THUPUAN 10 - PATHIAN LEKHABU THIANGTHO (BSI)

Vansawlchâk leh Lekhabu Zial Neu

¹ Vansawlchâk hât tak a dang khat, sûm ah kithuam, van ah kipat hung ka mu; a luchung in uizo a jam ah, a mêl chu nisa gual in a vâk ah, a keng chu mei khuam gual ahi.

² A khut in lekhabu neucha khat phêtsa’n a chawi ah; a keng changlam in tuisuagiat a chuan ah, a veilam in mualkâng a chuan a.

³ Sakeibaknei kitom gual in aw ngai tak in a kiko ah; a kiko zaw in van-gi sagite chun a awu a sua tau a.

⁴ Van-gi sagite’n a awu a sua phat un, zik ding ka guat leh, van ah kipat awgi chun ka kiang in, “Zia van-gi sagite thugen chu zik kin la, îmchak kei in,” ei hun tia.

⁵ Ziazaw chun tuisuagiat leh lei chuantua ah ding vansawlchâk ka mu khan, a khut van lam in a jak to a:

⁶ Van leh vanlai jawl ah thil um zosia, lei leh a chung ah thil um zosia, tuisuagiat leh a sung ah thil um zosia siamtu, kumtuang ah hing zing min ah chun a kitiam a: “Hun chu sawt nawt ta pua’n a.

⁷ Vansawlchâk sagina chun pengkul mût ding ah kisa’n, a aw sua nite chu a tun phat leh, a suak jawlneite kiang ah a la gen gual khan, Pathian thugûk chu bukim ta’n a,” ti in.

⁸ Van ah kipat aw ka het khan, thu ei gen kit a: “Chia inla, tuisuagiat leh mualkâng chuantua, vansawlchâk khut ah lekhabu neucha phêtsa kha vala’n,” ei tia.

⁹ Vansawlchâk kiang ah chun ka vachia ah, a kiang in, “Lekhabu neu chu ei pia’n,” ka ti’n. Ama chun, “La’n la, ne zo in; la kam in khuaizu gual in thum intin, la gilpi chun vang kha ma ma in a,” a tia.

¹⁰ Tichun, lekhabu neu chu ka la, ka ne zo ta’n; ka kam in khuaizu gual in a thum ah, ka nêk zaw phatin ka gilpi chu âichîm khât in a kha tai.

¹¹ Ama’n ka kiang in, “Mi tam tak, nam tam tak, pau tam tak leh lal tam takte ma ah ka thu gen nalai ding la hi,” ei ti tai.