THUPILTE 24 - PATHIAN LEKHABU THIANGTHO (BSI)

¹ Mi nunsia chu awtcha kin la, amau tawh kipawl le thanuam diak kin;

² a lungthim un thil phalo a suangtuau a, a mûk un thu phalo bep a gen ngal un.

³ Pilna’n In chu sak a hisek in; het thiamna’n zia chu hidet a hisek hi;

⁴ hetna ziakin pindante chu hausakna go lûl leh, thilpha tincheng ah sukdim a hisek hi.

⁵ Thagum nei mi sâng in pilna gâldotu a phazaw hen; awm khau mai sâng in hetthiamna nei a pha zawi;

⁶ lemguatpina pil chun vang la gâlte do thei in la tin; lemguatpi tamna chun gâl zaw’na a um sek hi.

⁷ Pilna chu mingolte â dingin a sâng talua’n, kul kêlkot bul inle a kam a kêk ngai puau hi.

⁸ Thil phalo bawl ding vaisawm taphot chu, midangte’n siat bawlpa tin au.

⁹ Mingol ngaituanate chu thil phalo ngen ahi’n; mi musit chîngte chule mi zosia â ding ah ki’dak um tak ahi.

¹⁰ Lungkhamna ni ah chautha ziang la hi chun, la hatna chu a tawm ahi’n;

¹¹ thi ding ah umte chu la hukdaw a, tha ding ah pui mang ah umte chu la hukdaw chun;

¹² “Zia hi ka la he’kha dang e!” la ti chun, thinlung bûkpa chun helo ding a hem? La hinna voppa chun zia chu helo ding a hem? Mi tin a thilbawl tawh kigûn in thuk lo ding a hem?

¹³ Ka cha, khuaizu dawn in, zia chu a pha ngal a; khuaiphâng ah khuaizu chu la kam â ding ah a thum gual in,

¹⁴ pilna le la hinna â dingin zia gual chu ahi ti hia’n la tin; la mudaw phat leh a phatchuamna um intin, la kinepna chule thawn him him pua’n a.

¹⁵ Mi thumang lo, mi diktatte umna In chânggupa gual chun um kin la; mi diktat chênna In chule suam diak kin;

¹⁶ midikte chu sagivei kipuk ziang maleu le, thodok kit intiu in; migilote chu vang siatna’n a hi’mangthai sek hi.

¹⁷ La mêlma a kipuk inle kipak kin la, a kisuipai lai inle la lungthim in awi âm diak kin;

¹⁸ Lalpa‘n hun mu kha’n tin, hun kipakpi lo ding ahi’n, ama chung ah a lungnatna chu, nangma chung ah hun buntha kha’n a.

¹⁹ Thil phalo bawlte ziakin kihilungngai kin la; mi nunsiate chule êng diak kin;

²⁰ mi nunsia â dingin mabân ah kinepna a um pua’n; mi nunsiate thaumei chu mûtmit piak in um ding ahi ngal a.

²¹ Ka cha, Lalpa leh lengpa chu lau inla, a kua zawk thu chule nial kin;

²² amau ah kipat in phutlo in la chung ah siatna hung tung in ah, amau ah kipat bang gual siatna hung tung ding a hem ti, kua’n he ding a hem?

Mipil Thugen Sutzomna

²³ Ziate hile mipil thugen ahi: Thutanna doichuam bîk nei a pha puai.

²⁴ A diklo zaw kiang ah, “La dik hi,” ti pa chun, mipi sapsiatna law intin, namtinte huat in um in au;

²⁵ mi nunsia a diklona ah vauhilte chu lim intiu in; a chung un maljawlna pha tak hung tung in a.

²⁶ Dik tak ah dawnhuna chu, gual pha hi hetna ahi.

²⁷ Pawlam ah kipat in thil guanggal inla, lou lam ah chun kisa zo diam in um in; ziazaw chuleh la In ding sa’n.

²⁸ A ziak leh zal umlo in, la Invêngte chungchâng ah hiatpitu in pang kin; la kam inle zuau ah thepna thu gen diak kin.

²⁹ “Ka chung ah a bawl gual un, ke’n le a chung un bawl ing ka tin; ei bawl gual gual un ke’n le a chung un bawl thuk ing ka,” ti him him kin.

³⁰ Mithabeite loulai ka paltheng ah, mingol phil phel te grep huanle ka haw malam hen;

³¹ ngaitia, ling leh khau in a dêp mang zo ta’n; a loulai pumpi’n hampa lingnei a kek dim ta’n, a suang dâi le a chim zo tai.

³² Ziaphatchun, ka mudok ah, pha tak in ka ngaitua ah, ka en ah; zilsaknate chu ka pom tai.

³³ I-mut tâkdi’na, lup tâkdi’na, chawl ding ah khut vak kil tâkdi’na chun,

³⁴ chatgana chu suam mang gual in hung tung intin, tâksapna chu galvan ah kithuam gual in hung tung in a.