THUPILTE 2 - PATHIAN LEKHABU THIANGTHO (BSI)

Pilna Lûl Zia

¹ Ka cha, ka thute la pom ah, ka thupiakte la khol khawm ah,

² pilna lam ah la nakhang ladaw a, la lungthim hetna lam ah la piak a;

³ hetna la uau a, hetthiam theina la ko a,

⁴ dangka hawl gual ah la hawl ah, go phumgûk gual ah la kansui chun,

⁵ Lalpa launa châng hun hia’n la tin, Pathian hetna chu hun mudok in la.

⁶ Lalpa‘n zia gual mi chu pilna a pesek in, a kam ah kipat chun pilna leh, hetthiamna a hung pawt sek a;

⁷ mi lamzangte pilna a guan in, mi diktatte â dingin phaw ahi’n,

⁸ thutanna lampite a vop ah, mi ginumte lampi a vop phat theina dingin.

⁹ Tichun, dikna leh vaihawmna dik chu, hun hethiam in la tin; vaihawm thiamna, lam dik zosia tawh,

¹⁰ la lung sung in pilna hung lut intin, la hinkhua â dinginle, hetna hi lungtaina hung hita’n tin;

¹¹ lemhiatna’n hun ching intin, het thiamna’n hun vêngtup zing in a.

¹² Thil phalo lampi kipat hun hukdok ding leh, chinchan beite thugen ah kipat hun hukdok dingin;

¹³ thil phalo bawlte chun lam dik jamsan in lamthim lam a zuan un;

¹⁴ thil phalo bawl a kithalawp un, thil mantheilo mai mai bawl chu a kipaknau ahi;

¹⁵ a lampiteu chu a kawi lumlet in, mi puikawite lampi chu ahi.

¹⁶ Numei thanghuai leh jawntatnu kam ah, maichangphat thiamnu ah kipat hun hukdok dingin,

¹⁷ a khangdawng lai pawsal chu taisan in, Pathian kiang ah a kitiamna thiangtho chu a hemil ah;

¹⁸ zia nu lampi chun thi’na lam a zuan in, a lampite chu thimna lam ahi;

¹⁹ zia nu kiang valut kha taphot chu, a hung kit ngai ta puau in; hinna lampi chule a hun man kit ngai ta puau hi.

²⁰ Ziaziakchun, mipha lampi chu haw inla, midik lampite chu zui zing in.

²¹ Mi lamzangte chu lei chung ah hin chêng intin uh, pha bukimte chu zia tak ah chun chêngden in au;

²² mi gi’nalote chu lei chung ah kipat hi’mangthai hi’n tiu in, mi ginumlote chu a bul a bâl ah bawdaw in um ding a hiu.