THILSIAM THU 48 - PATHIAN LEKHABU THIANGTHO (BSI)

Jakob In Joseph Chate Maljawl

¹ Zia nung ah chun, Joseph kiang ah, “La pa a dam puai,” ti a hung hil ua. Joseph inle a chapate ni, Manasseh tawh Ephraim pui in a vave tau a.

² Jakob kiang in, “La chapa Joseph la kiang in a hung hi,” a tiu ah: Israel chu a kihalsak ah, jalkhun chung in a kichu ta’n.

³ Jakob chun Joseph kiang in, “El Shaddai chu Kanaan gam ah Luz khua khan ka kiang in a kilâk in; ei maljawl a:

⁴ Ka kiang in, ‘Chi tam tak suan sak in, hun hi’pung ing ka tin, chi chuam chuam um khawm in hun siam ing ka tin, zia gam hi la nung ah la suante kiang ah kumkhua a go ding un pia’ng ka,’ ei ti’n.

⁵ Ziaziakchun, la chapate ni, Aigupta gam ah la kiang ah ka hung ma’ la neite hi kei â a hiu: Ephraim tawh Manasseh hi, Reuben tawh Simeon gual ma in kei â a hiu a;

⁶ chuleh, zia nung ah cha la neite chu nang â hi ta’n au. A u te tawh go chang khawm dingte lak in a min uh la pan khawmsak ding ahi.

⁷ Kei ka hileh chu, Paddan gam ah kipat ka hung lai khan Rakhel chu Kanaan gam lampi, Ephrath khua chu gamla thim tak a hinak lai ziakin ka kiang in a thi ta’n. Zia Ephrath lampi chun ka hun vui malam tai,” a ti’n; (zia Ephrath chu Beth-lehem khua ahi.)

⁸ Israel in Joseph chate chu a mu in, “Ziate hi kuate a hiu em?” ti’n a dong a.

⁹ Joseph in a pa kiang in, “Ziate hi ka chapa, Pathian in zia tak ah ei piakte chu a hiu,” a tia. Ama chun, “Lungsiat in hun pui nai tiam in, ka maljawl theina dingin,” a tia.

¹⁰ Israel chu a têk tâk ziakin a mit a thim ta’n, a mu thei ta pua’n. Chuleh, Joseph in a hun pui nai ah, ama chun a la chawp ah, a la kawi ta’n.

¹¹ Israel chun Joseph kiang in, “La mêl mu kit ding hi ka kinem ta pua’n; himaleh, Pathian in la chate mêl tiang in ei musak tai,” a tia.

¹² Joseph in a chate chu a pa malpi kikâl ah kipat chun a kaidok ah, a mai ah leitual si’n chibai a bûk a.

¹³ Chuleh, Joseph in a chate chu a kai ah, Ephraim chu ama khut changlam, Israel veilam pang in a koi ah; Manasseh chu ama khut veilam, Israel khut changlam pang in a hun koi nai a.

¹⁴ Israel chun a vak ban kawkal hâm hâm ah, a khut changlam chu a chapang zaw Ephraim luchung in a ngâ; a veilam khut chu Manasseh luchung in a nga ta’n: Manasseh chu a upa zaw ahi ngal a.

¹⁵ Joseph chu a maljawl ah: “Ei suante Abraham tawh Isak ma-âng ah um sek Pathian, tu’ni tiang ah ei ching zingpa Pathian;

¹⁶ siat theina zosia lak ah ei humbitpa vansawlchâk chun, naupangte hi maljawl ta hen; keima min tawh, ei suante Abraham tawh, Isak min chu amau ah kipat in het zing in um ta hen; lei chung ah hin nasa tak ah hung khang in, hung pung tau hen,” a tia.

¹⁷ Joseph in a pa’n a khut changlam Ephraim luchung ah a ngak chu a mu in a lungdam ta pua’n; a pa khut Ephraim luchung ah a ngak lai chu Manasseh luchung in a ngaksak ta’n.

¹⁸ Joseph in a pa kiang in, “He pa, zia gual ding hi ahi puai: zia zawk hi ei vei nautîl chu, la khut changlam a chung in nga zaw’n,” a ti’n.

¹⁹ Himaleh, a pa chu a nuam pua’n, “Ka henai, ka chapa, ka henai: ama le lian sam ding ahi; ahi’n la, a nau hi ama sâng in lian zaw’n ah; a suante le chi chuam chuam lian tak tak hung hi’n au,” a ti’n.

²⁰ Tichun, ama chun: “Israelte’n, ‘Ephraim leh Manasseh gual in umsak tau hen,’ ti’n nanghaw min sua in maljawlna kipe sek in au,” ti’n zia ni chun amau chu a maljawl tai. Ahi’n, Ephraim chu Manasseh ma lam in a umsak tai.

²¹ Chuleh, Israel ma chun, Joseph kiang in, “Thi ding ka hi tai: himaleh, Pathian chu la kiang un um intin, la pateu gam ah chun hun pui kit in a.

²² Zia lo ah chunle, la suapite chanvo sâng in chan khat in ka hun pia tam zaw la hi; ka chemjam tawh ka thalpi, Amorte khut ah kipat ka lâkpiak kha,” a ti tai.