THUPILTE 12 - PATHIAN LEKHABU THIANGTHO (BSI)

¹ Thununna ngaina mi chu hetna ngaina ahi’n; zilgaina zada mi chu mi kanang ahi.

² Mipha chun Lalpa doisakna a chang in, thil phalo suangtua mi chu thiamlo a chang sek hi.

³ Diklo tak ah thilbawl kuama buldet ngai pua’n tin; ahi’n, midikte dinmun chu bangmatik in hilîng hipua’n a.

⁴ Numei umchanpha chu a pawsal lallukhuk ahi’n; a pawsal himualphotu chu vang a gu muatsak gual ahi.

⁵ Midikte ngaituana chu a thiangtho a, mi nunsiate lemguatpina chu vang zuauthepna mai a hisek hi.

⁶ Mi nunsia kamsuak chu mi that ding ah chânggu ahi’n; mi lamzangte kamsuak in vang amau a hukdok sek hi.

⁷ Mi nunsiate chu paithâk ah um in, a mangthai zo tau a; midikte In vang um zing in a.

⁸ Mihing chu a pildan dungzui chiat in pakchatna law intin; mi chanlam beite vang mu tawm in um in au.

⁹ Nêk ding nasan neilo ah kilopi sak sâng in, kuama ngaisân hilo ah suak nei zo hi chu a pha zawi.

¹⁰ Midik in a ganchate mamaw ding a he sek in; mi nunsia ja’ngaina sang pen chule a hiamngam zaw nalai hi.

¹¹ Ama lou ding kithawpa chun nêk ding muang intin; mi juljau zuipa vang chu ngaituana neilo ahi.

¹² Mi nunsiate lungtup chu thil phalo bawl hih ahi’n; midikte bulpi chun vang ga a sua sek hi.

¹³ Thil phalo bawlte chu a kigen awk sek un; midik vang chu buaina lak ah kipat in a kigendok sek hi.

¹⁴ Min a kam thiam man kinêk intin; a khut sepgim man chu piak hi’n a.

¹⁵ Mingol chu ama dik a kisa’n; mipil chun vang thuhilna a ngaitha sek hi.

¹⁶ Mingol chun a lungnatna a gendok pai sek in; mi lunggêl thei chun vang mi êngho’na le a pawdam thei hi.

¹⁷ Thulai gen chun dikna a etsak in, hiatpitu diklo chun a thêm sek hi.

¹⁸ Madon don ah thugente chun, chemcha ah sut gual in mi a sun na sek un; mipil thugen in vang mi a hi’dam sek hi.

¹⁹ Zuau thei chun mitphet kâl le a dai pua’n; thudik in vang kumtuang a dai sek hi.

²⁰ Thil phalo suangtuate lunggil in thepna a um in; chamna ah vaihawmte’n vang kipakna a nei sek ui.

²¹ Midik chung ah siatna tung pua’n tin; mi phalote chun buaina tilo bangma dang chang pua’n au.

²² Mûk zuauthei chu Lalpa ki’dak lam tak ahi’n; dik tak ah bawlte chu a lungtaina lam tak ahi.

²³ Mipil in a hetna a sêlgu sek hen; mingol in vang a mawlna a puang jak sek hi.

²⁴ Mi taima khut chun vaihawmna chawi intin; mi zomthaw chu engbawl ah na sepsak hi’n a.

²⁵ Lungkhamna chun mihing lungthim ah giksakna pia’n, a kai khun sek a; thupha chun vang a suhal sek hi.

²⁶ Midik in a gualte lam dik a hil sek a; mi nunsiate lampi chun vang a pui mang sek hi.

²⁷ Mi zomthaw chun samat hak gam ding a nei ngai pua’n; mi gunchu chun hausakna go thil a chomkhawm sek hi.

²⁸ Dikna lampi chun hinna a um in, zia lampi zui chun thi’na a tuak puau hi.