THUPILTE 7 - PATHIAN LEKHABU THIANGTHO (BSI)

Ângkawm Ding Ah Hîpna Lêmte

¹ Ka cha, ka thu pom inla, ka thupiakte khol khawm in;

² ka thupiakte zawm inla, hinna’n nei in; ka thuhilte hi mitnaucha gual in chingtup inla;

³ la khutzungte ah chun but inla, la lunggil suangpêk ah chun zik lut in.

⁴ Pilna kiang ah chun, “Nang hi ka suapinu la hi,” ti’n la; hiatthiamna chu la gualpha pen hisak inla,

⁵ numei thanghuai lak ah hun vêng ding leh, numei jawntatnu kamthiam zawlna kipat hun chingtup dingin.

⁶ Ka In tukvan jawngdaikal ah kipat in ka vak gâl et a;

⁷ mi gi’nalo tangval lak ah chun, ngaituana neilo tangval khat ka vak mu’n,

⁸ numeinu umna lam kotzing ah chun a chia ah, amanu In lam zuan ah lampi chu a zui ta’n;

⁹ thimbut inle, nitâk lam inle, jan leh khawthim tiang inle.

¹⁰ Ziaphatchun, nawchizuak van ah kithuam, zum leh jal tua lungthim pu numei khat in a hun zuan hi.

¹¹ Numei khawksak bei leh thawmpawng, a In ah le bek man lo khat ahi’n;

¹² kotzing ah um a hem I ti leh lamka thuam a la tung; kil tin ah mi changgu tawl tawl sek ahi.

¹³ Tangval chu kawi in a chawp ah, tângnêl tak mêlpu’n a kiang in:

¹⁴ “Kichamna thillat ah piak ding ka nei tai, tu’ni hin ka kipautiamna ka mualsua tai;

¹⁵ ziaziakchun, gunchu tak ah nang hun hawl dingin, ka hung pawtdok in, tu’hin ka hun mudok tai.

¹⁶ Ka lupna puanpha hoi tak in ka phâ zo ta’n, Aigupta gam ah kipat puan nem jempawlte ngei chun;

¹⁷ ka jalkhunte chu murrate, aloete leh thinggai gimtui chun ka hi’dim tai.

¹⁸ Hung inla, jan khawvak in, I nopna doikhop tak in, nopchên hi tin, hepina’n kihidangno tua hi ti:

¹⁹ ka pawsal lah a um pua’n, khual gamla tak in a zin ngal a.

²⁰ Paisa dip dim in a kipuak in, tha kit leh hung tung kit bep ding ahi ngal in,” a tia.

²¹ A kamthiamna chun a jawl pûk ta’n, a kigen hoithaw’na chun a thunun tai.

²² A zui ngal ta’n, bawng in a kithâna ding mun a zot gual leh, sazuk in a awkna ding thâng a zot ah,

²³ thalpi’n a thin a lung a sutlet ding zuan gual leh, vacha’n a thi’na ding thâng ahi ti helo ah, a zot gual in a zuan tai.

²⁴ Tu’hin, ka chate haw, ka thugen hi ngai phau inla, ka kam ah thupawtte hi awi tau in.

²⁵ La lungthim un zia nu lampi chu zui kiu inla; a lampite chunle kivailut kiu hen;

²⁶ zia nu hin pawsal tam tak a la hi’liam ta’n, mihat lai tam tak a la that gam ahi ta’ngal in.

²⁷ A In chu Sheol khua lam zotna ahi’n, thi’na pindan ah lut suk ah chia ahi.