THUGENTU 2 - PATHIAN LEKHABU THIANGTHO (BSI)

Kinoptelna’n Lungkimna Um Diak lo

¹ Tu’hin, hung inla, a nuam kiti hi bang a hem ti hun patepsak ing ka tin, nuam tak in um in, ka ti sek a. Himaleh, zia hile bangma chuam ahi diak puai.

² Nuina kiti hile ngolhuai mai mai ahi’n; nopsakna hile, bang phachuam a hem? ka ti jel a.

³ Mihing dam sung chomcha sung ah hin, khawvel ah thil a bawl ding ua pha pen chu ka mudok masia’n, ka lungthim ah pilna hawl in, uain ah ka taksa kipaksak ding dan leh, ngolna tuktân ding dan theitawp in ka hawl sek a.

⁴ Na thupi takte ka sêm a: Inte ka kisak ah, grep huante ka kibawl a;

⁵ huante leh pâkcha huante bawl in zia tak ah chun thingga chitin ka phut a.

⁶ Tuikulte ka kibawl ah, zia tui chun gammâng ah thingkekte chu ka chawm a.

⁷ Suak pawsal leh numeite le ka nei ah, ka In ah piang suakte le ka nei hi. Ka masang ah Jerusalem ah a la umte zosia sâng in, bawng, kêl leh belam honte ka nei tam zaw’n.

⁸ Ka lenggam ah vaihawmte leh lengte ah kipat in, a golûl penteu leh sana leh dangkate ka kilâk khawm a. La sa mi pawsal leh numei hileh, taksa thangai thei zosia ka nei in, thâikem le tam tak ka nei hi.

⁹ Tichun, ka hung lopi ta ma ma ziang ah, Jerusalem ah ka masang ah a la um zosia chu nasa tak in ka khêl ah; ka pilna’n le ei nusia puai.

¹⁰ Ka dawi taphot chu ka nei in, a nopsakna ding ahi’phot chun ka lungthimle ka kisûm diak pua’n, ka sepgimna taphot ah chun ka lungthim in thatnopna a nei ngal a; zia chu ka sepgimna zosia ziak ah ka kipakman chu ahi mai hi.

¹¹ Chuleh, ka khut in a sepdawsa zosia leh, zia ka bawlna ka tha gimna zosia chu ka vak ngaitua ah; zia haw zosia chule bangmalo mai mai leh a thawn mai ahi; khawvel ah hin bangma a phachuam ma ma mu ding a um puai.

Pilna leh Kipakna Chu Pathian Kipaksakte Chan ahi

¹² Chutichun, pilna, ngolna leh mawlnate hi ka vak ngaitua ta’n; lengpa nung ah hungpa chun bang a bawl thei ding a um diak paw’ngal a. A masang ah a la kibawlsa ngen ahi.

¹³ Tichun, vâk in thim a khêl gual in, pilna’nle mawlna chu a khêl nasa ma ma hi ti ka mudok tai.

¹⁴ Mipil chun a luchang in mit a nei in; mingol ahileh vang thim lak in a chia hi. Ahi’nla, a chung ua thil tung zosia chu a kibang chiat ahi ti le ka mu tai.

¹⁵ Ziaphatchun, ka lungthim in: “Mingol chung ah thil tung gual chu kei chung ah le tung ding ahi; bang phat chuamna pil ka hem?” ka ti’n. Tichun, zia hile bangmalo mai mai ahi tho chulam, ka hun ti tai.

¹⁶ Mipil hileh, mingol hileh kumkhua hetzingna a um diak pua’n, a leng ua hetmilna ni chu hung tung ding ahi ti het ahi ngal a. Mipil chu bangtidan ah mingol gual ah thi ziang thei ding a hem?

¹⁷ Ziaziakchun, hinkhua hi ka hua hen, khawvel ah thil kibawl zosia hile ei hi lungkham bep ahi ngal ah; a leng in bangmalo mai mai leh lunggimna bep ahi.

¹⁸ Khawvel ah hin sep leh bawl, ka sepgimna zosia hi ka hua ahi, a leng in ka nung ah hung umte â ding ah nutsia piak ding ka hi ti ka mu chian ngal a;

¹⁹ amau chu mipil ahi ding leh mingol ahi ding uh kua a hem hethei ding? Khawvel ah keima ngei in ka pilna mang ah ka la sepgimna zosia chung ah thuneitu ding a hung hi ta’ngal un. Zia hile bangmalo mai mai ahi.

²⁰ Chutichun, ka vak kihei vêl ah, ka sep gimna, khawvel ah ka sep dawsa zosia chung ah chun ka lung a dong ta’n,

²¹ mi pakhat in a pilna zosia, a thiamna zosia leh a hetna zosia mang ah a sep gimna zosia chu a sêmgim lo khat in a lua dingin nusia mai ding ahi ngal a. Zia hile bangmalo mai mai leh thil phalo tak khat chu ahi.

²² Khawvel ah hin mi khat in a sep gimna zosia leh, lunggim tak ah a sepnau ah kipat hin, bang a hem a chan mawng mawng uh chu?

²³ A dam sung ni zosia chu natna ngen leh lungjinna ngen ahi ngal a; a lungthim un jan nasan in chawldamna a mu puai. Zia hile bangmalo mai mai ahi.

²⁴ Mihing â dingin ne leh dawn ah um ah, a sep gimnau ah kipakna a mu khêl ua thil phazaw a um puai. Zia hile Pathian khut ah kipat bep ahi ti chu ka mu ta’n;

²⁵ zia khêl ah chu ne ah nopsak zawkna ding bang dang a um ah a hem?

²⁶ Pathian in ama kipak sakte kiang ah chun, pilna, hetthiamna leh kipakna a pe ngal ah; ahi’n, migilo kiang ah chun Pathian kipaksak mite kiang ah piaksawn dingte chu lakhawm ah, khol khawm ding bep chu a piai. Zia hile bangmalo mai mai leh a thawn mai ahi.