THUPILTE 8 - PATHIAN LEKHABU THIANGTHO (BSI)

Pilna Thilpiakte Chu

¹ Pilna chu kiko in, hetthiamna chun a aw a sua pua a hem?

² Lam pâm ah mualbawkte leh, lamthuamte ah ding tawl tawl in;

³ khawpi lûtna kêlkot bul leh, In lûtna kotbulte ah chun, ngai tak in a kiko tawl tawl a:

⁴ Aw nanghaw mihingte haw, ka hun uau la hiu, ka kona aw hi mihing zosia â ding ahi.

⁵ Aw nang uh mimawlte haw, pilna hi zil un; nang uh hetna neilote haw, chitna lungthim hi nei tau in.

⁶ Ngai un, thugun tak hun gen ding ka hi, ka kam ah kipat in thudik tak ngen, hun gendok ding ka hi;

⁷ ka kam in thudik tak gendok intin; diklona thu gen chu ka mûk â dingin, ki’dak um tak ahi ngal a.

⁸ Ka kam ah kipat thu pawt zosia chu, dikna dim ngen ahi’n; thu kawi leh lamzang lo him him a um puai.

⁹ A hechiante â ding chun bailam tak ahi’n; hethiam theite â ding chunle a dik sik sek ahi.

¹⁰ Ka hilna thu hi dangka sâng in kisân unla; hetthiamna hile sana têlchuamte sâng in kitêl tau in;

¹¹ Pilna chu suang mantam sâng inle a phazaw’n, la thil dawi zosia tawh le te’pi thei ding gual ahi puai.

¹² Keima, pilna kiti hi pil kiau ah khawsa ka hi’n, hetthiamna leh thil khenthiamna ka nei zing hi.

¹³ Lalpa launa chu thil phalo huatna ahi. Chapona leh kihisakna leh, thil phalo chîngte leh a kalek ah thugente hi, ka huat lam tak ahi.

¹⁴ Lemguatna leh hetna dik tak chu ka nei in, hiatthiamna leh hatna ka nei hi.

¹⁵ Keima ziakin lengte chun vai a hawm un, keima ziakin vaihawmte chun, a dik in thu a ta’n thei ui;

¹⁶ keima ziakin vaihawmte’n vai a hawm un, miliante’n le dik tak in, thu a ta’n thei uh ahi.

¹⁷ Keima ei ngaina chu ke’n le ka ngaina, gunchu tak ah ei hawlte chun ei mu’n au.

¹⁸ Hausakna leh jana ka kiang in a um un, hausakna leh vangphatna dai sawt takte ngei chu ahi.

¹⁹ Ka ga chu sana thiang sâng in a phazaw’n, ka lamdaw chu sana leh dangka thiangtho pen sâng inle a pha zawi.

²⁰ Dikna lampi chu ka haw in, diktatna lampi chu ka zui in;

²¹ ei ngainate â ding ah go lûl tak, ka bawl piak theina dingin, a gobawmteu ka hi’dim zing hi.

Thilsiamna Pathian Pilna Panna

²² Lalpa‘n a thilsiam bul pen in ei la din ah, tuan ah tâng ah a thilsiam bul pen ka la hi.

²³ Kumtuang ah kipat leh leilung kisiam ma him inle, a lim tak ah kipat in sukdet ka la hi tai.

²⁴ Tuisuagiat kisiam masang leh, tuiluang kipatna tuinâkte um ma khan le siam ka la hi tai.

²⁵ Tângte a din masang leh, mualte le a um masang inle ka la um ta’n,

²⁶ leilung leh gamte a la din masang leh, khawvel ah leivui mal khat ziang le a um masang khan le.

²⁷ Vante a hidet lai leh tuisuagiat gamgi dingte, a gitkual lai ah khanle, ka la um ta’n;

²⁸ chung lam ah vante a hidet lai leh, tuisuagiat nâkte a siam lai ah khanle ka la um ta’n;

²⁹ tuisuagiatte’n a thupiak a bawsiat lona ding ua, gamgite a siam piak lai leh, leilung kingakna ding a la guanggal lai ah khanle, ka la um ta’n;

³⁰ zia lai ah chun a kiang ah nasem hotu gual in ka la um ta’n; nisi’n in a kipakna ka hizing a, a ma-âng in kipak zing in, kei chule a kipakna ka hi zing hi.

³¹ Pathian in chênna ding ah a siam lei chung ah hin, lim tak in um ing ka tin; chuleh, mihing chate lak ah kipak tak in um ing ka.

³² Tu’hin chu ka chate haw, ka thugen hi a la ngai un: ka hilna lampi hawte chu mi vangpha a hiu.

³³ Zilgaina thu mang in hung pil tau in, ngaisak lo in um kin.

³⁴ Nisi’n ka kêlkot bul ah hung ngâk zing ah, ka kotbul ah ka thu hung ngaithate chu, mi vangpha a hiu.

³⁵ Ei mu tapo chun hinna a muu a, Lalpa doisakna le a chang sek un;

³⁶ ei mu lo tapo chu vang, ama leh ama kihiliam ahi’n; ei muda zosia chu thi’na dawi a hiu, ti in.