THILSIAM THU 46 - PATHIAN LEKHABU THIANGTHO (BSI)

Jakob In A Chanaute Aigupta Zotpi

¹ Tichun, Israel chu a nei zosia tawh a pawt ah, Beer-sheba a hung tun in, a pa Isak Pathian kiang ah chun kithoinate a lân a.

² Pathian in jan ah a mang lam in Israel a hun ho ah: “Jakob, Jakob,” a ti’n. Ama chun, “Zia’ hin ka um hi,” a ti’n.

³ Ama chun, “Kei Pathian, la pa Pathian chu ka hi: Aigupta gam ah chia suk ding hi lau kin; zia tak ah chun chi lian tak in hun siam ding ka hi’ngal in.

⁴ Aigupta gam ah chun hun umpi pek ding ka hi: Zia tak ah kipat chun hun pui to kit ngei ngei ding ka hi; chuleh, Joseph khut ah la um sung in la mit sîng ding la hi,” a ti tai.

⁵ Ziaphatchun, Jakob chu Beer-sheba ah kipat chun a pawtdok ah: Israel chate chun a pau Jakob tawh, a chaneuteu tawh, a jiteu chu, a chuanna ding ua Pharaoh kângtalai thotte khan a chuansak tau a.

⁶ Jakob tawh a suanteu zosia chun, Kanaan gam ah a lamdok uh ganchate tawh thuamphua zosia chu a somdok in, Aigupta gam a tung tau a:

⁷ A chapate, a tupate, a chanute, a tunute, a suante zosia chu Aigupta gam in a lûtpi tai.

⁸ Ziate hi Israel suante, Aigupta gam ah lût, Jakob tawh a chapate min chu ahi: Jakob cha upa pen Reuben ahi’n;

⁹ Reuben chapate chu: Hanokh, Pallu, Hezron tawh Karmi a hiu a.

¹⁰ Simeon chapate chu: Jemuel, Jamin, Ohad, Jakin, Zohar tawh Kanaan numei lak ah Shaul (Saul le a kiti tho hi) a hiu a.

¹¹ Levi chapate chu: Gershon, Kohath tawh Merari a hiu a.

¹² Judah chapate chu: Er, Onan, Shelah, Perez tawh Zerah a hiu a. (Er tawh Onan chu Kanaan gam ah chun a thi tau ah.) Chuleh, Perez chate chu: Hezron tawh Hamul a hiu a.

¹³ Issakhar chapate chu: Tola, Puvah, Jashub tawh Shimron a hiu a.

¹⁴ Zebulun chapate chu: Sered, Elon, Jahleel,

¹⁵ (ziate hi Leah chapate, a chanu Dinah tawh, Paddan-aram gam ah Jakob a hinpiak suante chu a hiu a: A chapate leh a chanute chu a leng un sawmthum leh thum a hiu a.)

¹⁶ Gad chapate chu: Ziphion, Haggi, Shuni, Ezbon, Eri, Arodi tawh Areli a hiu a.

¹⁷ Asher chapate chu: Imnah, Ishvah, Ishvi, Beriah tawh a chanu Serah a hiu ah. Beriah chapate chu Heber tawh Malkiel a hiu a;

¹⁸ (ziate hi Laban in a chanu Leah kiang ah a piak Zilpah chapate chu a hiu ah; ziate chu Jakob a hinpiak, mi sawm leh gukte chu a hiu.)

¹⁹ Jakob ji Rakhel chapate chu: Joseph tawh Benjamin a hiu a.

²⁰ Chun, Joseph in Aigupta gam ah chun chapa pani, Manasseh tawh Ephraim a nei ah; ziate chu On khua thiampu Potiphera chanu Asenath in a hin piakte chu a hiu a.

²¹ Benjamin chapate chu: Bela, Bekher, Ashbel, Gera, Naaman, Ehi, Rosh, Muppim, Huppim tawh Ard te hi a hiu a,

²² (ziate chu Rakhel in Jakob a hin piak cha pawsalte chu a hiu a: A leng un sawm leh pali a hiu.)

²³ Dan chapa chu: Hashum ahi.

²⁴ Naphtali chapate chu: Jahzeel, Guni, Jezer tawh Shillem a hiu ah;

²⁵ (ziate chu Laban in a chanu Rakhel kiang ah a suaknu ding ah a piak Bilhah suante chu a hiu a; ziate chu Jakob a hinpiak ahi: a leng un pasagi a hiu.)

²⁶ A chapate jite chate simkhawm lo ah, Jakob khalbe ah piang ngen, Aigupta gam ah a pêm lut khawmpite chu sawmguk leh guk a hiu a.

²⁷ Joseph in chapa Aigupta gam ah a neite chu pani a hiu ah: Jakob Inkuante zosia, Aigupta gam ah lûtte chu a leng un sawmsagi a hiu.

Goshen Gam Ah Jakob chênna

²⁸ Israel in, Goshen gam ah Joseph in a la lamkai piak theina ding in, a kiang in Judah a sawl masa’n. Goshen gam a hung tun phat un,

²⁹ Joseph in a kângtalai siamtup in, Goshen gam ah chun a pa dawn dingin a chia ta’n. A kiang in a kihiatsak in, a ngawng a kawi in chom khat a awm sutua in a kap ta’n.

³⁰ Israel chun Joseph kiang in, “Hing leh dam in la um ah, la mêl ka mu kit tâk ziak ah hin tu’hin thi ta lengle a hun tai,” a ti’n.

³¹ Chun, Joseph in a suapite tawh a pa chanaute kiang in, “Pharaoh kiang in hang chia ing ka tin, ‘Ka suapite tawh ka pa chanaute Kanaan gam ah umte kha ka kiang a hung tung tau a:

³² Amau chu belam ching mi a hiu ah, ganvul mite a hiziak un: A belam honteu tawh, a bawng honteu tawh a nei zosiau a hun som suk sik sek ui,’ ti’n vagen ing ka tin;

³³ Pharaoh chun a hun ko ah, ‘Bang na la sêm sek awm?’ tia a hun dot phat leh,

³⁴ nang un, ‘La suakte hi ka naupan lai ua kipat leh, ei suantute khang ah kipat ah, tu’ni tiang ah hin ganching mi ka hiu, la ti ding uh ahi,’ tiu in; Goshen gam ah la umtheina ding un,” a ti’n. Belam ching mite him him chu Aigupta mite ki’dak lam tak ahi ngal a.