THUPILTE 14 - PATHIAN LEKHABU THIANGTHO (BSI)

¹ Numei pil chun ama In sung ding a kisiam in, a ngolte chun vang amau khut ngei in a phel jak sek ui.

² Lam dik ah chiate chun Lalpa a lau sek un, lam diklo haw mite chun a ngaitawm sek ui.

³ Mingol in a tungtûn ah mol chukna ding bep a kigen daw in, mipil chu a kihumbit sek hi.

⁴ Bawngchal lou kai ding a um lo chun bule a um diak pua’n, bawngchal thahâtna’ kipat chun bu tam a piang sek hi.

⁵ Hiatpitu ginum chun zuau a gen ngai pua’n; hiatpitu diklo chun vang zuau thu bep a gendok sek ui.

⁶ Musittu chun pilna hawl sek maleh, a lawsam sek hi; hetthiamna neite â dingin vang, hetna chu bailam tak ahi.

⁷ Mingol chu jamsan ziang in, ama ah kipat in hetna mube pua’n la.

⁸ Mi kivêk pilna chun a chiana ding lampi dik a kihiat zing in; mingolte ngolna chun amau a pui mang sek hi.

⁹ Mingolte chun gitlo ngaidamna ding ah thillat a musit un; mi lamzangte’n vang Pathian doisakna a limpi sek ui.

¹⁰ La lungthim natna chu nangma bep in la kihet in, la kipakna le melhet lote’n a hun kipakpi ngai puau hi.

¹¹ Mi nunsia In chu sukchip hi’ntin; midik puan In vang khang to in a.

¹² Mihing ngaidan ah lam dik hileh kilawm tak a um in, a tawpna chu vang thi’na ahi.

¹³ Nui malehchin le sunggil lam a lungngai thei a; kipakna tawpna chule lunggimna ahi.

¹⁴ Mi dukdak lo in a sep ga kiluak intin, mipha’nle a sep phatna ga kiluak in a.

¹⁵ Mimawl chun mi gen zosia a taksang sek in, lunggêl thei mi chun a kalsuanna ding a enchian masa sek hi.

¹⁶ Mipil chu chingthei tak in, thil phalo lak ah kipat in a kihem dok sek in; mingolte vang khawni ngailo in a kihan sansak sek ui.

¹⁷ Mi lungchom chun ngolhuai tak in thil a bawl phut phut sek in; mi dawhathûk chu kuama’n a mu nuam puau hi.

¹⁸ Mi mawl chu ngolna khuksak in a um un, mi kivêkte chu hetna khuksak in a um ui.

¹⁹ Gitlona chu phatna ma-âng in a kûn suk sek in; mi nunsia chu midikte kêlkot bul in a kûn sek ui.

²⁰ Michaga chu a Invêngte nasan inle a ngaina puau a; mi hausa chun vang gual leh pâi a hau ui.

²¹ Kuale a Invêng musit chu thilhikhial ahi’n; migenthei somdawltu chu mi vangpha ahi.

²² Thil phalo guanggalte chu thil hi’khial ahi puau ah a hem? thilpha guanggalte chun vang ginumna leh taksanna mu’n au.

²³ Sepgimna taphot in lawkna a um in, genthiamna bep in vang tâksapna a tun sek hi.

²⁴ Mipil lal lukhuk chu a pilna chu ahi’n; mingolte chun a ngolnau pâk khi a awk ui.

²⁵ Hiatpitu dik chun hinna a hukdok sek in; zuau thu genjaktu chu vang mi zuaktu ahi.

²⁶ Lalpa laute chun muanna det tak a nei un, a chate chunle bitna det tak nei ding a hiu.

²⁷ Lalpa launa hi hinna tuinâk ahi’n; thi’na thâng pumpelna le ahi.

²⁸ Mipi tamna chu lengte lopina ahi’n; mipi a um lo chun leng chate chu a mangthai ui.

²⁹ Hetna thûk tak nei mi chu a lung a niang in; mi lungchom chun a ngolna a taklang hi.

³⁰ Lungthim chawldamna chu taksa â ding ah hisêlna ahi’n; mitthîpna chun vang gu leh châng muatna a tut hi.

³¹ Michaga hi’gentheite chun a siampa simmaw ahi’n; tasamte somdawlte chu vang a siampa jabawl a hiu.

³² Mi nunsiate chu a thil bawlkhialnau in a kipal pâi sek un; midik chun vang a diktatna ziakin bêl ding a mu zing hi.

³³ Hetthiamna neite lunggil in pilna a chêng den sek in; mingolte lunggil in vang zia chu hetphâk le ahi ngai puai.

³⁴ Diktatna chun nam a chawisâng in, gitlona ahileh vang mi zosia â dingin minsiatna ahi.

³⁵ Suak pil tak ah thilbawl chun lengpa doisakna a chang in; jachâk um tak ah tawite chung in vang a siatso’na a tung sek hi.