THUPILTE 23 - PATHIAN LEKHABU THIANGTHO (BSI)

¹ Vaihawm mi tawh ankuang la um khawm lai un, la âng ah chun bang a um em ti chingthei tak in en in.

² La gilkial a huaisiat chun kisûm deu in.

³ Lengpa an tui takte chu dûcha kin, kijawlthâkna an mai ahi ngal a.

⁴ Hausak ding bep ngaituana ziakin sêmgim kin, a hun tawk hethei dingin chingthei in.

⁵ Hausaknate chu vak mu vuat le chinle a bei kawm ngal a, tha a hun nei un, muvânlâi van lam ah leng mang ziang tawhbang chu ahi ngal a.

⁶ Mi thipthineite an chu ne kin la, a an tui tuak takte chule ducha diak kin;

⁷ samzang val kha bang ding la hi’ngal a. Amau chun, “La du tawk ne’n la, dawn in,” ti leule, a lungthim tak un a hun doisak paw’ngal un.

⁸ La nêklutsa neucha chule lawdok kit in la tin, la pakchatna thugente chule a thawn hi’n a.

⁹ Mingol het in bangma gen kin, la thuching gendawte chu ngainêp kha’n a.

¹⁰ Gamgi tepte’na umsa chu chawn kin la; nauchagate gam chule lak piak diak kin,

¹¹ amau hukdoktu chu hât tak ahi; nangma lang in hung pang ding ahi.

¹² Hilna lam ah chun lunglut inla, hetna lam ah chun la nakhang daw in.

¹³ La chate thunun kipadam kin la, mol in jep lechinle thi ziang pua’n au.

¹⁴ Mol in vaw lechin Sheol ah kipat hukdok zaw ding la hi’ngal a.

¹⁵ Ka cha, la lungthim a pil chun, ka lungthim hi kipak takzet ta’n a.

¹⁶ La mûk in thu dik a hun gendaw phat leh, ka lungthim kipak ma ma ta’n a.

¹⁷ Mi gilote chu êng him him kin la, Lalpa chu lau zing zaw’n.

¹⁸ Matheilo in kipakman um ngei ding ahi’n; la kinepna chule thawn pua’n a.

¹⁹ Ka cha, ngaitha’n la, pil in; la hindan chu ngaitua ngun in.

²⁰ Zudu mite lak in pang kin la, gawlsan ah sahe’ mite lak inle pang diak kin;

²¹ zu leh sahe’ mi chu hung jawng ding a hiu in; i-mut vuanna chun puansia hun silsak ding ahi.

²² Nangma hun hingtu la pa thu ngai inla, la nule a teksiat nung in musit diak kin.

²³ Thu tak chu chawn la, zuakdok kit ta kin; pilna, hilna leh het thiamnate hi kichawk in.

²⁴ Midikte pa chu nasa tak in lim intin; cha pil hingpa chu a chung in kipak in a.

²⁵ La nu leh la pa chu kipak tak in um uh hen la; nangma hun hingnu chule kipaksak ta’n.

²⁶ Ka cha, la lungthim ei pia’n, chuleh, ka lampite hi en zui in.

²⁷ Nawchizuaknu chu kawkhûk thûk tak ahi’n; ângkawmnu chu kawkhûk chîp ahi.

²⁸ Suam mang gual in mi a changgu sek in, pawsal lak ah mi ginum lo a hi’pung sek hi.

²⁹ Kua ahi em chunggik sek? Kua ahi em lungngai sek? Kua ahi em thubuai nei sek? Kua ahi em a ziak umlo ah beliam pu sek? Kua ahi em mitsan kei kui ah um sek?

³⁰ Ziate haw chu zumun ah châm dente, zu chawpol dawn sekte chu a hiu.

³¹ Zu chu a hung chîk san phat leh en kin la, no sung ah a val sit set lai leh, a vat thâk zung zung lai inle en diak kin.

³² A tawp leh gûl gual in mi a chu sek in, thangchom gu gual in mi a zen sek hi.

³³ La mitte chun thil lamdangte mu’n la tin; la lungthim ah thu man theilo um zosia hun gendok kha’n la.

³⁴ Kua a hem khat, tuisuagiat lai tak ah um leh, lawng puanjakna mol mûk ah lum gual hi’n la.

³⁵ “Ei jep un, ka liam puai; ei vuau in, khawk kasa puai. Bangtik leh ka hung khanglo diam? Dawnbe jel ing ka,” hun ti ding la hi.