THUGENTU 8 - PATHIAN LEKHABU THIANGTHO (BSI)

Vaihawmte Thumat A poimaw Dan

¹ Mipil gual kua hem um? Kua a hem thil hilchian dan hethei? Pilna chun a mai chu a hi’vâk in, a lung tai lona mêl chu a hun hi’danglam tai.

² La thutiam um ziakin lengpa thu chu zawm in.

³ Mawk lau ziang kin; a thu a lem ta puai ti la het phat leh, muang lo in, pawtdok kin ziang in; ama’n a thu thu bawl ziang sek ahi ngal a.

⁴ Lal thu chu a hât in, thil hi’thei tak le ahi; kua’n a kiang ah, “Bang a hem la bawl chu?” ti ngam ding a hem.

⁵ Kuale a thupiak zawm tapo chun thilsia tuak pua’n tin, mipil chun a hun leh a bî a he sek hi.

⁶ Thil zosia hin a hunbî leh a lampi ding a um chiat in, mihing haksatna le ama â dingin gik ma ma ahi.

⁷ Bang thil hung tung ding a hem ti hetlawk thei a hilo ziakin, a chung ah thil hung tung ding chu kua’n hil lawk thei ding a hem?

⁸ Kuama’n hui chung in thu a nei pua’n, hui le a tutâng thei diak puai; zia gual chun, thi’na chung inle kuama’n thu a nei puai: kido lai le a mawk cholsak thei pua’n, gitlona thilbawl inle a mawk haisan ziang thei diak puai.

⁹ Zia thil zosia hile ka la ngaitua ta’n; khawvel ah thil zosia hi ka lungthim in ka gêl tuak ta hen, midang khat siatna ding ngaitua in mi pakhat in a chung in vai a hawm hi.

Pathian Lampi Suidok Sên lo

¹⁰ Chuleh, migilo a vui uh chu ka mu ta’n; amau chu mun thiangtho ah lût in, a pawt un; khawpi sung ah a thil bawlteu chu a gen pha tawl tawl ui. Zia hile bangmalo mai mai ahi.

¹¹ Thil phalo bawlte thiamlo chansakna, thutanna bawl pai ziang a hilo na ziakin, mihingte lunggil ah chun thil phalo bawl guatna a nei ta sek ui.

¹² Migilo in thil phalo za khat vei bawl hen la, a damsung nikhua hisau in um ziang leh le, Pathian lau mi, a ma-âng ah lau dan thiam tak ah um chu a pha zawi ti ka hia’i;

¹³ migilote chan ding chu vang a pha puai; a damsung nikhua chu lîm gual bep in hisau hipua’n ah; Pathian launa a nei paw’ngal a.

¹⁴ Chuleh, bangmalo mai mai khawvel ah kibawl a um in: Migilote a sep dungzui un a chung ua tung ding hileh kilâwm tak, midikte chung in a tung sek in; chuleh, midikte’n a sep dungzui ua a chung ua tung ding hileh kilâwm tak chu, migilote chung in a tung sek hi; zia hile bangmalo mai mai ahi, ka ti ahi.

¹⁵ Nuam tak ah um hi pha kasa tai; khawvel ah hin mihing in nêk leh dawn ah a kihilim khêl ah pha a um puai, ka ti ahi; Pathian in khawvel ah damsung hun chomcha a piak sung ah hin, a sepgimna ga a kinêk khêl ah pha ka mu paw’ngal a.

¹⁶ Pilna hedok ding leh, lei chung ah thil kibawlte mudok dingin ka lungthim ka la mat lai in, bangtidan ah sûn leh jan ah i-mutna hun him him neilo le um mai a hiu em, ka ti hen;

¹⁷ ziaphatchun, Pathian thilbawl zosia, lei chung ah thil kibawl zosia, mihing chate’n a mudaw zaw lo uh chu ka gêl ta’n. Bang gual ah gim in hawl ziangleu le, mudok zo diak pua’n tin uh; mipil inle he ding in kigingcha maleu, he zo diak pua’n au.