THUPILTE 5 - PATHIAN LEKHABU THIANGTHO (BSI)

Chawn Thanghuai lo Ding Ah Hilna

¹ Ka cha, ka pilna thu ngaitha’n la, hetthiamna thu ah hin la bil daw in;

² suangtua thiamna la vop ah, la mûk in hetna a vop theina dingin.

³ Numei thanghuai mûk ah chun, khuaizu a vatha ngal a; a kam le sathau sâng in a zol zawi;

⁴ ahi’n la, a tawpna chu gamsâi gual in a khâ’n, chemjam hiamtua sâng inle a hiam zawi.

⁵ Thi’na lam zuan in a chia suk in, a kalsuan chun Sheol lam a zuan hi.

⁶ Hinna lampi a mansua in, a lampite chu a zuikhial ta’n; maleh, ama’n zia chu a hepuai.

⁷ Tu’hin, ka cha, ka thu hi ngaitha’n la, ka kam ah thu pawtte hi kihei mangsan kin.

⁸ Ama chu gamla tak in pêl mang inla, a kotbul nai inle chia kin,

⁹ achutiloleh, la za umna chu hung bei intin, la damsung ah ja’ngaina dong lo in um kha’n la.

¹⁰ Chutileh, gamdang mite chu la nei nunna chun hitai in la tin; la sepgimna chu het ngai lo mite In ah um kha’n ah;

¹¹ la taksa leh thazung a kan phat leh, la hun tawp lam chu kâ na’n hun mang tum kha’n la;

¹² ziaphat chuleh, “Bangtidan ah thununna ka la huat ah, ka lunggil in zilgaina chu, ka la ngainêp a hita dia aw!

¹³ Ei hilte thu lah ka zui pua’n, ei zilgaite lam in ka bil ka la daw ta paw’ngal a.

¹⁴ Ahi’n, kei lah mipi kikhawmte lak ah hin, siatna huaisia tawp tuak ding chu la, ka hita mai in,” hun ti ding la hi’ngal a.

¹⁵ Nangma tuibêl ah kipat in tui dawn inla, la tuikhuk ah kipat chun tuithâl in.

¹⁶ La tuinâkte chu gamtin ah pût in, kotzing tin ah chun tui luang ding ahi nam?

¹⁷ Ziate chu nang â ding bep hi hen la, mêl hetlote kikoppi kin.

¹⁸ La tuikhuk chu maljawl in um hen la, la khangdawng lai ji chung ah lungdam in,

¹⁹ sazukchal doi um tak leh sazukpi nal tak gual in, bangtik lai inle a ânglai chun, hun hilungkim zing hen la, a dawichâkna chun hun hilim zing ta hen.

²⁰ Bangtidan ah nang ka chapa’n numei chavai la lop ah, thanghuainu chu ânglai sia ding la hem?

²¹ Lalpa‘n mihing lampite chu a enkâi zing in, a lampiteu chu a enchian zing sek ngal a.

²² Migilo chu ama gitlona ma ah awk intin; ama gitlona khauhual ma ah zem chak in um in a.

²³ Thununna a tâksap ziakin thi’n tin; a ngol bêk ziakin gam mang in au.