THUGENTU 9 - PATHIAN LEKHABU THIANGTHO (BSI)

La Chung ah Tung dan dan In Lungkim In

¹ Ziate hile a leng in ka ngaitua in, bang ding ah midik leh mipil le a nasep thilbawl zosiau Pathian khut ah kinga a hem, ka ti hen: Min a ma-âng ah thil hung tung ding chu hepina a hem, huatna a hem ti bangma a he masa paw’ngal a. A chung ua thil hung tung taphot chule,

² bangmalo mai mai ahi’n; a leng ua chung ah thil tung chu a kibang chiat a: Midik leh migilo, mipha leh mi phalo leh mithiangtho leh mibuakte, kithoina pia leh kithoina pe ngailote chung ah kibang tak ah thil a hung tun sek dante hi. Miphate chung leh migilote chung ah hitaleh, kihaksial chîng mi leh kihaksial ngailote chung inle, kibang tak in a tung a.

³ Zia hi khawvel ah thil tung lak ah phalo ma ma khat chu ahi: Mitin chung ah kibang tak ah thil a hung tun mai hi. Zia mai chule hilo in, mi zosia lungthim hi phatlo na’n a dim in; a damsungsiau a lungthim ua ngolna dim in, zia nung chun mithite kiang lam a zuan tau hi.

⁴ Hing leh dam ah umte tawh kizop nalaite â dingin kinepna a um nalai in, sakeibaknei thisa sâng in, uicha hing chu a phazaw ngal a.

⁵ Hing leh dam ah um nalaite chun, thi ding a hiu ti a kihiau in; a thisate chun bangma hetna a nei ta puau, kipakman mu dingle a nei diak ta puau in; amau hetzingna le a bei tai.

⁶ A hepinateu, a huatnateu, a thangsiatnateu zosia le a bei ta’n; zia khawvel ah hin chan ding him him nei ta pua’n au.

⁷ Chia inla, kipak tak in la vaithum ne’n la; lim tak in la uain dawn in; la thilbawl zosia chu masanglai ah kipat khan Pathian in lem a saksa a la hita ngal a.

⁸ La sil leh chênte chu vam zing hen la, la luchang chule sathaunu’ ding tasam ki’hen.

⁹ La damsung nikhua bangma hilo sung ah hin, la ji dawi tak tawh lim tak in um in; zia chu la damsung nikhua la sepgim ga, la lâk khawm, la chan chuang chu ahi.

¹⁰ La khut in sep ding a mu taphot chu, bang hilehle theitawp sua in sêm in; la chiana ding Sheol mun ah chun nasep ding, ngaitua buai ding, het ding a hem leh pilna le a um ta pua ngal a.

¹¹ Chuleh, khawvel ah ka thil mu kit dang khat chu, kitaisiakna chu mi chan-gangte â ding bep ahi diak pua’n, kido’na chu mihâtte â ding mawng ahi diak pua’n; vaithum chule mipilte â ding bep ahi diak pua’n, hausakna le a hethiamte â ding bep ahi diak pua’n, doisakna le mi khutthiamte â ding bep ahi diak puai; a leng un hun lemchâng kibang tak ah piak ahi chiat ui.

¹² Kuama’n a chung ah siatna hung tung ding chu a helawk thei paw’ngal a. Sanga lên ah awk gual leh, vacha thâng ah awk gual in, mihingte chung ah le siatna chu a hung tung phut sek hi.

Ngolna sâng In Pilna A Chungnung Zawi

¹³ Chuleh, khawvel ah hin zia pilna etsakna hile ka mudok hen, zia chu thupi kasa ma ma hi:

¹⁴ Khawpi neucha, a sung ah le mi tawmcha a um in. Lal lopi tak khat a do dingin a hung ah, a hung ûm kîmvêl ta’n; a khawpi lâkna ding in panmun a khualtup tau a.

¹⁵ Khawpi sung ah chun migenthei pil tak khat a um ah; ama pilna chun khua chu hukdaw in a um tai. Himaleh, zia migenthei chu kuama’n a hezing ta puau a.

¹⁶ Tichun, “Pilna hi thagum hatna sâng in a pha zawi; ahi’n la, michaga pilna musit in a um ah, a kamsuakte chule ngaisak ahi puai,” ka la ti zing tai.

¹⁷ Mingol hon lak ah vaihawmtu, kiko’na sâng in mipil in awlcha, a gen chu ngaisak zawk ding ahi.

¹⁸ Kido’na gâlvan sâng in pilna a pha zaw’n; himaleh, migilo pakhat in, thilpha a susia tam zawi.