THUGENTU 7 - PATHIAN LEKHABU THIANGTHO (BSI)

Mihing Hinkhua Beidon Um

¹ Min phatna hi sathau gimtui man tam tak sâng in a pha zaw’n; chuleh, pian ni sâng in thi ni a pha zawi.

² Luaithe’na In ah chia sâng in, lusûnna In ah chia a pha zawi; zia chu mi zosia tawpna ding ahi ngal in; zia chu hing leh dam ah um zosia’n, lung ah gêl ding chu ahi.

³ Nuina sâng in lungkhamna a pha zaw’n, mêl ah lungkhamna kilang hial chun, lunggil a siampha zaw ngal a.

⁴ Mipil lungthim chu lusûnna In ah a châm in; himaleh, mingol lungthim chu, limna In ah a châm hi.

⁵ Mingolte La sak ngaithâk sâng in, mipil vauhilna thu ngaithâk chu a pha zawi.

⁶ Mingol nui chu bêl kisuang nuai ah, ling meikuang in, a kât puak tek tuk gual ahi’n; zia hile bangmalo mai mai ahi.

⁷ Mi a nuaisianau ziakin mipil chule, mingol a hung suak têi sek un, golgûkna chun mi lungthim a hisiai.

⁸ Thil khat kipatna hi a tawpna sâng in a pha zaw’n; lungthim chapo sâng in lungthim sekdo a pha zawi.

⁹ Lungna pai ziang kin, lungnatna hi mingolte laigil in a chêngden sek hi.

¹⁰ “Bang ding ah tu’lai hun sâng ah, malai hun kha phazaw a hem?” ti kin. Zia la dotna hi pilna ziak ahi paw’ngal a.

¹¹ Pilna hi go lûl tak lua ding gual ah pha ahi’n; zia hi nisa mu khate a phatchuamnau ahi.

¹² Pilna’n a humbitna hi dangka sum in, a vênbit tawhbang ahi ngal a; hetna nei a phatchuamna pen chu, a neitu hinna a piak hi ahi.

¹³ Pathian thilbawlte hi vak ngaitua tia; a kawi ah a bawl chu kua a hem hi’zang thei ding?

¹⁴ Lawtin ni’n kipak inla, lungdon ni’n ngaitua in: Pathian in pakhat a siam gual tho ah chun a dang chule a siam ahi; tichun, mihing in a nung ah thil hung tung ding him him bangma a mulawk lona ding un.

Damsung Hinkhua Lûl lo Dan

¹⁵ Ka damsung hinkhua bangmalo ah hin thil zosia ka mu ta hen; midik tak, a dik zing sapi ah le mangthai le a um in; migilo, a gitlo sapi ah le sawt tak dam le a um ui.

¹⁶ Dik kisa talua kin la, kipilsak talua diak kin; bang dingin em nang leh nang la kisuksiat ding?

¹⁷ Gilo talua kin la, a ngol le hi diak kin; la thi hun lo ah bangatia thi mai ding la hem?

¹⁸ A pakhat zaw la tûk det chu a phai, a hi’n la, khat zaw chule tha’suak diak lo in; Pathian ki’chate chu a pani ni’n a lawting sek ui.

¹⁹ Khawpi sung ah vaihawmtu mi sawmkhat sâng in, pilna chun mipil chu a hi’hat zawi.

²⁰ Thilpha bep bawl, bangma bawl khial nei lo, zia khawvel ah hin a um him him puai.

²¹ Mi thugen zosia ngaisak kin; achutiloleh, la suakte’n hânsia a hun lawnau he kha’n la;

²² nang inle mi hânsia la law sek dan kha la lunggil in a hezing ngal a.

²³ Zia haw zosia hi pilna’n ka la patep suak tai: “Tu’hin chu pil ta’ng ka,” ka ti’n; maleh, a naisai puai.

²⁴ Zia chu gamla ma ma leh thûk tak ahi’n, kua’n mudok zo ma ma ding a hem?

²⁵ Ka lunggil chu pilnate leh thil umdante hechian ding leh, mu ding leh hawl dingin ka mang ah; nunsiatna hi ngolna ziak ahi dan leh, mawlna hi ngolna ziak a hidante hi hechian dingin.

²⁶ Thi’na sâng ah thok hakzaw ka mu chu, numei thâng ah pang, a lungthim thâng leh lên, a khut chu thikkol tawhbang te hi a hiu hi. Pathian kipaksakte chu zia chun a suakcha sek un, migilote a hiu leh vang a man sek hi.

²⁷ Thugentu chun, en tiam in, zia hile a mudawbe chu ahi: Thil dang khat tawh a dang khat I belap leh a pumpi chu a kimu bep hi, ti hi;

²⁸ ka lungthim in a hawl zing, a hiziak ah a mu zaw lo chu ahi. Sang khat lak in pawsal khat ka mu hen, numei vang pakhat chale ka mu zo puai.

²⁹ Entia zia bep hi ka mudaw ahi: Pathian in mihingte hi dik tak in a siam ah; himaleh, thil tam tak a la kiguanggal sek ui.