THUPILTE 3 - PATHIAN LEKHABU THIANGTHO (BSI)

Pathian Muang Ding Leh Ja Ding Ah Hilna

¹ Ka cha, ka hilnate hi hemil kin la, la lunggil in ka thupiakte hi chêng zing zaw ta hen;

² zia ka hilnate hin la damsung ni leh kumte sawtsak intin, vangphatna bukim le hun pia ding ahi.

³ Thutakna leh ginumna chun hun nusia kiu hen la, ziate chu la ngawng ah khivui gual in awk inla, la lunggil suangpêk ah zik lut in.

⁴ Chutileh, Pathian leh mihingte mit mu in doisakna leh, min phatna law ding la hi.

⁵ La lunggil zosia’n Lalpa muang inla, nangma pilna mai in kinga kin.

⁶ La lampi zosia’n ama dong zing le chin, ama’n la lampi hun siamzan piak in a.

⁷ Nangma lunggêl bep in pil kisa kin la, Lalpa lau inla, gitlona nusia in.

⁸ Chutileh, la phe leh vo â ding ah damna hi’ntin, la taksa â ding ah halthakna hung hi’n a.

⁹ La go thil neite leh la ga masa zosia’n Lalpa chawihoi in;

¹⁰ tichun, la bu Inte hung dim lêt intin, la uain sûkna khûkte le hung dim lêt in a.

¹¹ Ka cha, Lalpa thununna hi ngainêp kin la, a suasalna hile chimchâk diak kin;

¹² pa’n a chate hepi ah a zilgai sek gual’ hin, Lalpa‘n a hepite chu a zilgai sek hi.

Hausakna Dik Chu

¹³ Pilna hawldok leh hetthiamna nei chu mi nuamsa a hiu.

¹⁴ Zia chu dangka sum ah lawkna sâng in a pha zaw’n, sana sâng inle a pha zawi.

¹⁵ Suang mantam sâng inle a lûl zaw’n, lungthim ah duthusam sâng pen tawh le, khaikhin ding gual ahi puai.

¹⁶ A khut changlam in dam sawtna a um ah; a khut veilam in hausakna leh lopina a um hi.

¹⁷ A lampite chu nun khawnopna lampi ahi’n; a jawite chule lungmuanna ahi.

¹⁸ A tu’kha tapote â dingin hinna thing ahi’n; a tudet zingte â dingin limna ahi.

Thilsiam Ah Pathian Pilna

¹⁹ Lalpa‘n pilna’n leilung a din ah, hetthiamna’n vante khi a hi’det ah;

²⁰ a thiamna’n tuisuagiat te khen in a um ah, sûmpite chun daitui a hun zuk sak sek ui.

²¹ Ka cha, ziate hi la mit ah kipat in kikiansak kin la; chitna leh ngaidon thiamna dik tak chu vopdet in,

²² tichun, la thagau â ding ah hinna leh, la ngawng jemhoina khivui hi’n a.

²³ Ziaphat chuleh lungmuang tak in la lampi zawt ta’n la tin,

²⁴ kichu lechinle lau nei ta pua’n la tin; la lup phat leh la i-mut tui ta’n a.

²⁵ Siatna hung tung phut ding leh, mi nunsiate siat bawlna chule lau diak kin;

²⁶ Lalpa chu la muanna hi’ntin, la keng le thâng ah awk lo dingin hun vêng in a.

²⁷ La khut ah hipiak theina la nei laisia, midnagte â ding ah thilpha bawl sumsial kin.

²⁸ La Invêngte kiang ah nei sapi inle, “Chia kit tadi inla, hung kit in, jing leh hun pena’ng ka,” ti’n gen kin.

²⁹ Nang hun gingcha tak ah la kiang ah chêng muang, la Invêngte chung in thil phalo suangtua kin.

³⁰ A ziak umlo in mi kinakpi kin; la chung ah la siatna ding thil phalo a bawl lo nâk phot chun.

³¹ Thagumhât mang mi chu thangsia kin la, a chiana lampi le haw diak kin.

³² Lalpa â dingin mi chanlam bei chu luaksuak um ahi’n, mi lamzangte vang chun Lalpa taksan a lawu hi.

³³ Lalpa sapsiatna chu mi nunsiate In ah a um ah, midikte chênna chu a malzawl sek hi.

³⁴ Mi nuaisiate chu a nuaisia sek in, mi kingaitawmte chu a doisak sek hi.

³⁵ Mipil in jana chang intin, himaleh, mingol lu’lulte’n vang jachâkna chang in au.