THUGENTU 11 - PATHIAN LEKHABU THIANGTHO (BSI)

Pilna Lûldan

¹ La vaithum chu tui chung ah pai lechin, ni tam tak nung leh mu kit ding la hi’ngal a.

² La thilneite chu mun sagi a hem, mun giat tiang in hawm jak in; lei chung ah hin bang gual hun phalo in, hun tun khum ding a hem ti, la hepaw ngal a.

³ Sûmpi’n a dim in gua a pua’n, lei chung ah gawtui a buntha sek; mallam nga a hem, simlam nga a hem ah, thing a pûk chun, a pûkna mun chun a um den hi.

⁴ Thigua hu’ngai mi chun thâichi tû ngai pua’n tin; sûmji’n hu’ngai taphot inle bu ât ngai pua’n a.

⁵ Numei sûl sung ah nausen gu leh châng in bang gual ah hu la ah, bangtidan ah khang a hem ti la het lo gual ma’n, bangkim siamtu Pathian thilbawl danle la hepuai.

⁶ Jingkal in la thâichi tû inla, nitâk lam tiang inle la khut thada diak ki’hen; a khoi pen hin ga sua ding ah, a khoi pen hi hût ding ti leh a paniu ah pha gêl ding a hiu em ti la hepaw ngal in.

⁷ Khawvak hi a nuam in, mit ah nisa vâk mu chu thil nuam tak ahi.

⁸ Kum sawt tak damte chule zia zosia ah chun kipak uh hen la; ahi’n la, haksatna nikhua chu sawt tak hung hiding ahi ti hi hezing uh hen. A hung tung ding zosia hile bangmalo mai mai ahi.

⁹ Aw khanglai, la khangdawng lai nikhua hin lim inla, la lên lai ni hin la lungthim chu hilim in. La lungthim doidan leh la mit mu nopdan ah chun chia in; ahi’n, zia haw zosia ah hin, Pathian in vaihawmna hun pui lût ding ahi ti hezing in.

¹⁰ La lungthim ah kipat lungngaina liptha’n la, la taksa natna le koimang in; khangdawn hun leh lênlai nite hile bangmalo mai mai ahi ngal a.