THUPILTE 25 - PATHIAN LEKHABU THIANGTHO (BSI)

Solomon Thuching Gen Belapna

¹ Ziate hi Solomon thuching, Judah lengpa Hezekiah nasemte’n a la teisawn uh chu ahi:

² Thil sêlgûk hi Pathian lopina ahi’n, thil hawldaw hi lengte lopina ahi.

³ Van a sân gual leh lei a thûk gual in, lengte lungthim hile sui suak ding gual ahi puai.

⁴ Dangka thîk ah êksuak chu ladok inla, tichun, bêl sêkpa’n ûm leh bêl ah sêk ding van nei in ah;

⁵ lengpa âng ah kipat in migilo chu pui mang lechin, a lalchutpha chu diktatna phudet in um ding ahi.

⁶ Lengpa âng ah kitaklang kin la, miliante gual inle ding diak kin;

⁷ mi ja’umte âng ah hi’niam ah la um sâng in, “Zia lam ah hin hung to in,” ti ah ko’na chu nang â dingin a phazaw ngal a.

⁸ La mit in a mu taphot vaihawmna ma ah hêk dingin tut ziang kin; a tawp ah la Invêngte’n a hun himualpho phat leh, a law ngaina helo in um ziang khan la.

⁹ La Invêngpa tawh la kikâl ua thubuai chu, a kiang ah gen ziang in, midangte thugûk chule gendok kin;

¹⁰ achutiloleh, la thugen hetu khat to in hun sumualpho intin, la minsiatna chu bei talo ding ahi.

¹¹ Thu ahi tak gen khâk hi, dangka thik bawm ah theiga man tam tak kikoi gual ahi.

¹² Thumang thei nakhang ah hilgaina thu pha kigen chu, bil ah sana bilba leh ngawng ah sana khi tawhbang ahi.

¹³ A sawlpa â ding ah palai ginum chu, bulâk hun ah vûk vot tak kia tawhbang ahi’n; a pute hinna a hihal sek hi.

¹⁴ A piak lopi pia ah kigen thiam ah chapote chu, gawtui pâi lo sûm leh huizang tawhbang bep a hiu.

¹⁵ Dawtheina’n vaihawmtu a thunun thei a, kamsuak nem in gu leh châng a hi’bong thei hi.

¹⁶ Khuaizu la mu phat leh a hun tawk bep in ne’n; achutiloleh, ne tam talua’n, lawdok kit khan la.

¹⁷ La Invêngte In chuan mun talua kin; hun chimchâk in, hun haw kha’n au.

¹⁸ A Invêngte hêkna zuau thu phuak hât chu, khetbûkte, chemjamte leh thalchang hiam tak gual ahi.

¹⁹ Lungdon lai ah mi ginum lo muan khâk chu, habal leh kengbai gual ahi.

²⁰ Mi lungngai kiang ah La sak chu, beliamna uain sun khum tawh bang ahi. Khaulâng in puan a nêk ah, thingnget in a umna thing a nêk gual in, mi lungngaite lungthim sung chu a ne sek hi.

²¹ La mêlma a gil a kial chun a nêk ding pia’n la; a dang a châk chun, a dawn ding tui pia’n;

²² la chuti bawl leh a luchung ah meiâm la luak khawm piak hi’ntin; chuleh, Lalpa‘n hun dit kit in a.

²³ Mâl thigua’n gua a hun puak lut gual hin, mi a umlona gensiat chîng chun, lungnatna mêl a tunsak sek hi.

²⁴ Ji hânsia tak tawh In khat ah chênkhawm sâng in, In chung ningkawm khat ah um mai chule a pha zawi.

²⁵ Dangchâk lai tak ah tuivot dawn a nop gual hin, khual gam thuthang pha het chu a nuam hi.

²⁶ Midik in migilo panchâkna ding lampi a siamdaw piak chun, tui thiang lak ah buan tui luan lutsak gual ahi.

²⁷ Khuaizu nêk tam tâkluat a phat lo gual ma’n, min ama lopina ding bep a hawl hile a lopi puai.

²⁸ Ama lungthim thunun zo lo mi chu, khawpi kulbâng nei lo tawh bang ahi.