THUGENTU 3 - PATHIAN LEKHABU THIANGTHO (BSI)

Thil zosia Hin Hunbî A Nei Chiat

¹ Van nuai khawvel ah thil zosia â dingin hunbî leh a hun a um chiat hi:

² Pian hun a um ah, thi hun a um hi; phu hun a um ah, bawdok hun le a um hi;

³ thalup hun a um ah, sukdam hun a um hi; phel jak hun a um ah, sak phat hun a um hi;

⁴ kâ hun a um ah, nui hun a um hi; lusûn hun a um ah, lâm hun a um hi;

⁵ suang pai mang hun a um ah, suang lak khawm hun a um hi; kipom hun a um ah, pom lai khen hun a um hi;

⁶ nei hun a um ah, matsua hun a um hi; vop phat hun a um ah, pai mang hun a um hi;

⁷ puai thêk hun a um ah, khui bit hun a um hi; thip hun a um ah, pau hun a um hi;

⁸ hepi hun a um ah, huat hun a um hi; kido hun a um ah, kicham hun a um hi.

Pathian in Sep Ding A Piak Chu

⁹ Nasem gimte chun a sep gimnau ah kipat in phatchuamna bang hem a muu?

¹⁰ Mitin in a buaipi ding ua Pathian in a piak chu ka muchian tai.

¹¹ Thil tincheng chu ama hun tawh kituak chiat dingin a siam ah; chuleh, thil tung tasa leh a hung tung kit dingte ngaitua theina a pia’n; himaleh, a lim ah kipat a tawp tiang ah Pathian in a bawl dingte chu hetdaw theina a nei puau hi.

¹² A dam sungsiau kipak tak ah a um ua, amau kihilim thei khêl ah a bawl ding ua thil phazaw ka hepua’n;

¹³ zia bep chule hilo in, mi tin in nê leh dawn ah, a sep gimnau zosia ah nop a saknau chule Pathian thilthawnpiak ahi.

¹⁴ Pathian in a bawl taphot chun kumtuang a dai ah; belap thei le ahi pua, lâk khen thei le ahi diak puai, ti ka hia’i; mi tin in ama a lautheina ding un Pathian in zia gual chun a la bawl him ahi.

¹⁵ Tu’ ah thil um haw hile, a um zosa ma kha ahi’n; Pathian in a la um zosate ma kha a hun umsak kit mai a hizawi.

Vaihawmna leh Tu’nung Thu Pathian Khut In A Um

¹⁶ Chuleh, khawvel ah hin thudikna ding mun ah phatlo na um leh, dikna ding mun ah siatna um ta mai chule ka mu hen.

¹⁷ Ka lungthim in Pathian in midik leh migilo chule vaihawm piak in ah, ama’n thil zosia leh thil kibawl zosia vaihawmna ni ding bîk a guat ngal ah, ka ti’n.

¹⁸ Mihingte hile, Pathian in amau zosia chule ganhingte gual bep ahi dan uh, a kihiatdaw theina ding un a patep sek hi, ti ka ngaitua a.

¹⁹ Mihingte leh ganhingte chung ah thiltung chu a kibang chiat ah; mi khenkhat a thi gual tho un a dangte chule a thiu hi. A leng un hinna kibang chiat a hiu; mihingte chunle ganhingte sâng ah chungnun zawkna a nei diak puau; a leng ua bangmalo mai mai a hiu.

²⁰ A leng un mun khat in a chia khawm un, a leng un leivui ah kipan a hiu ah; a leng un leivui ma suak kit ding a hiu.

²¹ Mihingte thagau chung lam in a chia hen, ganhingte thagau nuai lam in a chia hi, ti kua a hem hethei?

²² Chutichun, min a sep gimnau chung ah a kipaknau sâng ah thilpha zaw bangma ka mu puai; zia chu a chantum uh ahi mai hi: amau nung ah thil hung tung dingte chu kua’n musak thei ding a hem?