THUPUAN 1 - PATHIAN LEKHABU THIANGTHO (BSI)

Kochuam Pasagite Chibai Bûkna

¹ Jesu Khrista thupuan, Pathian in a suakte kiang ah hiatsak ding ah a piak, thil hung um pai dingte chu; zia chu a vansawlchâk hun sawl in, a suak Johan chu a hun musak ta’n;

² ama chun Pathian thu leh Jesu Khrista chanchin hiatsak ah um leh a thil mu zosia chu a zik a.

³ Kuale ziate hi simdok ah, zia thu kigenlawk thute hi he’, a sung ah kizikte zui chu mi hampha hi’n ah, a hun a nai tangal a.

⁴ Kei Johan hin, Asia gam ah kochuam pasagite kiang ah chun, a um lai tak leh, a umsa leh a hung um ding ah kipat leh a lalchutpha âng ah um, thagau pasagite ah kipat chun;

⁵ Jesu Khrista, hiatpitu ginum leh, mithite lak ah suakdok masa pen leh, lei ah lalte vaihawm piak ding pa ah kipat chun, hepina leh chamna la chung un um ta hen.

⁶ Chuleh, ei hepi ah, gitlona kipat a thisan in ei tandok ta’n, a Pa leh a Pathian lam ah lal leh thiampu ei siampa kiang ah chun, lopina leh thuneinate kumtuang in um ta hen.

⁷ En un, ama chu sûmpi khi tawh hung ding ahi, mit zosia’n hun mu’n au, a nâk a la sunte ma ma khanle; chuleh khawvel ah nam zosia’n ama chu sûn in kâ in au. Ahi, Amen.

⁸ Kei Alpha leh Omega, a bul leh a tawp chu ka hi, Lalpa Pathian, um lai tak leh umsa leh hung um ding, bangkim hi’thei chun a tii.

Mihing Chapa A Muna

⁹ Keima Johan, la suapiu leh la thok gimpiu, a lenggam â ding leh Khrista ah thok gunchuna lam ah le la thokpiu hi, Pathian thu ziak leh Jesu Khrista thu tak ziakin, Patmos tuikual khum gam ah chun ka la um a.

¹⁰ Lalpa ni’ chun thagau in ka hung um ah, zia lai tak ah chun pengkul gi gual in aw ngai tak in,

¹¹ La thil mute chu lekhabu sun inla, kochuam pasagite kiang ah thot in: Ephesa, Smurna, Pergamum, Thuatira, Sardis, Philadelphia leh Laodikia khuate ah, a ti ka hia’n.

¹² Ziaphatchun, ka kiang ah thu hun genpa chu mu gua’n ka vak kihei leh, sana thaumei koina pasagi ka vak mu’n;

¹³ zia thaumei koina pasagi lak ah chun, mihing chapa hileh kilawm tak, a puanâk a kêngpek chan ah chual, a tai ah sana kawnggâk gâk chu ka mu’n.

¹⁴ A luchang leh a sam chu belam mul vâm tak gual in a vâm a, vûk gual in a vâm in; chuleh, a mit chu meikuang gual ahi.

¹⁵ Chuleh, a kengte chu sum-eng kinawt val tak gual ahi’n, hâlthianna mei ah hâl thian, val sit set gual ahi; a aw chu tui tam tak luan git gual ahi.

¹⁶ Chun, a khut changlam ah chun aksi pasagi a chawi ah; a kam ah kipat chun chemjam hiamtua hiam tak gual in a hung pawt ah; a maisua chu nisa a sat phat lai tak gual ahi.

¹⁷ Zia gual ah ama ka mu phât chun a kengbul ah mithi gual in ka kipûk ta’n. Chuleh, ama chun a khut changlam ka chung ah koi in, “Lau kin, a masa pen leh a nunung pen chu ka hi.

¹⁸ Kei chu khatvei thisa, himaleh, hing kit ta chu ka hi; ngaitia, kumtuang â ding ah hing zing chu ka hi tai, thina leh mithi khua chabi chu ka nei tai.

¹⁹ Ziaziakchun, la thil mute, thil um zingte leh tu’nung ah hung um dingte chu zik in.

²⁰ Ka khut changlam ah aksi pasagi la mute leh, sana thaumei koina pasagi la mute umzia thugûk chu: Aksi pasagite chun kochuam pasagite vansawlchâkte chu a etsak un; chuleh, thaumei pasagite chun kochuam pasagite chu a etsak ui,” a hun ti tai.