THILSIAM THU 44 - PATHIAN LEKHABU THIANGTHO (BSI)

Joseph In Benjamin A Hendenna

¹ Chun, Joseph in a In enkoltu kiang in, “Ziate bu puak ding hi a puak theitawp un sung dim inla, a dangka chiat uh kha a dip gawl bul un koi piak in.

² Chuleh, ka dangka no kha, a naupang pen dip gawl bul ah koi inla, a bu man dangka kha tawh,” ti’n thu a pia’. Tichun, Joseph thupiak dungzui in a bawl ta’n.

³ Khua a hung vak phatin, a sabiltungteu chu tawh a chiasak tau a.

⁴ Chutia, khua kipat a pawtdawu ah, gamla a tun mau in Joseph in a In enkoltu kiang ah chun, “Kipan inla, mite kha vadel in; la del phâk phat leh a kiang un, ‘Bangtidan ah thil pha chu thil phalo ah thuk la hiu em? Bang ding ah ka dangka no la gûk uh a hem?

⁵ Zia kha ka pu uain dawnna leh a âisânna hilo a hem? Zia gual ah la bawl uh hi la hi’khial ma mau hi,’ va ti’n la,” a tia.

⁶ Chun, a vadelpha ta’n, zia thute chu a kiang un a gen tai.

⁷ Amau chun a kiang in, “He pu, bangtidan ah zia gual thute hi gen la hem? La suakte hin zia gual thil chu ka bawl lo ding dan mai uh chu!

⁸ En in, ka dip ua dangka ka muteu kha le Kanaan gam ah kipat in la kiang in ka hun paw kit uh kha lam! Bangti’n a hem la pu In ah la dangka no a hem, sana a hem ka hung guk daw thei ding uh?

⁹ La suakte lak ah hin kuale la mu’na tapo chu thi mai hen la; a dangte hile ka leng un ka puu suak in um mai ing kau,” ti’n a dawnhu tau a.

¹⁰ Chun, ama chun, “Awle, la thugen gual uh chun hita hen: Ahi’n, kuale ka mudawna pen pen chu ka suak in um hen la, a dang haw vang chia thei in lau,” a ti’n.

¹¹ Ziaphatchun, kin tak in amau dip chiat a domthau ah, a dip chiat uh a hong tau a.

¹² Ama chun, a upa pen in a pan ah, a naupang pen tiang in a hawl ah; a leh, a no chu Benjamin dip in a mu ta’n.

¹³ Ziaphatchun, a puansilteu a bot thêk tau a. A sabiltung chiat uh puaksak kit in, khawpi sung lam in a kile’kit tau hi.

¹⁴ Judah tawh a suapite chu Joseph In a hung tung kit tau ah, ama chu zia tak ah chun a la um nalai ah: bokkhup in chibai a bûk chiat tau a.

¹⁵ Joseph in a kiang un, “Bang a hem la bawl uh? Keima gual mi hin âi a en thiam ahi ti helo la hiu em?” a ti’n.

¹⁶ Judah chun, “He pu, la kiang ah bang gen ding ka hitau em? Bang gen ma ma ding ka hitau em? Bangti’n a hem ka kigen thian thei ding uh? Pathian in la suakte gitlona chu a mudok ta ahi hilam! Keimau haw tawh, a khut ah no la mudawna pa tawh, ka leng un la suak in um khawm sik sek mai ing kau,” a ti’n.

¹⁷ Ahi’n, ama chun, “Zia gual chun bawl lo hial ing ka! A khut ah no ka mudawna pa bep hi ka suak in um intin, nanghaw vang thamuang tak in la pau kiang in chia kit tau in,” a ti tai.

Judah in Benjamin A Dotpiakna

¹⁸ Ziaphatchun, Judah chun Joseph a vanai ah, “Aw he pu, lungsiat tak in he pu, la suak hi la kiang ah thu kam khat ei gensak inla, la lungnatna chu la suak chung ah hin kuanjaksak ziang kin; nang chu Pharaoh tawhbang bang la hi’ngal in.

¹⁹ He pu, nang in, ‘Pa a hem, suapi a hem la nei awm?’ ti’n la suakte hi lei dong a;

²⁰ kei un, la kiang ah, ‘Pa têk tak leh, a têk lam cha, naupang cha ka nei un, zia pa u chu a thi ta’n, a nu hin lak ah chun ama bepcha ahi tai; a pa chun a hepi ma ma hi,’ ti ka gen un.

²¹ Ziaphatchun, la suakte kiang ah hin, ‘Ama chu ka mit ah ka mutheina dingin ka kiang ah hun pui suk un,’ la ti’n.

²² A leh, he pu, kei un la kiang in, ‘Naupang chun a pa nusia thei pua’n ah, a pa a nutsia chun a pa chu thi mai ding ahi,’ ka tiu a.

²³ Chuleh, nang in la suakte kiang ah hin, ‘La nau neupen uh ka kiang ah la hun pui suk lo ua leh ka mêl mu pua’n lau,’ la ti hen.

²⁴ La suak, ka pau kiang ka tun kit phat un, he pu, la thugente kha ka gen sawn un.

²⁵ Ka pau chun, ‘Chia kit unla, bu neucha khat bêk ei vachawk piak kit mai un,’ a ti’n.

²⁶ Keihaw’n, ‘Chia kit thei pua’ng kau. Ka nau neupen uh hin ei zui thei ding leh chia thei bep ing kau: Ama a pan lo ding leh vang zia pa mêl chu hang mu kit theilo ding ka hiu,’ ka tiu a.

²⁷ Chun, la suak, ka pau chun, ka kiang un, ‘Ka ji’n chapa pani ei hin piak hi ti la hiau a;

²⁸ tu’hin, a pakhat chun ei nusia ta’n, puaitel in a um ta hi ngei in ah ka ti hen, zia’ kipat chun ama chu ka mu kit ta pua’n;

²⁹ tu’hin, zia hi ka kiang ah kipat la pui mang nâk lai ua, thil phalo khat a hang tuak khâk kît chun, ka samkâng hi lungngai pum in Sheol zotsak ding la hiu,’ a ti hen.

³⁰ Chutichu ahiziak in, naupang hi ka kiang ua pang lo ah, la suak, ka pau kiang ka tun to phat ua leh, a hinna hi zia naupang hinna hitawh kizop det ahi ngal a;

³¹ naupang hi a pang puai ti a het phat phat leh ama chu thi mai ding ahi; ahi’n, la suakte hin, la suak, ka pau samkâng ta chu lungngai in Sheol zotsak ding ka hiu.

³² La suak hin, ka pa kiang ah, ‘La kiang ah ka hun pui kit lo ngei ngei leh ka pa mit mu ah hin ka dam sung sia a mawpaw mai ing ka,’ ti’n, zia naupang chungchâng ah hin a mawpaw dingin ka hung kitiam ta’ngal in.

³³ Ziaziakchun, tu’hin, lungsiat tak in, keima la suak hi zia naupang thasâng ah hin ka pu suak in ei umsak mai inla; naupang hi a u te tawh kiton in chia kitsak mai in.

³⁴ Naupang kitonpi kit lo hin ka pa kiang lam ah bangti chia kit thei ma ma ding ka hem? Ka pa chung ah siatna hung tung ding chu mu’ngam ma ma lo ka hi,” a ti tai.