THUPILTE 21 - PATHIAN LEKHABU THIANGTHO (BSI)

¹ Lengpa lungthim chu Lalpa khut in a um hen, luicha tui luang gual in a dawi dan dan in a hei kawi sek hi.

² Mitin in amau bawl dan chiat pha a sau in, Lalpa‘n vang lungthim a te’suak hi.

³ Dikna leh thutakna chu, Lalpa‘n kithoina sâng in pom tâk a sa zawi.

⁴ Khawdat sâng, lungthim chapo, mi phalote’n thaumei gual ah a mat uh hi sual ahi.

⁵ Mi gunchu thil guanggal chun, kiningtinna lam a zuan in; ahi’n, kin leh mol ah thilbawl chun, tâksapna lam ngen a zuan sek hi.

⁶ Zuau gen thiam ah go kichom khawm chu, phâisûm jing tawhbang leh thi’na thâng ahi.

⁷ Dik tak ah thil a bawl tâk lo ziak un, mi nunsiate thagum hatna mut mang in um ding a hiu.

⁸ Midiklote lampi chu a kawi in, mi lungthim thiangte lampi chu a zang hi.

⁹ Ji hânsia tawh In khat ah chênkhawm sâng in, Inchung kilning ah um chu a nuam zawi.

¹⁰ Migilo in thil phalo bep a lunggul hen; a Invêngte chun a mit ah doisakna a mu ngai puau hi.

¹¹ Musit chîng mite soi ah a um phat ua leh, mimawl a pil khawlaw sek in; mipilte zilgai ah a um phat ua leh, hetthiamna a neibe sek ui.

¹² Pathian chun mi nunsiate In sung chu a en zing in; tichun, mi nunsiate chu manthaina’n a paitha sek hi.

¹³ Migentheite kâ thawm la kihiatlosak chun, nangma kâ le kuama’n ngaisak pua’n a.

¹⁴ A gûk ah thilpiak in lungnatna a hinêm thei in; kuama het lo ah golgûkna chun, lungnatna tawp khawk le a hi’dai thei hi.

¹⁵ Vaihawmna dik chu midikte â dingin kipakna ahi’n; diklo tak ah bawlte â dingin vang lungkhamna ahi.

¹⁶ Hetthiamna lampi kipat vâk mang mihing chu, mithite kisui khawmna kichawl ding ahi.

¹⁷ Kinoptelna thangai mi chu chaga’n tin, kuale zu leh sathau ngaina mi chu hausa ngai pua’n a.

¹⁸ Mi nunsia chu midikte kitatna hi’ntin, mi ginum lo chule mi lamzangte kitatna hi’n a.

¹⁹ Ji hânsia leh phunchiak hat tawh chênkhawm sâng in, thalek gamkeu ah um mai chule a pha zawi.

²⁰ Mipil In sung ah chun gothil lûl takte chu a um zing hen; mingolte chun vang a ne gam pai sek ui.

²¹ Dikna leh ngilneina delzuite chun, hinna leh jana chang in au.

²² Mipil chu mi gâl hat khawpi do in a kuan in, a kisuanpi pen uh kulpi chu a sukchip piak sek hi.

²³ Lei leh kam chintup chu buaina lak ah kipat kivêntupna ahi.

²⁴ Mi chapo leh kihisakpa min chu, mi nuaisiapa ahi’n; kilopisak tak in thil a bawl sek hi.

²⁵ Mi zawmthaw khut in, bangma a sep tâk lo ziakin, mi zawmthawte lunggul chu thi’na a hisek hi.

²⁶ Migilo chun sun nitum tum in, mi a awtcha sek in; midik in vang a hawmdok in, bangma a ît puai.

²⁷ Migilo kithoina chu luaksuak um tak ahi’n; ngaituana phalo pum ah a thillat hun chawi vang chu, bang gual bep in a luaksuak a um ta diam!

²⁸ Hiatpitu diklo chu mangthai intin; ahi’n, hiatpitu dik tak chun hangsan tak in genchian in a.

²⁹ Migilo a kihansansak sek in, mi lamzang in vang ama chiana ding a gêltup masa sek hi.

³⁰ Lalpa doi lo lam ah mihing pilna, hetthiamna leh lem guatna lawting a um ngai puai.

³¹ Sakol chu kido’na ni â ding ah kisazosa ahi’n; gâl zaw’na vang Lalpa â ahi.