung ngei ah chun lîn nasa tak leh huaisia tak a hung kilîng a; khawpi mun sawm ah khen mun khat chu a chim ta’n; linlîng ah chun mi sang sagi a thiu ah; a thi bang sunte chu a lau ma mau ah, van Pathian chu lopina a pia tau hi.

¹⁴ Tichun, chunggikna panina chu a kichai ta; chunggikna pathumna chu hung tung ding ahi tai.

Pengkul Pasagina

¹⁵ Chun, vansawlchâk pasagina chun a pengkul chu a mût leh, van ah aw thupi tak a hung gi’, “Zia khawvel lenggam hi Lalpa leh, a Khrista gam a hita hen; ama chun kumtuang in vaihawm ta’n a,” a hun tia.

¹⁶ Chun, Pathian ma-âng ah upa sawmni leh pali chutna a la chute khan, a mai ua leitual si’ bokkhup ah Pathian bia’n, zia La hi a sau a:

¹⁷ “Aw Lalpa, Pathian Bangkim hi’thei, um tasa leh um lai tak leh, hung um kit ding kiang ah chun, kipakna ka hun piau hi; la thilhitheina lopi chu la kilâk a, vaihawmna chu la chang tai.

¹⁸ Namte chu a lungna tau a, nangma lungnatna le a hung tung tai; mithite vai la hawm piak ding hun leh, khawvel hi’sete la hi’siatna ding hun tawh, la suak jawlneite, mithiangthote, la min ja, milian leh mineute kipakman, la piak hun chu a hung tung tai,” a tiu a.

¹⁹ Tichun, van ah Pathian tempul um chu a hung kihong ta’n; a thuthung thingkuang chule tempul ah mu thei in a um tai; ziaphatchun, kawlphete, awte, van-gite leh linlîngte hung um in, gial nasa takte a hung ke tai.