THUPILTE 16 - PATHIAN LEKHABU THIANGTHO (BSI)

¹ Lunggil ah guanggalna chu mihing chantum ahi’n; lei ah dawnhuna chu vang Lalpa â ahi.

² Mitin in amau lampi chiat dik a sau in; maleh, Lalpa‘n lungthim lam a bûk sek hi.

³ La nâte chu Lalpa kolsak lechin, la thil guanggalte chu hun hi’pitin piak in a.

⁴ Lalpa‘n thil zosia hi panna nei chiat dingin a la siam ah; migilo natiangle ni phalo hun â dingin a la siam ahi.

⁵ Lunggil ah chapote chu Lalpa‘n ki’dak um a sa hen; zia gual mite chun gawtna pel lo hial ding a hiu ti hezing in.

⁶ Thu awina leh ginumna chun khawlona a silthiang thei in; Lalpa launa ziakin min gitlona a jamsan thei sek ui.

⁷ Mipite umchan in Lalpa a hi’lungdam chun, a mêlmateu tawh a kichamsak thei hi.

⁸ Diklo tak ah hausakna tampi lâk khawm sâng in, dik tak ah tawmcha nei chu a pha zawi.

⁹ Mihing lungthim in a lampi ding a kiguanggal sek in, Lalpa‘n vang a kalsuan ding danteu a kawkmu sek hi.

¹⁰ Pathian hiatsakna dungzui ah thutanna chu, lengpa kam in a hung pawt sek a; vaihawmna chun a gen khial ngai puai.

¹¹ Bûkna dik leh te’na dik chu Lalpa â ahi’n, dip zosiate gik dan chu ama bawlsa ahi.

¹² Lalchutpha chu dikna tundin ahi ziakin, thil phalo bawlte hi lengte â dingin ki’dak um tak ahi.

¹³ Dik tak ah kam suak chu lengpa lungdamna ahi’n; thu dik gentute chu a ngainat lam tak a hiu.

¹⁴ Lengpa siatsona chu thizin kona a suak sek in; mipil taphot in thêm dai sek in au.

¹⁵ Lengpa maitaina chun hin leh dam a um in, a lungtaina chu khâl gua hun pua sûmpi tawhbang ahi ngal a.

¹⁶ Pilna nei hi sana nei sâng in a phazaw na lawm lawm e! Hetthiamna nei chu dangka sâng ah le têl zawk ding ahi.

¹⁷ Mi lamzangte lampi’n phatlona a pêl in; a lampi vengpha pa chun a hinna a humbit sek hi.

¹⁸ Kiletsakna chu manthaina masang in a chia a; lungthim kihoithawna chu kipukna masang in a chia hi.

¹⁹ Mi kiletsakte tawh gal lâk thil kihop sâng in, mi chagate tawh lungthim kingaitawm tak ah um khawm a pha zawi.

²⁰ Thil chîk tak ah ngaituate chu lamzang intiu in, Lalpa ah ki-ngate chu mi vangpha a hiu.

²¹ Lungthim pil chu het dik theina nei mi a kiti’n; lungdam tak ah thu genthei mi chun mi a thunun thei hi.

²² Hetthiamna nei mi â dingin pilna chu hinna tuinâk ahi’n; ngolna hi vang mingolte gawtna a hisek hi.

²³ Mipil ngaituana chu a kam in a pawt sek a, a mûk in thunun theina a belap piak sek hi.

²⁴ Paukam nêm chu khuaizu tawhbang ahi’n; ngaituana hi’nuam leh taksa â dinginle hisêlna ahi.

²⁵ Mihing ngaidan ah lampi dik hileh kilawm tak a hung um sek in, a tawpna chu vang thi’na ahi.

²⁶ Nasemtu gilkialna chun na sep gim leh, sep hâtna a pia’i.

²⁷ Mi chanlambei chun thil phalo ngen a suangtua zing a; a mûk ah a thugente chule meisi gual ahi.

²⁸ Mi lungkawi chun kituaklona a siamdok sek a, mi hoguk chîng mi chun gual leh pâi phate a khen jak sek hi.

²⁹ Mi thagum suang mi chun a Invêngte a til sia sek in, lam diklo in a pui kawi sek hi.

³⁰ Mit sîk-ât chîng mi chun thil phalo a ngaitua ah; a kha’pet ah thugen chun thil phalo ngen a gendok sek hi.

³¹ Samkâng hi lopina lal lukhuk ahi hen, zia chu mi lamzangte’n a chang sek ui.

³² Mi lungdia thei chu thagum hat sâng in a phazaw hen; a lungnatna kisûm zo mi chu, khawpi la zo mi sâng in a pha zawi.

³³ Min a pheichung un phun a sân sek un, bangkim chu vang Lalpa ti dan dan in a hung um sek zawi.